896
Буряад Уласай Толгойлогшын тушаалда һунгагдаһан Алексей Цыденов уласай Үндэһэн Хуулиин гуримаар мүнөөдэр арад зонойнгоо урда тангаригаа үгэжэ, тушаалаа эзэлбэ.
Мүнөөдэр, сентябриин 22-то, үглөөнэй 10 сагта Буряадай оперо болон баледэй театрта Буряад Уласай Толгойлогшын тушаалаа эзэлхэ ёһолол үнгэргэгдэбэ. Буряад Уласай Үндэһэн Хуулиин ёһоор Алексей Цыденов хоёр хэлэн дээрэ тангаригаа үгэбэ. Буряад Уласай Үндэһэн Хуулиин ном дээрэ баруун гараа табяад:
- Буряад Уласай Толгойлогшын тушаал эзэлхэдээ, арадтаа үнэн сэхээр алба хэхэб. Буряад Уласай Толгойлогшын уялга үнэн сэхэ дүүргэхэб. Буряад Уласай эрхэ аша хамгаалхаб, хүнэй ба эрхэтэнэй эрхэ сүлөө хүндэлхэб, хамгаалхаб. Ородой Холбоото Уласай Үндэһэн хуули болон Буряад Уласай Үндэһэн хуули сахихаб гэжэ тангаригаа үгэнэб, – гэжэ Алексей Цыденов хэлэбэ.
Ородой Холбоото Уласай Юрэнхылэгшын Сибириин федеральна тойрогтохи бүрин эрхэтэ түлөөлэгшэ Сергей Меняйло, 2007-2012 онуудта Буряад Уласай Юрэнхылэгшын, 2012-2017 онуудта Буряад Уласай Толгойлогшын тушаал эзэлжэ хүдэлһэн Вячеслав Наговицын, Буряад Уласай Арадай Хуралай Түрүүлэгшэ Цырен-Даша Доржиев, Буряад Уласай Верховно Сүүдэй Түрүүлэгшэ Альбина Кириллова гэгшэд Буряад Уласай Толгойлогшын тушаал хуулиин ёһоор эзэлһэн Алексей Цыденовые амаршалбад.
"Ариг Ус" телекомпаниин сэхэ дамжуулгын буулгабари.
