​Александр Богомоевой амжалта

«Шахтерская слава» гэһэн уласхоорондын мүрысөөндэ Буряадай тамиршад зургаан медальда хүртэбэ. Кемерово хотодо болоһон энэ мүрысөөндэ 176 хүн хабаадаа. 

Бүхы зундаа һайн бэлэдхэл гараһан барилдаашаднай ехэ мүрысөөнүүдтэ хабаадажа эхилбэ. Эгээл энэ үедэ тэдэ ямараар һорилго гарааб гэжэ мэдэгдэхэ. 2018 оной эхиндэ болохо “Гран-при “Иван Ярыгин” гэһэн уласхоорондын ехэ хэмжээнэй мүрысөөн гол шалгалта боложо үгэхэ юм. Тиимэһээ тэрээндэ шанга бэлэдхэл үргэлжэлүүлэгдэхэ юм гээд һануулая. Барилдаашад һоригшодтоёо хибэс дээрэ гаража, хэһэн алдуунууд дээрээ хүдэлхэ зорилготой болоно. 

Удаан саг соо хибэс дээрэ гараагүй Буряадаймнай түрүү барилдаашан Александр Богомоев Кемерово хотодо мүрысөөндэ хабаадаба. Үнгэрһэн хабар Усть-Ордада тэрэ муу юумэндэ орожо, ехээр сохюулаа бэлэй. Тэрээнэй удаа хэдэн дахин дэлюундээ операци хүүлээ. Тэрэ үедэ Александр Богомоев барилдаха гү, али үгы гэhэн асуудал эмшэд табиһан байна. Бурхан хаража, Александр амиды мэндэ үлэжэ, һорилгоёо үргэлжэлүүлжэ, мүнөө барилдажа эхилбэ. 

61 килограмм хүрэтэр шэгнүүртэ Александр Богомоев гурбан тулалдаа үнгэргэжэ, бултаниие шүүбэ. Һүүлшын уулзалгада Эрхүү можын түлөө барилдадаг Юлиан Гергеновые 6:1 гэһэн тоотойгоор илаа. 

Энэл шэгнүүртэ Баяр Цыренов гурбадахи һуурида гараба. Үшөө нэгэ алтан медальда Даша Шарастепанов хүртөө. Кемеровын хибэс дээрэ тэрэ дүрбэн уулзалга үнгэргэхэ байгаа. Финалда Дашатай барилдахаяа Буряадай барилдаашан Алексей Боровицкий гарабагүй. Тиигэбэшье Алексей хоёрдохи һуури эзэлээ. 

70 килограмм хүрэтэр шэгнүүртэ Евгений Жербаев гурбадахи һуурида гараа. 125 килограмм хүрэтэр шэгнүүртэ Цыбик Максаров хүрэл медальда хүртэһэн байна. Буряадай томо барилдаашаниие шүүһэн Остап Пасенок мүрысөөнэй гол шан - автомобильда хүртэбэ. 

57 килограммай шэгнүүртэ гурбадахи һуури эзэлхын түлөө Агаһаа уг гарбалтай Димчик Ринчинов ба Тамир Гармаев гэгшэд барилдаһан байна. Энэ уулзалгада 11:10 гэһэн тоотойгоор Ринчинов илалта туйлаа. Димчик хадаа хэдэн жэлэй туршада Белоруссиин түлөө барилдадаг юм. Үнгэрһэн хабар тэрэ Европын чемпионадта ошоходоо бирагүйдөө һэн. Мүнөө тэрэ дахин бэрхээр барилдажа эхилээ гэжэ тус мүрысөөн харуулба. 

Ерэхэ амаралтын үдэрнүүдтэ Саха-Яхад Уласай суута һоригшо ябаһан Дмитрий Коркиной дурасхаалда зорюулагдаһан уласхоорондын мүрысөөн Якутск хотодо үнгэргэгдэхөөр хараалагдана. Тэндэ Буряадай барилдаашадые ээлжээтэ шанга тулалдаанууд хүлеэнэ.