Сентябриин 24-дэ Улаан-Үдэдэ Ород гүрэнэй Герой Алдар Цыденжаповай дурасхаалай митинг тэрээндэ зорюулагдаhан хүшөөгэй дэргэдэ үнгэргэгдэбэ.
Долоон жэлэй саада тээ энэ үдэр Алдар Цыденжапов «Быстрый» гэжэ эсминец-корабль дээрэ уялгата алба гараха үедөө дайшалхы онгосоёо, суг алба хэдэг нүхэдөө абаржа, ами наhанhаа хахасаа бэлэй. Тиигэжэ баатар буряад хүбүүнэй нэрэ XXI зуун жэлэй түүхэдэ ороо.
Энэ хэмжээ ябуулгада «Быстрый» эсминецэй командир, 1-дэхи рангын капитан Александр Катков, Алдарай эгэшэнэр – Ирина болон Арюна Цыденжапованууд, Буряад Уласай Арадай Хуралай һунгамал, Нютаг можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной гэшүүн Игорь Марковец, Буряад Уласай спортын болон залуушуулай хэрэгүүдэй сайдай орлогшо Сергей Перинов, Буряадай арадай фронтын таһагай штабай, сэрэгшэдэй түрэлхидэй таһагай гэшүүн Марина Аникьева, залуушуулай нэгэдэлнүүдэй түлөөлэгшэд, оюутад болон һурагшад хабаадаһан байна. Митингдэ ерэгшэд Алдарай баатаршалга тухай дурсажа, эрэлхэг баатар хүбүү хүмүүжүүлһэндэнь аба эжыдэнь баярые хүргэбэ.
Энэ үдэр Буряад Уласта, баатар хүбүүнэй тоонто нютагтань, мүн алба хэhэн онгосо дээрэнь Алдар Цыденжаповай дурасхаалда зорюулагдажа, хэмжээ ябуулганууд үнгэргэгдэбэ. Алдарай дурасхаалда кино буулгагданхай, ирагуу найрагшад болон һургуулиин бэлигтэй һурагшад шүлэгүүдые зохёоно, найруулгануудые бэшэнэ. Хүшөөгэй дэргэдэ Мариинскэ интернат-һургуулиин 5-дахи ангиин һурагша Арина Васильева Агын тойрогой һурагша Юлия Карелинагай зохёоһон «Ещё совсем недавно было» гэһэн шүлэг уншаба.
-Нёдондо Алдарай дурасхаалда зорюулагдаhан хүшөө нээгээбди. Дайшалхы онгосоёо, нүхэдөө абархын тула ами наһаяа гамнаагүй Алдар Цыденжаповай дурасхаалые мүнхэлхэ талаар ажал ябуулагдажа байдаг. Мүнөө жэлдэ Улаан-Үдын 57-дохи һургуулида Геройн нэрэ олгогдоо. Тэрэнэй баатарлиг жэшээ хэрэглэн, Эхэ орондоо дуратай байлгын болон эрэлхэг зоригой хэшээлнүүд Буряад Уласаймнай һургуулинуудта үнгэргэгдэнэ,- гэжэ Улаан-Үдэ хотын засаг даргын уялга дүүргэгшэ Александр Иринчеев хэлэбэ.
- Алдарай эжы абадань, аха дүүнэртэнь баярые хүргэнэб. Тэрэнэй эрэлхэг зоригтойгоор абарһан онгосодо мүнөө хүрэтэр манай хүбүүд албаяа дүүргэжэ байдаг. Бидэ бултадаа Герой сэрэгшээрээ омогорходогбди, тэрэнэй баатаршалга хэзээнэйшье сагта бултанда жэшээ болохол. Мүнөөдэр «Быстрый» эсминецтэ Алдарай дурасхаалда зорюулагдаһан хэмжээ ябуулганууд үнгэргэгдэжэ байна, - гэжэ кораблиин командир, I рангын капитан Александр Катков хэлэбэ.- Маанадай энэ хүрьһэтэ дэлхэй дээрэ амиды ябахын түлөө Алдарнай ами наһаяа үгөөл даа гэжэ сугтаа алба хэhэн сэрэгшэдынь хэлэдэг…
Амарай онгосо бүтээлгын заводто мүнөө бүтээгдэжэ байhан Ородой Холбооной Герой Алдар Цыденжаповай нэрэмжэтэ онгосо хойто жэлhээ Номгон далайн долгинуудые эсхэхэ юм.
Анна Огороднигой гэрэл зураг.