Бэшүүр аймагай сүүдые Гутайһаа угтай, олондо мэдээжэ Доржо Степанов олон жэлдэ даажа ябаһан. Нютагай наһатай буряадууд тэрэниие хүндэлжэшье, заримдаа уурлажашье, али нэгэндээ наада зугаадаашье Степан Доржо гэжэ нэрлэдэг hэн. Тэрэ үедэ аймагай ноёд журам шангаар барихые оролдожо, гуримаа алдаһан зониие сүүдээр хэдэн хоногоор хаалгадаг һэн. Степан Доржо шүүгшэ зэмэтэйшүүлдэ “тэды хоног” гээд лэ соносхохо даа.
Энэ ушар далаад онуудай эхеэр болоо һэн. Тэрэ үедэ архи дарһан гээшэ элбэг, зариман ажал хэрэгһээ байтагай гэр малаашье хайхархаяа болёод, архида «шунгашадаг» бэлэй. Дунда зэргын ноёдһоо байха аргаа ядаһан һамгадшье засаг зургаанда гомдол баридаг һэн. Сагдаанар тиимэшүү эрэшүүлые суглуулаад лэ, сүүдтэ асарха.
Нэгэтэ эгээл таряа тарилгын түлэг ябажа байхада, олон зон асарагдаба гээшэ. Бэшүүр аймагай түбтэ 15 мянга шахуу зон ажаһуудаг гэхэдэ, хэды зониинь иишэ асарагдадаг байгаа юм – хэн тоолобо даа. Дүй дүршэлтэй Степан Доржо ахатан асуулта эхилхэдээ:
-Зай, шимни ямар ажалтай аад, архи уужа ябанаш? – гээд лэ һураба.
Түрүүшын нэгэн:
-Малшан, - гэжэ харюусаба.
Степан Доржо: “Малшаниие хэды соо һуулгахада яашаха һэм. Малнуудаа һамганиинь, үхибүүдынь хэды хоног соо адуулна бэзэ”, - гэжэ бодоод:
-Табан сүүдхэ һуухаш! – гэжэ шиидхэбэри гаргаба.
Удаадахинь механизаторби гэбэ.
-Энэ тарилгын халуун хаһада архи уужа ябаһан яндан дагадхабши! – гэжэ хараагаад, энэш мүнөө эгээл хэрэгтэй хүн байна гэжэ һанаад:
-Гурбан сүүдхэ һуухаш! – гэжэ шиидхэбэ.
Гурбадахи хүнэйнь жолоошонби гэхэдэ, хуряалгын ажалай эхилтэр энээниие барихада болохо гэжэ:
-Долоон сүүдхэ! - гэбэ.
Дүрбэдэхинь, үйлөө харла ехэ, түрэһэн үдэрөө тэмдэглэһэн багша хаанаһаашье юм, бү мэдэе, баригдашаһан байба.
«Би мал харюулха малшаншье, ургаса хуряаха механизаторшье, орооһо зөөхэ жолоошоншье бэшэб, мүнөө амаралтада байһан багшал ха юмбиб, Степан Доржо хараабал хараагаад лэ табина ааб даа », - гэжэ бодоод:
-Учитель! – гэбэ даа.
Харин Степан Доржо уурлахын ехээр уурлажа:
-Какой ты учитель!? – гэжэ һөөргэдэбэ. – Ты не учитель, а мучитель, пятнадцать суток ареста! – гэжэрхёо һэн гэжэ мүнөөшье болотор зон зугаалдадаг.
Доржо Степановай тушаалта ажалдаа ханамжатайгаар хандадаг, эрилтэ ехэтэй, өөрөө ехэ сэхэ сэбэр хүн тулань аймагай зон тэрээнһээ ехэ түбэгшөөдэг һэн. Нэгэтэ Степан Доржо нүхэдөөрөө уулзахадаа иигэжэ хэлээ һэн:
-Минии наһа барахада, хүдөөлүүлгэндэмни бүхы бэшүүрэйхид зорюута ерэжэ, Степан Доржо үнэхөөрөө үхөө гү гэжэ хараха байха даа.