812
Буряад Уласай Засагай газарта октябриин 12-ой үдэр Алексей Цыденовэй хабаадалгатайгаар “Сколково” гэһэн шэнэ оньһон аргануудые зохёон бэлдэлгын ба дэлгүүртэ нэбтэрүүлгын түбэй Хүгжэлтын жасын түлөөлэгшэдтэй уулзалга үнгэрбэ. Тус уулзалгада Засагай газарай бүхы яамануудай сайдууд хабаадалсаа.
“Сколково” түбэй можо нютагууд хоорондын хүгжэлтын департаментын дарга Александр Окуневто (гэрэл зураг дээрэ) үгэ үгтэбэ.
“Манай жасын бии болгогдоһоор табан жэлһээ үлүүхэн боложо байна. Бидэн тухай һайнааршье, муугааршье хэлэхэ зон олон. Энэ жаса руу элдэб янзын түсэлнүүд эльгээгдэнэ. Тиин мүнгэ олохо зорилготойгоор ажалаа эмхидхэдэг, ябуулдаг. Бидэ бага ба дунда зэргын эмхинүүдтэ туһаламжа үзүүлхэ аргатайбди. Жэшээнь, Буряад Уласай “ДРД” компанитай үнинэй суг хүдэлдэгбди, инсульт үбшэ эртүүр элирүүлхэ аргатай шэнэ түхеэрэлгэнүүдые зохёон бүтээдэг, биомедицинын шэглэлээр хүдэлдэг юм”, - гэжэ тэрэ хэлээ.
Буряад Уласта мүнгэ һомолхо талаар ехэхэн арга боломжо байна. Компани үйлэдбэрилһэн зүйлнүүдээ ганса гүрэн дотороо худалдаха бэшэ, харин хари гүрэн руу наймаалха аргатай, тиихэдэ баһа хажуугаарнь ажалай шэнэ һууринууд бии болохо бшуу. Олон компанинууд хүдөө ажахын, элүүрые хамгаалгын, ажаүйлэдбэриин, һуралсалай болон бусад һалбаринуудай шэглэл баримталан хүдэлдэг байна.
2016 оной дүнгүүдые абаад харабал, ехэнхи компанинууд ехэ дэлгүүртэ гаража, 150 миллиард түхэриг оруулаа. Тиихэдээ дэлхэйн 47 гүрэнтэй хүдэлдэг байна.
Гадна жаса эхилжэ байһан олзын хэрэг эрхилэгшэдтэ хамһалсадаг юм. Һонин түсэлнүүдые зохёоһон, өөрын һанамжануудтай зондо туһалдаг. Можо нютагуудай компанинуудта тон түрүүн шэнэ ажалай һууринууд гаража үгэнэ, хоёрдохёор, мүнгэмнай эндээ, нютагтаа, үлэхэ болоно.
Энэ жасада түсэлнүүдээ бэшэжэ үгэгшэдтэ налог татабариин талаар хүнгэлэлтэ, тиихэдэ 350 сая түхэриг хүрэтэр грантнууд үгтэдэг байна. Компанинуудай зариманиинь инвестици оруулха аргатай, нүгөөдүүлынь ябан ошон, эдээнтэеэ харилсаа холбоо байгуулан, эбтэйгээр хүдэлдэг юм.
Эмшэд медицинын шэнэ оньһон аргануудые хэрэглэжэ, онкологиин үбшэниие эртээнһээ элирүүлхэ, тусхай шэнжэлгэ хэжэ, зүбөөр үбшэ таниха ба онлайн гуримаар зүбшэл заабари үгэдэг байха.
Минии ойлгоходо, “Сколково” руу олон бэрхэ зомнай түсэлнүүдые зохёожо ошоод, тэндээ үлэшэнэ. Тиихэдэнь мүнгэн тэдхэмжэнь Буряад Уласта ороногүй. Томо компанинуудтай хөөрэлдэжэ, “Сколково” жаса мүнгэ оруулха ябадалдань хамһалсаха аргатай. Зүгөөр можо нютагууд мэргэжэлтэдээ үгэхэ дурагүй. Тиимэһээ холбоо харилсаатайгаар хүдэлэел гэжэ гуйха болоно. Жасынхид өөһэдтөө мүнгөө үлээхэ дуратай, харин Буряадай Толгойлогшо Алексей Цыденов уласайнгаа һан дүүргэхэ хүсэлтэй.
Сколковойхид нютагаймнай зохёон бүтээгшэдтэ хоёр шэглэл баримталхыень дурадхана. Нэгэдэхеэр, федеральна туһаламжа үзүүлхэ аргатай, тиихэдээ тэдэ нютагтаа үлэхэдөө, эдэй засагта нэмэри оруулха байна. Хоёрдохёор, жасынхид өөһэдөө шэнэ һонин түсэлнүүдые зохёогоод, можо нютагууд руу ошожо хамһалсахадань, бюджедтэнь мүнгэнэй талаар алмалта боложо үгэхэ ба шэнэ элдэб һалбарида туһа үзүүлэгдэхэ бшуу.
Хэнэйшье мэдэһээр, һүүлэй жэлнүүдтэ ехэхэн талмай дээрэ ой тайгамнай шатажа, жэл бүри 5-6 сая дүрбэлжэн метрэй хэмжээнэй хохидол ушаруулна. Тиимэһээ бултанай үзэмжэдэ “Лесной дозор” гэһэн оньһон аргануудай шэнэ байгуулгатай танилсалга үнгэрөө. Энэ хадаа түймэр сараха ба һэргылхэ хэрэгтэ туһа үзүүлдэг.
Үшөө нэгэ түсэл - “Дневник. ру”. Тэрэ һуралсал бүри ойлгосотой ба һонирхолтой болгохо үүргэтэй юм.
“Энээниие хэрэглэн хүдэлхэдэ, ЕГЭ ба ОГЭ тушаалгын дүнгүүд 15-20 хубяар дээшэлээ, гадна тест бэшэхэдэ ба шалгалтада бэлдэхэдэ туһатай. Манай болон СНГ-гэй гүрэнүүдтэ һуралсалай тон ехэ IТ-компани болоно гээшэ”, - гэжэ Дмитрий Алексеенко хэлэбэ.
Тус уулзалгаһаа хүн зон толгойдоо элдэб бодол түрүүлэн тараа ёһотой, теэд эдэ түсэлнүүд Буряад Уласта хүгжэлтэ асарха гү?
Анна Огороднигой гэрэл зураг
Автор: Любовь ЦЫБЕНОВА
