787
2017 оной ноябриин 2-һоо 4 болотор Арадай уран бүтээлэй уласай түб Буряад Уласай Соёлой яаманай дэмжэлгээр эстрадын дуунуудай Можо хоорондын «Наранай туяа – Лучики солнца -2017» гэһэн хүүгэдэй мүрысөө үнгэргэхэ.
Буряад Уласай Соёлой яаманай сайтһаа гэрэл зураг абтаба.
«Наранай туяа» гэһэн мүрысөөн хадаа үхибүүдэй бэлиг талаан дэмжэһэн, тэрэнииень улам мүлижүүлдэг юм. Үхибүүд олон зоной урда тайзан дээрэ гаража, сэгнэшэгүй дүй дүршэлтэй болоно. Тэдэнэр энэ мүрысөөндэ дуратайгаар хабаададаг юм. 26 жэлэй туршада үнгэргэгдэжэ байһан энэ дуунай һайндэртэ мянганһаа дээшэ үхибүүд хабаадаһан байна. Тэдэнэй олонхинь саашадаа соёл урлагтай хуби заяагаа холбоо. Нэрлэбэл, Амархуу Борхуу, Зорикто Тогочиев, Чингис Хандажапов, Алагуй, Нар-Оюу Наран-Баатарын, Саяна Аюшеева, Сойжина болон Дахалэ Жамбаловууд, Олег Красиков, Вика Орбодоева болон бусад.
«Наранай туяа» мүрысөөндэ дуушад, дуунай ансамбльнууд 7-тойһоо 17 наһа хүрэтэр үхибүүд наһанай гурбан бүлэгүүдтэ хубааржа, хабаадаха аргатай. Энэ мүрысөөн тухай тодорхой мэдээсэл Арадай уран бүтээлэй уласай түбэй сайт дээрэ www.байкалфолк.рф болон в «В контакте» сүлжээндэ vk.com/ГаукРцнт гэһэн хаягаар хаража болоно.
Байгша оной ноябриин 4-дэ Х. Намсараевай нэрэмжэтэ буряад драмын театрта «Наранай туяа» мүрысөөнэй түгэсхэлэй шата болон гала-концерт үдэрэй 16 сагта үнгэргэгдэхэ.
