621
Буряадай гүрэнэй ехэ һургуулида бэлиг талаантай хүгжэмэй багшанарые дэмжэхэ, хүгжэмэй болбосоролой һалбарида шэнэ бодол хүгжөөхэ зорилготой үнгэргэгдэһэн Анатолий Андреевэй нэрэмжэтэ мүрысөөнэй дүнгүүд согсологдобо.
Хоёр үдэрэй туршада Буряад уласай аймагуудай болон Улаан-Үдэ хотын хүгжэмэй юһэн багшанар хаба шадалаа туршаба. Тэдэнэр методическа заабаринуудые харуулжа, нээмэл хэшээлнүүдые үнгэргэжэ, «Түрэл нютагайм аялга» гэһэн сэдэбээр оюутадта соёлой-гэгээрэлэй лекцинүүдые уншаба. Мүрысөөнэй түгэсхэлэй шатада Буряад Уласай Болбосоролой болон эрдэм ухаанай сайдай орлогшо Валерий Поздняковай хабаадалгатай «Традиции и инновации музыкального образования в детских садах и школах» гэһэн дүхэриг шэрээ үнгэргэгдэһэн байна.
Мүрысөөнэй дүнгүүдээр, Ивалга аймагай Сужын дунда һургуулииин хүгжэмэй багша Цыпилма Доржиева түрүүлбэ.
- Энэ мүрысөөндэ илахаб гэжэ оройдоо һанаагүйб. Мүрысөөндэ хабаадаһан багшанарта баяр хүргэнэб, - гэжэ Цыпилма Доржиева хэлэбэ.
Тиихэдэ жюриин гэшүүд дипломантнуудые шагнаба. Улаан-Үдын 91-дэхи «Строитель» сэсэрлигэй хүгжэмэй багша Светлана Пластинина 1-дэхи шатын дипломоор шагнагдаба. 2-дохи шатын диплом Хори аймагай 1-дэхи дунда һургуулиин хүгжэмэй багша Нина Арефьевада барюулагдаба. 3-дахи һуури Бабанта аймагай Наталья Аюшеева эзэлбэ.
- Мүнөө сагай байдалаар хүүгэдэй сэсэрлиг болон һургуулинуудта хүгжэм заалга илгаатай. Тиимэһээ энэ байдал хубилгаха талаар ажал ябуулха шухала, - гэжэ Валерий Поздняков тэмдэглэбэ.
Энэ хэмжээ ябуулгада Анатолий Андреевэй наһанайнь нүхэр, Уласай уран бүтээлэй түбэй хүтэлбэрилэгшэ Наталья Галсановна Донсорунова хабаадалсаа. Мүрысөөндэ хабаадашадта Наталья Галсановна «Антология песен Бурятии» гэһэн ном барюулаа. Тэрэ номдо Буряадай мэдээжэ хүгжэм найруулагшад оруулагданхай.
- Анатолий Андреевэй нэрэ ганса тэрэнэй дуунуудта мүнхэлэгдэнхэй бэшэ, тэрэнэй нэрэмжэтэ хэмжээ ябуулгануудай үнгэргэгдэхэдэ ехэ баяртайб, - Наталья Донсорунова хэлэбэ.
