Уран уншалга улам дээшэлһээр

Буряадай арадай поэт Николай Дамдиновай 85 жэлэй ойн баярта зорюулагдаһан Буряадай элитэ поэдүүдэй шүлэгүүдые уран гоёор, сээжээр уншалгын IX можо нютагууд хоорондохи «Дүрбэн тэнгэри» гэһэн урилдаан үнгэрһэн долоондо П.И. Чайковскиин нэрэмжэтэ урлалай колледждо үнгэрбэ.

«Дүрбэн тэнгэри» гэһэн мүрысөөнэй нэрэ элитэ ирагуу найрагшын 75 жэлэй ойн баярта зорюулагдан нэрлэгдэжэ, һурагшадай, оюутадай ба уран бүлгэмүүдэй хоорондо уран уншалгаар урилдаан анха түрүүшынхиеэ 2007 ондо эмхидхэгдэһэн юм гэжэ һануулая.

Тус урилдаанай шухала зорилго – Н.Дамдиновай шүлэгүүдтэй танилсажа, бүтээлнүүдыень сээжээр уран гоёор уншаха, холо ойрын нютагуудтай харилсаагаа үргэдхэхэ, бэлигтэй залуушуулые элирүүлхэ мүн. Энэ хэмжээ ябуулгада һургуулиин һурагшад, оюутад болон уран бүлгэмүүд 5-тайһаа 23 болон дээшэ наһанай зон хоёр шэглэлээр хабаадаба. Ургажа ябаа үетэн ба томошуул уран уншалгаар бэлиг шадабарияа харуулба. Мүн хэлэ хүгжөөлгын, зүжэгшэнэй шадабари элирүүлгын мастер-классууд үнгэргэгдөө. 150 хабаадагшад эдэбхитэйгээр хабаадабад, эдэнэй дунда Буряад Уласай аймагуудай, Эрхүү можын болон Үбэр Байгалай хизаарай хабаадагшад байба. Энэ мүрысөөн хоёр үдэрэй туршада үнгэргэгдйөө юм.

Мэдээжэ шүлэгшэнэй, мүн өөрын зохёоһон бүтээл хабаадагшад уран гоёор зэдэлүүлжэ мэдэбэ. Урилдаанай түгэсхэлэй шата буряад хатараар нээгдээ. Энэ хэмжээ ябуулгада Соёлой сайдай орлогшо Николай Емонаков, Эд зөөриин болон газарай харилсаанай яаманай сайд Маргарита Магомедова, болбосоролой болон эрдэм ухаанай сайдай орлогшо Валерий Поздняков тайзан дээрэ гаража, һайхан шүлэгүүдые уран гоёор уншаха шадабаритай хэмжээ ябуулга үнгэргэгдэжэ байһанда омогорхолоо мэдүүлээ.

Энэ хэмжээ ябуулга гансашье регион хоорондын зэргэдэ бэшэ, мүн бүхэдэлхэйн хэмжээндэ ургахыень уряалнабди гэжэ тэдэ тэмдэглэжэ, өөһэдынгөө дуратай шүлэгүүдээ олоной урда уран гоёор уншаба. 54 шанда хүртэгшэд түгэсхэлэй тоглолтодо бэлиг шадабарияа харуулан, уран найруулгаа ганса гансаараа, бүлэг бүлэгөөрөө зохёомжын зураглал хэжэ, харагшадта дурадхаба. Бага балшар наһанһаа хойшо үхибүүд ирагуу һайхан хоолойтой, тайзан дээрэһээ талаан бэлигээ харагша бүхэндэ хүргэжэ шадаха шадабаритай болоно гэжэ тэмдэглэлтэй. Тэрэ олон үхибүүдэй болон томошуулайшье дунда, наһанайнь хэмжүүрээр ба шэглэлээр тон бэрхэшүүлыень, бэлигтэйшүүлыень элирүүлхын тула жюриин гэшүүдтэ бэрхэтэйл байгаа.

Тус мүрысөөн дүүрэжэ, дүнгүүдынь элирбэ. Түрүүн олон тоото урилдаанда хабаадалсаһанай түлөө үнэмшэлгэнүүдые барюулба. Номинаци бүхэндэ наһанайнь илгаагаар гурбан шатын лауреадууд мүнгэн бэлэгээр болон Арадай Хуралай һунгамалай Баир Гармаевай тусхай шангаар шагнагдаа. Мүн лэ Улаан-Үдэ хотын һунгамалнуудай зүблэлэй һунгамал Долгор Норбоевагай «Найдалга» гэһэн тусхай шанда Улаан-Үдэ хотын «Светлячок» сэсэрлигэй Руслан Балтаков болон Аха аймагай Хужар һууринай Сойжин Самбялова гэгшэд хүртэһэн байна.

«Н.Г. Дамдиновай зохёолыень эрхимээр гүйсэдхэһэнэй түлөө» гэһэн тусхай шан Байгал шадарай аймагай һурагша Арсений Яковлев абаба. «Илалта туйлахаяа шармайлга» гэһэн тусхай шанда Захааминай һурагша Номин Батуева хүртөө. «Эрхим найруулгын түлөө» гэһэн тусхай шан Улаан-Үдын Михей Ербановай нэрэмжэтэ Буряадай хүдөө ажахын колледжын оюутан абаа. Эгээл дээдэ шатын Гран-при шанда, мүнгэн бэлэгтэ, мүн депутат Баир Гармаевай тусхай шанда П.Т. Абашеевагай нэрэмжэтэ Буряадай хатарай колледжын оюутан Арюна Мункоева хүртэһэн байха юм.

Буряад орондо уран шүлэгтэ дуратайшуул олон. Энэ болбол багшанарай һайн ажалай дүн гэжэ тобшолмоор.