​Болбосоролой сайд болоо

Үнгэрэгшэ долоондо, октябриин 19-дэ, Буряад Уласай Толгой­логшо Алексей Цыденовэй зар­лигаар Баяр Жалсанов уласай болбосоролой болон эрдэм ухаанай сайдаар, Засагай газарай гэшүүнээр томилогдобо.

Уялга дүүргэжэ байгаа

Алдар Дамдиновай Гүрэнэй Дүүмын һунгамалаар һунгагдаһанай удаа жэлһээ үлүү болзорто Баяр Жалсанов сайдай уял­га дүүргэгшээр ажаллаад, тус тушаалдаа мүнөө хуулиин ёһоор уласай даргын тус­хай зарлигаар томилогдобо гээшэ. Үшөө урда тээнь сайдай орлогшоор 2014 онһоо ажаллаһан байха юм.

Хүн болохо багаһаа

Дүшэн хоёр наһатай Баяр Жалса­нов Агын Буряадай тойрогой Һүдэнтэ һайхан нютагта багшанарай бүлэдэ түрэһэн. Дунда һургуулиин һүүлдэ Буряа­дай гүрэнэй Доржо Банзаровай нэрэм­жэтэ дээдэ һургуулида һураад, буряад хэлэн болон уран зохёолой багшын мэр­гэжэлтэй болоһон юм. Тиигээд, уласай ниислэлдэ һуража байха үедөө гэрлээд, нютагаа бусажа, түрэл һургуулидаа баг­шалаа.

Арбан жэл шахуу – арадай һургуулиин жолоодо

Гэр бүлын шалтагаанаар Улаан-Үдэеэ нүүжэ ерээд, Буряадай гүрэнэй телерадиохамжаанда буряад хэлэн дээрэ дамжуулгануудые бэлдэдэг таһагта эрхилэгшээр, удаань Болбосоролой бо­лон эрдэм ухаанай яаманда хүтэлэгшэ мэргэжэлтээр хүдэлөө.

2005 ондо Буряадай Уласай үндэһэтэнэй нэгэдэхи лицей-интернадай за­хиралаар арбан жэл шахуу амжалта түгэс ажаллахадаа, уласаймнай урдаа хараха һургуулиие алиншье талаһаань урагшань татаа, нэрэ хүндыень бүри дээшэнь үргэжэ шадаа. Тамирта дура­тай бэлигтэй бэрхэ үхибүүдые һорин хүмүүжүүлхэ томо байшан хубиин мүнгөөр барюулаа, һурагшадай зундаа амардаг газарташье ехэ ажал ябуулаа.

«Зохолһон газараа маажангүй», зүрхэтэй ябаха хэрэгтэй гү?

Һүүлэй үедэ Баяр Жалсанов тухай эл­дэб эсын хоб-жэб, худал хуурмаг юумэн олондо мэдээсэл тараадаг хэрэгсэлнүүдтэ нэгэнтэ бэшэ толилогдоһон байна. Мууда дуратайшуул тэрэниие уншажархёод, бу­лан сохойгоор шэбир-һабир гэлдэхэ юм. Дотоодын хэрэгүүдэй яаманай даргын гар табилгатай дансын сагаан саарһан дээ­рэ хара бэхээр “Зэмэгүй!” гэжэ бэшээтэйшье байхые хараад, зарим нэгэнэй һанаан амарнагүй хэбэртэй.

Хэды тиигэбэшье, хара сагаан хоё­рые, үнэн худал гэхэ мэтые илгаха хүсэн байдаг юм бэзэ алтан энэ дэлхэй дээрэ, дээдэ замбидашье бурхад? Хүн бүхэнэй хэһэн, үйлэдэһэн буян, нүгэлэйнь хэм­жээн хэзээ нэгэтэ хэмжэгдэдэг юм бэзэ? Зэмэгүй хүнэй үнэн сэхэ нэрые шабар­тай шалбааг руу хэжэрхёод, ямаршье хэһээлтэгүйгөөр ябаха бэшээшэдэй саг болонхой юм гү али?

Теэд Баяр Жалсанов «зохолһон газа­раа маажангүй», зүрхэтэй, шанга ябана гэжэ хажуу талаһаа харагдана. Энэ зүб. Харин сайдай сэдьхэлдэ юун боложо, ямар бодолнуудай тэрэниие тамалжа байһые хэн мэдэнэб?

Анна Огороднигой гэрэл зураг