Самбо
Москва. Ородой ниислэл хотын чемпионадта Буряадай мэдээжэ тамиршан Вадим Бусеев амжалтатайгаар хабаадаба.
Дайшалхы самбо барилдаагаар Вадим Бусеев 68 килограмм хүрэтэр шэгнүүртэ хабаадахадаа, ганса финалда шүүгдээ. Тиигэжэ тэрэ хоёрдохи шангай һуурида гаража, Ородой чемпионадта хабаадаха эрхэдэ хүртэбэ.
Вадим Бусеев хадаа Москва хотодо ажаһууна, самбо барилдаанһаа гадна гуримгүй тулалдаануудта хабаададаг.
Вадим Бусеев
Дзюдо
Абакан. Буряадай хоёр тамиршан Сибириин федеральна тойрогой чемпионадта шалгаржа, Ородой чемпионадта хабаадахань.
18 наһа хүрөөдүй тамиршадай дунда тулалдаануудта Александра Ковалёва алтан медаль абаба. Шангай гурбадахи һуурида Александра Андреева гараа.
Ородой чемпионат Эрхүү хотодо болохоор хараалагдана.
Тхэквондо (ИТФ).
Новосибирск. Аяар 30 медальтайгаар Буряадай тамиршад Сибириин ниислэлһээ бусаба.
Эдэ үдэрнүүдтэ Новосибирск хотодо хоёр мүрысөөн болоһон байна. Нэн түрүүн “Сибириин Кубок” гэһэн нэрэтэй уласхоорондын мүрысөөн заншалта ёһоороо эмхидхэгдээ. Хажуугаарнь оюутадай дунда Ородой чемпионат болоо. Шанга тулалдаануудта бүхы дээрээ 780 хүн хабаадаа. Манай Буряадай тамиршад тэндэ долоо дахин чемпионууд боложо тодороо. Үшөө тиихэдэ 7 мүнгэн, 16 хүрэл медальнуудта хүртөө.
Ноябриин эхиндэ болохо Ородой Кубогта хабаадахаяа Буряадай тамиршад бэлдэжэ байнхай. Тус мүрысөөн Екатеринбург хотодо болохоор хараалагдана.
Шатар
Эрхүү. Эдир шатаршадай дунда “Кубок вундеркинда” гэһэн хуралдаанда 8 наһа хүрөөдүй 55 хүн хабаадаһан байна.
Тус мүрысөөндэ Буряадай мэдээжэ шатаршан, эхэнэрнүүдэй дунда ори ганса уласхоорондын гроссмейстер Инна Ивахиновагай шабинар амжалта туйлаба.
2011 оной шатаршадай дунда Кирилл Молоткин чемпионой нэрэ зэргэдэ хүртөө. 2010 оной басагадай дунда Алина Гаврилова түрүү һуурида гараа. Мүнгэн медаль 6 наһатай Алдар Богданов абажа шадаа.
Бокс
Эйдховен (Нидерланды). Мухар- Шэбэр аймагһаа уг гарбалтай, мүнөө үедэ Москва хотодо һуралсалаа үргэлжэлүүлжэ байһан Дарима Сандакова уласхоорондын мүрысөөндэ хабаадаһан байна.
“Eindhoven Box Cup” гэһэн мүрысөөндэ манай нютагай басаган 75 килограмм хүрэтэр шэгнүүртэ шаасалдаад, шангай гурбадахи һуури эзэлээ.