Октябриин 21-дэ Арадай уран бэлигэй улас түрын түб олон тоото нүхэдэйнгөө ба харагшадайнгаа дүхэриг соо шэнэ байшанда ороһон ушараар толлолго үнгэргөө. Буряад ёһо заншалаар, ехэ удха шанартай баяраараа хүн зонтой хубаалдадаг ха юм даа. Тиин Арадай уран бэлигэй улас түрын түб үдэрэй 13 сагта шэнэ байшандаа үнэн нүхэдөө, холо ойрын айлшадаа угтан абаад, 15 сагта ФСК соо аргагүй ехэ тоглолто үнгэргөө.
Уласаймнай эгээл түрүүшын соёлой эмхи болодог Арадай уран бэлигэй улас түрын түб аяар 1929 ондо байгуулагдаһан юм. Энэ ехэ хугасаа соо хэһэн ажалынь, Буряад ороной арадуудай соёл хүгжөөлгэдэ оруулһан хубитань одоол сэгнэшэгүй ааб даа. Уласаймнай урдаа хараха дуушад болон хатаршадай олонхинойнь одото зам эндэһээл эхитэй. Тиимэһээ айлшадшье олон байһаниинь гайхалгүй.
Шэнэ байшандаа айлшадые угтан абаа
Үдэрэй 13 сагта уран бэлигэй түб шэнэ байшангайнгаа үүдэ сэлижэ, уласай засаг зургаануудые түлөөлжэ бууһан үндэр айлшадые, Буряад ороной аймагуудһаа зорижо ерэһэн үнэн нүхэдөө угтажа, һаруул, уужам ордоноо харуулаа. Тус эмхи 1974 онһоо хойшо Красногвардейская гудамжын 32-дохи байшан соо байрладаг һэн гэжэ һануулая. Харин мүнөө Смолиной гудамжада оршодог тамирай һургуулиин (РСДЮШОР) хуушан-шэнэ байшанда нүүбэ гээшэ: тус байшан һэльбэн шэнэлхэ хэрэгтэ уласай һанһаа 24 хахад сая түхэриг гаргашалагдаа. Тиигэжэ хуушан байшан мүнөө газаа досооһооньшье танихаар бэшэ гоё болонхой.
Эндэ һаруул кабинедүүд, хүгжэм дуу миндаһан дээрэ бэшэхэ студи, хатарай хоёр танхим хубсаһа хадагалдаг таһалгануудтаяа ба душевойнуудтаяа, хубсаһа оёдог ба хатар нааданда хэрэглэдэг зүйлнүүдые бүтээхэ мастерскойнууд, конференц-танхим гээд олон таһалганууд бии. Бүхыдөө байшанай талмай - мянга гаран дүрбэлжэн метр. Тиимэһээ Арадай уран бэлигэй уласай түбэй хүдэлмэрилэгшэдэй Буряадайнгай бүхы арадуудай соёл хүгжөөхэ талаар ажал хэрэгүүдынь бүри урагшатай болохонь дамжаггүй.
Минии ошоходо, юрын лэ ажалай үдэр шэнги хүлгөөтэй, хүн зон олон байгаа: хатар дуунда һурахаяа ерэһэн хүүгэд репетицинүүдээ хэжэ байгаа, коридор соогуур гэртэхин һандалинууд дээрэ һуугаа. Тиин тэдэнтэй хэды үгөөр андалдажа, һанамжануудыень асуугааб.
Алёна Бадмаева, 6 наһатай, Улаан-Үдын 25- дахи һургуулиин 1-дэхи ангиин һурагша, хатарай «Булжамуур» ансамблиин бэлэдхэлэй бүлэгэй гэшүүн: «Би түрүүшынгээ жэл эндэ ябанаб. Намда эндэ гоё байна. Хатарха ехэ дуратайб. Томо болоходоо, хатаршан болохоёо һананаб».
Алёнын эжы Наталья Михайловнагай тэмдэглэһээр, үхибүүд һарын 3000 түхэриг түлэжэ, долоон хоногой гурба дахин хатарта ябадаг. Басагаяа иишэнь үгэһэндөө ехэ олзуурхана: урин налгай, зохид багшанар заадаг, олон юумэндэ һургадаг.
Алёнатай суг хамта 5-6 наһатай үшөө гушаад хүүгэд бэлэдхэлэй бүлэгтэ ябадаг. Багшань – Алексей Станиславович Цыремпилов. Тэрэ эндэ дүрбэдэхи жэлээ хүдэлнэ.
«Тон шухалань гэхэдэ, болбосон түхэлтэй шэнэ байшан соо үхибүүдтэл амар болоо. Уужам һаруул танхим соо хатархадашье гоё юм ааб даа. Багшанарташье хүдэлхэдэ урматай. Хубсаһаа һэлгэдэг таһалганууд ехэ тааруугаар зохёогдонхой. Шэнэ тоног түхеэрэлгэнүүд бии. Энэ байшанда ороһондоо булта баяртайбди», - гэжэ Алексей Станиславович хэлээ.
Альмира Цырендоржиевна Гуруева хатарай «Лотос» ансамблиин дунда бүлэгэй хүүгэдэй багша юм. Мүнөө 15 басагадта хатар заана. Шабинарынь гурбадахи жэлээ хатарта һуража байгаа хадаа яһала тайзан дээрэ гаража үзэһэн, мүрысөөнүүдтэ хабаададаг болонги, ерэхэ хабар Монголдо үнгэргэгдэхэ ээлжээтэ мүрысөөндөө бэлдэлгэ түлэг дундаа.
Хатарай «Лотос» ансамблиин дунда бүлэгэй эдир хатаршад шэнэ байшан соогоо репетициеэ хэжэ байна
Альмира Гуруевагай гэрэл зураг
Шабинарынь хуушан байшан соо нилээд даарадаг байгаа ха. Юуб гэбэл, шэнэ байшантнай ямар бэ гэхэдэ, булта шахуу дулаан гэжэ абаһаар харюусаа.
Валерия Сунграпова, Улаан-Үдын 47-дохи һургуулиин 6-дахи «в» ангиин һурагша: «Хуушан байшан соо хүйтэн, харанхы шэнги, станогууд эбдэрхэй байдаг һэн. Эндэ дулаахан, уужам, хамаг юумэн шэнэ, гоё».
Юлия Алексеева, Улаан- Үдын 49-дэхи һургуулиин 3-дахи «г» ангиин һурагша: «Эндэ ябахада ехэ гоё. Бидэ уйгур, солонгос хатарнуудые сээжэлдэнхэйбди. Мүнөө монгол, мүнөө үеын болон «Бадма лёнхобо сэсэг» гэһэн хатар сээжэлдэжэ байнабди».
Сабина Ли, Улаан-Үдын 9-дэхи һургуулиин 4-дэхи «в» ангиин һурагша: «Би хатарха ехэ дуратайб. Эндэ гоё болоо. Түрүүшымнай амжалта - бидэ Оперо болон баледэй театр соо мүрысөөндэ хабаадаад, һуури эзэлээшьегүй һаа, 7000 түхэриг шанда хүртөөбди. Хабартаа Монгол ошохобди. Тэндэ шүүхэеэ оролдохобди».
Алина Аганаева, Улаан- Үдын 57-дохи һургуулиин 3-дахи «б» ангиин һурагша: «Эндэ дулаахан, даарахаяа болёобди. Хатарай танхим уужам, һаруул. Хубсаһаа һэл- гэхэдэ, амар болоо. Багшамнай һайн даа, гоёор заадаг, хараадаггүй. Би томо болоходоо, эдихэ юумэ амтатайгаар шанажа һураад, ресторан нээхэб. Тиигэбэшье хатаржал ябахаб».
Зүб даа. Эдэ хүүгэд булта саашадаа урлалтай хуби заяагаа холбоошьегүй һаа, эндэ шадаха, мэдэхэ болоһон юумэеэ бүхы наһандаа хэрэглэжэ, һанажа ябахал даа. Ииигээд харахада, Арадай уран бэлигэй улас түрын түб нилээд удха шанартай ажал ябуулна.
ФСК соохи гранд-тоглолто
Арадай уран бэлигэй улас түрын түбэйхид һайндэрөө үнэхөөрөөшье арадай болгожо шадаа. Тэрэ ехэ ФСК соо сүлөө һуури үгы шахуу байгаа. Үндэр айлшадһаа Арадай Хуралай Үндэһэ яһатануудай хоорондын харилсаануудай хорооной түрүүлэгшэ Цыденжап Батуев, Соёлой яаманай зүгһөө сайдай орлогшо Наталья Светозарова, мүн тиихэдэ Хэжэнгэ аймагай захиргаанай засаг дарга Геннадий Лхасаранов түрүүтэй нютаг газарнуудай аймагуудай толгойлогшонор, аймагуудай соёлой таһагуудай дарганар, соёлой һуралсалай эмхинүүдэй түлөөлэгшэд байгаа.
- Һоёдуудай, эвенкнүүдэй, шэмээшэгүүдэй, буряадуудай, ородуудай болон Буряад ороноймнай олон тоото арадуудай соёл, яһатан бүхэнэй онсолиг хамгаалан хүгжөөхэ, яһатанууд хоорондын хани нүхэсэл бэхижүүлхэ хэрэгтэ Арадай уран бэлигэй улас түрын түб сэгнэшэгүй хубитаяа оруулна, - гэжэ Цыденжап Батуев амаршалгынгаа үгэ соо тэмдэглээ. – Энэ түбэй нэрэнь эды олон жэлнүүдтэ хубилаашье һаа, хүдэлмэрилэгшэдэйнь үндэр үүргэ тэрэл зандаа үлэһэниинь һайшаалтай.
Мүнөө үедэ тус эмхиие амжалта түгэс хүтэлбэрилжэ байһан Жаргалма Анзановна Архинчеева, мүн тиихэдэ олон жэлдэ, тэрэ тоодо хүндэ хүшэр ерээд онуудта хүтэлбэрилһэн Надежда Галсановна Донсоронова амаршалгануудые тогтоожо абаа.
Жаргалма Анзановна Архинчеева амаршалгануудые тогтоон абана
Аймагуудай соёлой таһагуудай дарганар, соёлой эмхи зургаануудай хүтэлбэрилэгшэд амаршалжа байна
Толлолгодо заал һаа бэлэгтэй ерэдэг гээшэ ааб даа. Тиин мүнгэншье бэлэгүүд элбэгээр ороо, хэжэнгээрхинһээ дун сагаан хониншье бэлэгүүд ороо. Харин энэ тоглолтодо хабаадаһан Буряадай одод – Чингис Раднаев, Валико Гаспарян, Мэдэгма Доржиева, Бадма-Ханда Аюшеева, Зоригто ба Нонна Тогочиевтан, Намхайн Мунхзул болон бусад дуушад дуунайнгаа дээжые түрэл түбтөө бэлэглээ. Эдэнэй олонхинь хэзээб даа нэгэтэ одото замайнгаа түрүүшын алхамуудые энэ эмхиин эмхидхэдэг «Наранай туяа», «Алтан гургалдай», «Сагаан һара» гэхэ мэтын мүрысөөнүүдһээ эхилһэн юм. Энээн тухай ехэ дулааханаар Зоригто Тогочиев хэлээд, уран гартай, үнэхөөрөөшье хатан мэтэ Ноннынгоо оёһон найман буряад хубсаһа хатарай «Булжамуур» бүлэгтэ бэлэглээ.
Гүн сэдьхэлһээ дууладаг ба онсо һайхан хоолойтой Чингис Раднаев
Мэдэгма Доржиева "Басаганай дуу" сэдьхэл хүдэлгэмөөр гүйсэдхөө
Бадма-Ханда Аюшеева түрүүшынгээ алхамуудые Уран бэлигэй түбэй эмхидхэдэг мүрысөөнүүдһээ эхилээ юм
Буряад эстрадын одод "Сагаан һара» мүрысөөнэй гимн дуулажа байна
Тиихэдэ уласаймнай бүхы шахуу хатарай бүлэгүүд баһал энэ түбтэй холбоотой. Тэдэ гоё хатарнуудаа гүйсэдхэжэ, харагшадай нюдэ хужарлуулаа. Мүн КВН-эй «Хара морин» гэһэн уласай суглуулагдамал команда энэ һайндэртэ зорюулһан энеэдэ наада дэлгээ юм. Тиигэжэ хоёр үлүүтэй сагай туршада харагшад «гранд» гэжэ нэрэдээ хүрэмэ ехэ гэгшын тоглолто хаража, сэдьхэлээ ханаа.
Арадай уран бэлигэй улас түрын түбэй арадай хатарай жэшээтэ «Булжамуур» ансамбль
Арадай хүгжэмэй ба хатарай «Забава» театр
"Квартал-Дэнс" хатарай бүлэг
КВН-эй «Хара морин» команда
Хатарай бүлэгүүдэй хамтын хатар
Сергей Тарасенкын гэрэл зурагууд
Арадай уран бэлигэй улас түрын түбэйхидые шэнэ байшанда ороһон ушараарнь «Буряад үнэн» сониной хүдэлмэрилэгшэдэй ба уншагшадай зүгһөө халуунаар амаршалаад, саашанхи ажалдань амжалтануудые хүсэе.