764
Мүнөөдэр, октябриин 26-да, Улаан-Үдэдэ «Буряад уласай хүгжэхын тула эрхэтэдэй эдэбхи болон харюусалга» гэһэн эрхэтэдэй бага хурал ажалаа эхилбэ. Энэ хэмжээ ябуулга Буряад Уласай Олониитын танхим эмхидхэнэ. Мүнөө үеын ниигэм доторхи шиидхэхэ асуудалнуудаар бага хуралай хэмжээндэ ажалай хэдэн талмайнууд эмхидхэгдэхэ.
«Олониитын болон засаг зургаануудай суг хамта абаһан шиидхэбэринүүдые хэлсэхэ, абаха, бэелүүлхэ хэрэгтэ олониитын эдэбхитэй хүнүүдые хабаадуулха зорилготой форум үнгэргэгдэнэ», - гэжэ Буряад Уласай Олониитын танхимай түрүүлэгшэ Баир Балжиров тэмдэглэбэ. Тэрэнэй хэлэһээр, һүүлэй жэлнүүдтэ олониитын хабаадалгатайгаар ажаһуугшадта хабаатай ажабайдалай шухала асуудалнууд шиидхэгдэнэ.
Бага хуралда бэлэдхэлэй үедэ олон хэмжээ ябуулганууд, тэрэнэй тоодо дүхэриг шэрээ үнгэргэгдэһэн байна. Дүхэриг шэрээдэ «Ажал. Ажалай заншал, ажалаар хүмүүжүүлгэ, ажалай дүй дүршэл» болон «Ажал болон амжалта» гэһэн сэдэбүүдээр хэлсэгдээ.
Форумой үедэ олон асуудалнуудаар зүбшэхэ. Тэдэнэй тоодо, Буряад Уласай Олониитын танхимай эдэй засагай хүгжэлтын болон гэр байрын ажахын талаар комиссиин хинан шалгаһан Буряад Уласай эдэй засагай хүгжэлтын холын хараата түсэбүүд болон эдэй засагай хүгжэлтын арга боломжонууд гэһэн асуудалаар хэлсэхэ.
«Һүүлэй жэлнүүдтэ олон алдуунууд гаража, эдэй засагай хүгжэлтын холын хараата программа мүнөөшье болотор абтаагүй. Тиимэһээ мүнөө абтагдаха холын хараата түсэбүүдтэ «Уласай эдэй засагай хүгжэлтэ» гэһэн бүлэг оруулха зорилготойбди, - гэжэ комиссиин түрүүлэгшэ Татьяна Думнова хэлэбэ.
Холын хараата түсэбүүдтэ ерээдүй тухай хэлэгдэнэ, тиигэбэшье оршон байдалай асуудалнуудые шиидхэхэ шухала. Нэрлэбэл, ажаһуугшад яажа уласай эдэй засагай ажаябуулгада хабааданаб, тэдэнэр һайн ажалтай гү, һайн салин абана гү, харин эгээл шухалань хадаа һайн салинтай ажал бэдэржэ, ондоо можо нютагууд гү, али гүрэнүүдтэ зөөжэ ошохогүй гэхэ мэтэ.
Улас дотор салингай дунда хэмжээниинь 30 мянган түхэриг һаа, ажаһуугшадай 64 хубинайнаь салин 8-һаа 15 мянга хүрэтэр гэжэ Татьяна Думнова хэлэнэ. Тиимэһээ ажалай заншал һэргээхэ, уластаа ажалшадые бэлдэхэ һалбари хүгжөөхэ гээшэ мүнөө дээрээ гол зорилго болоно.
Татьяна Думновагай хүтэлбэрилһэн комиссиин хинан шалгаһан гэр байрын ажахын асуудалнууд баһал шиидхэхэ асуудалнуудай нэгэн.
Бага хуралай үедэ «Хүнэй эрхэ болон байгаали хамгаалга: Байгал далай бузарлангүй, яажа ажаһуухаб» гэһэн талмай эмхидхэгдэхэ.
«Ородой Холбоото Уласай Үндэһэн хуулиин 2 дугаар статьягай эрилтэнүүдтэ зүрюулэн гүрэн дотор хүнэй эрхэ сүлөө эгээл сэнтэй гэжэ соносхогдонхой, тиихэдэ федеральна хэмжээндэ хүнэй ажабайдалда олон хорюул болон хизарлаалга абтанхай. Буряад Уласай засаг зургаан, нютагай засагай байгууламжанууд тэрэ хорюул, хизаарлалга бага болгохо талаар ажал ябуулаашье һаань, тэрэнь ехэ аша үрэгүй», - гэжэ Буряад Уласай Олониитын танхимай түрүүлэгшын нэгэдэхи орлогшо Валерий Яковлев хэлэбэ.
Тиимэһээ Олониитын танхим засаг зургаантай хамта асуудалнуудые шиидхэхэ резолюци бэлдэһэн байна.
«Эдэ асуудалнуудые шиидхэхээр», - гэжэ Валерий Яковлев тэмдэглэбэ.
Эрхэтэдэй бага хуралай үедэ Буряад Уласай Толгойлогшо Алексей Цыденов, Буряад Уласай Арадай Хуралай Түрүүлэгшэ Цырен-Даша Доржиев, Ородой Холбоото Уласай Юрэнхылэгшын Сибириин федеральна тойрогто бүрин эрхэтэ түлөөлэлгын аппарадай федеральна ахамад хинан харагша Сергей Ромахин болон Үбэр Байгалай хизаарай, Татарстан, Саха (Яхад) уласуудай түлөөлэгшэдэй хабаадалгатай пленарна суглаан үнгэрхэ.
