667
Буряад Уласай Арадай Хуралай ээлжээтэ сессидэ Гүрэнэй шагналнуудые барюулхадаа, мүнгөөр урмашуулалгын асуудалаар һунгамалнууд тоосолдобо.
Гүрэнэй шагнал барюулхадаа, мүнгэн шан табан хубяар бага болгохо гэһэн хуули сессиин үедэ дурадхагдаһан байна. Буряад Уласай Толгойлогшын захиргаанай түрүүлэгшын уялга дүүргэгшын хэлэһэнэй ёһоор, энэ асуудал Ородой Холбоото Уласай Мүнгэн һангай яамантай хэлсэгдэнхэй, тиихэдэ 900 сая түхэриг алмагдаха.
Буряад Уласай «Уласай гүрэнэй шагналнууд тухай» гэһэн хуулиин 4.1 статьяда хубилалта оруулха тухай Станислав Тэлин дурадхаба. Тэрэнэй ёһоор, 2018 оной январиин 1-һээ хойшо гүрэнэй шагналда хүртэһэн хүнүүдтэ барюулагдадаг мүнгэн шан 5 хубяар болгохо. Тиихэдэ Ородой Холбоото Уласай Мүнгэн һангай яаман, Буряад Уласай Толгойлогшо энээн тухай тогтоол абаһан байха юм. Энэ асуудалаар һунгамалнууд тоосолдобо. Мүнгэн шангай орондо улас юу дурадхаха байнаб гэжэ Виктор Аюшеев асууба. Мүнгэн урмашуулга эндэ һаалта хэхэгүй ааб даа, теэд уласта 900 сая түхэриг алмагдаха гэжэ Станислав Тэлин харюусаба.
- Хуулиин ёһоор, гүрэнэй шагналнууд тухай асуудалнууд уласай хэмжээндэ шиидхэгдэхэ гэжэ хэлэгдэнэ,- гэжэ һунгамал Игорь Михайлов хэлэбэ.
Энэ асуудал бэлэн бэшэ гэжэ Станислав Тэлин дахин тэмдэглэбэ. Тиигэбэшье мүнгэн тэдхэмжэ табан хубяар бага болгоогүй һаа, Ород гүрэнэй Мүнгэн һангай яамантай баталагдаһан хэлсээн эбдэгдэхэ болоно.
- Уласай бюджетһээ бага болгогдоһон табан хүсэлдүүлэгдэхэ аргатай гү ? Ородой Холбоото Уласай Мүнгэн һангай яаманай мүнгэ гаргашалха эрхэгүй хадаа, өөдөө энэ мүнгэ оложо шадахаарбди. Ажаһуугшадаа гомдоохо... 2017 ондо мүнгэн шан абажа байгаад, 2018 ондо абахаяа болихо. Энээниие яажа ойлгохоб? - гэжэ һунгамал Леонид Селивёрстов
Буряад Уласай Толгойлогшын уялга дүүргэгшэ Игорь Шутенков эрхэ хуулиин талаар хорооной түлөөлэгшэдые энэ асуудал тайлбарилжа үгыт гэжэ хэлэбэ. Ородой Холбоото Уласай бюджедэй кодексын ёһоор, мүнгэн тэдхэмжэ абажа байдаг можо нютагууд федеральна түбһөө һомологдоһон мүнгөөр иимэ мүнгэн урмашуулгануудые үгэхэ ёһогүй гэжэ хуулиин хорооной түлөөлэгшэ хэлэбэ.
- Энэ хуули абаагүй һаа, Ородой Холбоото Уласай тогтоол болон Мүнгэн һангай яамантай хэлсээн эбдэхэ болонобди, - гэжэ Засагай газарай хороондо хэлэбэ.
Энэ асуудал Буряад Уласай бүрин эрхэ болоно, энэ хуули абаха хэрэггүй гэжэ Иннокентий Егоров тэмдэглэбэ.
Тус хуули мүнөө уншалгада абаагүй һаа, Алексей Цыденовые «дэгээдэһэн» болохобди гэжэ Леонид Белых хэлэбэ.
Энэ асуудалаар һунгамалнууд арсалдажа, тэдэнэй 30-ниинь энэ хуули абаха тухай дуугаа үгэһэн байна. Дурадхаһан хуулиин дутуу дунданууд хоёрдохи уншалга болотор усадхагдаха гэжэ Буряад Уласай Арадай Хуралай түрүүлэгшын һунгамалнуудта хандаба.
- Энэ хуули түрүүшын уншалгада абаха дурадхал оруулнаб. Габьяата хүдэлмэрилэгшэдтэ мүнгэн түлэхэеэ болиходомнай, саашадаа олимпиин наадануудта илагшаднай яаха юм гэжэ һунгамалнууд һанаата болохонь ойлгосотой, - Цырен-Даша Доржиев хэлэбэ.
Һүүлээрнь энэ хуулиин түлөө 47 һунгамалнууд дуугаа үгэбэ.
