Мүнөөдэр, ноябриин 2-то, Буряад Уласай Арадай Хуралай ээлжээтэ сессидэ Мүнгэн һангай сайдай уялга дүүргэгшэ Всеволод Мухин «2018 оной болон 2019-2020 онуудай түсэблэлгын болзорой уласай бюджет тухай» гэһэн хуулиин түсэл дурадхаба.
Энэ түсэлдэ хүүгэдэй «Кванториум» технопарк байгуулгада болон хубиин хүүгэдэй сэсэрлигүүдтэ 37,6 сая түхэриг мүнгэн тэдхэмжэ хараалагданхай.
Засагай газар хубиин хүүгэдэй сэсэрлигүүдые дэмжэхээр бэлэн гэжэ Буряад Уласай Толгойлогшо Алексей Цыденовэй хэлэһэн тухай һануулнабди.
«Аймагуудаар ябаха үедэ, олон асуудалнууд ороһон байна. Тэдэнэй зариманиинь шиидхэгдээ, нүгөө зариманиинь шиидхэгдэжэ байна. Нэрлэбэл, зайн галай түлөө түлбэриин сэн, авиа дамжуулга олоной хэрэглэхээр гэхэ мэтэ. Харгы барилгын асуудалнуудые дахин хаража үзэхэбди. Тиихэдэ Засагай газар хубиин хүүгэдэй сэсэрлигүүдые дэмжэхэ тухай шиидхэбэри абаһан байна. Лицензитэй хубиин хүүгэдэй сэсэрлигүүдтэ үхибүүн бүхэнэй түлөө 5800 түхэриг, харин үхибүүдтэ хэшээл заадаггүй, миин хараад байдаг хүүгэдэй сэсэрлигүүдтэ үхибүүн бүхэнэй түлөө 3000 түхэриг түлэгдэхэ гэһэн шиидхэбэри абтаа», - гэжэ Алексей Цыденов хэлэһэн байна.
- Улас дотор шэнэ юумэ зохёон нэбтэрүүлгын залуушуулай дүрбэн түб нээгдээ. Энэ түбтэ оюутад болон ахалагша классуудай үхибүүд хабаадаха. Тиихэдэ һурагшадай кванториум нээхэ түсэл байгуулха гэһэн шиидхэбэри абтаа. Һурагшад бага наһанһаа шэнэ юумэ зохёон нэбтэрүүлхэ эрдэм мэдэсэтэй болохо, - гэжэ Буряад Уласай Засагай газарай Түрүүлэгшын орлогшо Игорь Зураев урид хэлэһэ байха юм.
Буряад уласта шэнэ юумэ нэбтэрүүлгэ дэмжэхэ зорилготой хүүгэдэй технопарк байгуулагдана.
Үхибүүдтэ болбосон түхэлтэй оршон байгуулха талаар һанаата болоһон Леонид Селиверстов Кабанск аймагай Клюевка тосхондо һургуули барилга тухай асуудал табиба.
- 2108 оной бюджедтэ энэ барилга оруулагданхай гэжэ мэдэхэ һанаатайбди? Хитадай компанинууд аймагта газар худалдажа абаад, ууха уһа үйлэдбэрилхэ олзын хэрэг эрхилэгшэд энэ барилгада мүнгэ һомолхо гэжэ маанадта хэлэнэ. Али бюджетһээ мүнгэн гаргашалагдаха гү? – гэжэ һунгамал асууба.
Буряад Уласай Болбосоролой болон эрдэм ухаанай яаманда ээнэ асуудалаар зохихо даабари үгтэнхэй, хоёрдохи уншалгада тэдэнэр шиидхэбэринүүдые дурадхаха гэжэ Всеволод Мухин харюусаба.
Болбосоролой һалбарида мүнгэ һомололго үрэ дүнтэй байха ёһотой. Мүнөө сагта болбосоролой шанар мууданхай, илангаяа техническэ мэргэжэлнүүдээр гэжэ һунгамал Леонид Белых тэмдэглэбэ.
- Болбосоролой һалбарида мүнгэн һомологдоно. Оршон байдалда техническэ шэглэлэй ехэ һургуулинуудай 27 хүнэй 8-9-ниинь лэ дүүргэнэ. Юундэб гэхэдэ, тэндэ ехэнхидээ соёл түүхын эрдэмүүд заагдана. Мэргэжэлтэниие олохонь хэсүү, - гэжэ тэрэ хэлэбэ.
Буряад Уласай Засагай газарта болбосоролой шанар дээшэлүүлхэ талаар зорилго табигданхай гэжэ Мүнгэн һангай сайдай уялга дүргэгшэ хэлэбэ.
Бюджетдэ табариин мүнгэнэй бага болоһон тоонуудаар һунгамалнууд һанаата болобо.
- Юундэ татабариин мүнгэн гансата бага болооб? Татабариин бааза ехэ болгохо, олзын хэрэг эрхилэлгэ, үйлэдбэри хүгжэхын тула ямар ажал хэнэбди? – гэжэ Леонид Белых асууба.
Бюджедтэ орохо татабари түсэблэхэдөө, яаман гол татабари түлэгшэдтэ үндэһэлнэ гэжэ Всеволод Мухин хэлэбэ. Тиигэбэшье түсэбүүд үшөө тобшологдоно гэжэ яаманай хүтэлбэрилэгшэ тэмдэглэбэ. Тиихэдэ
2018 ондо акцизуудай татабари яахадаа, 70 хубяар доошолхо болооб гэжэ Анатолий Кушнарёв һонирхобо.
Эдэ түсэблэһэн тоонууд федеральна һангай албанһаа дамжуулагдадаг, тэдэниие уласта тоолодоггүй гэжэ Всеволод Мухин тайлбарилба.