Баргажан голой бүхэшүүлэй хүндэ соло улам саашань үргэдхэжэ ябалсаһан мүнөө үеын залуу һүрэгтэнэй дунда бүхэ барилдааша басаган Ирина Ологоновагай амжалтануудые дурдангүй байхада яалай.
Хүдөөгэй юрын лэ ажалша бүлэдэ табан хүбүүдэй хойно удаан хүлеэгдэһэн басаган үри түрэжэ, эхэ эсэгэеэ баярлуулһан байха.
2002 ондо түрэл Баянголойнгоо һургуулида һуража байхадань, хани басаган Светань барилдаанай бүлгэмдэ суг оролсохыень дурадхаа бэлэй. Хани басаганиинь эндэ үни удаан ябангүй, барилдаанда һониёо бууража, тэрэнээ орхихо баатай болоо. Харин Ирина соёлой байшанда зүжэг нааданда эдэбхитэйгээр хабаададагшье һаа, барилдаанай оньһо, онол дүрэ абажа, энэ хэрэгтэ бүхы һаналаараа оролсошоо бэлэй. Табан аханарыншье баһал барилдаанай амта үзэһэн.
Баянгол тосхон гэхэдэ, нэн түрүүн сүлөөтэ бүхэ барилдаагаар Буряад ороной эгээл түрүүшын дэлхэйн чемпионБорис Будаевай, буряад барилдаагаар хэдэн дахин абарга бүхэ болоһон Баир Цыреновэй нэрэнүүд һанаанда абтана гүб даа. Мүн тиихэдэ энэ багахан нютагһаа 5 Социалис Ажалай Геройнууд гараһан байха.
8-9-дэхи классуудта һуража байхадаа, түрүүшынгээ амжалтануудые туйлажа эхилээ. Үндэһэтэнэй суглуулагдамал командада 16 наһатайдаа ороо. Юниорнуудай дунда Ородой Холбооной чемпионадта 2010 ондо Пермь хотодо эгээл түрүүшынхиеэ дээдэ шатын медальда хүртэһэн габьяатай. Тэрэл жэлдэ ехэшүүлэй бүлгэмдэ оролсожо, мүнгэн медальда хүртөө. Улам саашаа эршэдэжэ, Ородой Холбооной чемпионадта шүүжэ, алтан медаляар шагнагдаа.
Харатайнь гэхэдэ, гэмэлтэһэнэй шалтагаанаар Лондондо үнгэрһэн Олимпиин наадануудта хабаадажа шадаагүй. Хүлдөө операци хүүлэжэ, 2013 ондо һорилгоёо хэжэ эхилһэн байна. Санкт-Петербург хотодо хүрэл медальда хүртөө. 2014 ондо Ородой Холбоото Уласай тэмсээндэ, Новочебоксарск хотодо дахинаа ехэ амжалта туйлаба. Европын чемпионадта Финляндиин Вантаа хотодо хүрэл медальда хүртөө. 2014 ондо дэлхэйн чемпионадта хабаадажа, финалда япон барилдаашан Тихо Хамадада шүүгдэжэ, хоёрдохи һуури эзэлһэн байна. Мүн баһа энэ жэл Дэлхэйн Кубогташье хабаадажа, мүнгэн медаль шүүгээ, Европын яһатануудай Кубогташье анха түрүүшынхиеэ хабаадажа, ялас гэмэ илалта туйлаһан юм.
2015 оной апрель һарада Кемерово хотодо гурбадахияа Россиин чемпион болобо. Энэл жэлдэ дэлхэйн чемпионадта, США-гай Лас-Вегас хотодо американ яһанай дүршэлтэй барилдааша эхэнэр Хелен Марулистай тулалдажа диилдэһэн байна. Тиибэшье мүнгэн медальда хүртэжэ, алдар солоёо арьбажуулһан байха. 2015 оной ноябрь соо Москва хотодо үнгэргэгдэһэн Европын үндэһэ яһатанай Кубогта түрүүлбэ. Мүн баһа 2014 ондо шанга тамиршадай хабаададаг «Гран-при Иван Ярыгин-2015» гэһэн тулалдаанда үндэр амжалта туйлаһан байха.
2016 оной март һарада Латвиин Ригэ хотодо илалта туйлажа, Европын чемпионадай түрүүшын алтан медальда хүртэһэн байха. Һүүлшынгээ шанга тулалдаанда 6:4 тоотойгоор Украинын тамиршан Кит Татьяные булижа хаяһан байна.
Харамтайнь гэхэдэ, Турциин Стамбул хотодо шэлэн абалгын турнирта Рио-де-Жанейродэ хабаадаха лицензи абажа шадаагүй. Финалай дүрбэдэхи хубида гаража, Мексикын түлөөлэгшэ Алма Джейн Валенсия Эскотодо 3:4 тоотойгоор булигдаа.
2016 оной июнь һарада Санкт-Петербург хотодо хүрэл медальда шэнэ 58 кг хүрэтэр «олимпийскэ» шэгнүүртэ туршалсажа, хүрэл медаль абаба. Ноябриин 18-да, Бухарест хотодо Европын яһатанай Кубогта эхэнэрнүүдэй барилдаагаар диилэжэ гараа. Энээнэй ашаар Ородой Холбооной суглуулагдамал команда Белоруссиин бүлэгые 7:1 тоотойгоор шүүжэ гараа. Энэл жэлэй декабриин 10–да хоёрдохиёо дэлхэйн чемпионадта Венгриин түб Будапешт хотодо хабаадажа, баһал япон яһатанай барилдааша Мукайд Маюдада булигдаба.
Ирина Ологонова 2016 оной дүнгүүдээр бүхэ барилдаанай Хамтадхаһан дэлхэйн рейтинг соо хоёрдохи хүн гэжэ тоологдоно, Маю Мукайдын һүүлдэ. Гүрэн түрэ манай уласай урдаа хараха эхэнэр барилдаашанай ехэ амжалта туйлалтануудыень хараадаа абажа, «Ородой Холбоото Уласай габьяата тамиршан» гэһэн хүндэтэ нэрэ зэргэ олгуулаа. Ирина саашадаа одото сагтаа һаргангүй, нэрэ зэргээрээ бахархангүй, барилдаанайнгаа дүршэл шангадхажа, бэеэ һорижол ябана.
Будапешт хотодо үе мүсэеэ гэмэлтээшье һаа, операци хүүлэжэ, юһэн һара соо барилдаанай хибэстэ гараха аргагүй болоһон юм.
Ирина Ологонова энэ саг соо дүй дүршэлөө алдаагүй, урма зоригоо хухараагүй, харин бэеэ тренажёрно залнуудта һорижо байһандаа, дахинаа ехэ амжалта туйлаа. Белоруссиин түб хото Минскдэ «Гран- при Александр Медведь -2017» гэһэн гурба дахин олимпиин чемпионой 80 жэлэй ойн баярта зорюулагдаһан уласхоорондын турнирта эрхимлэжэ гараал даа.
Оюун ухаатанай тулалдаанда асуудал бүхэндэ сэхэ харюу үгтэдэг һаа, харин тамиршадай мүрысөөнүүдтэ элдэб ушар дайралдаха байна. Илалта, диилдэлгэ, аза талаан бурууталга дайралдахань дамжаггүй. Ирина Ологоновагай бэрхэ барилдааша хүн бололгодо тренернүүдэйнь габьяа ехэ.
«Тренер Виктор Эрдынеевич Ринчиновые бүхы наһаараа хүндэлжэ ябахаб, бүхэ барилдаанай оньһодо һургаа, өөрын стильтэй болгоо», - гэжэ түрүүшынгээ тренер тухай Ирина дулаанаар дурсадаг. Мүнөөшье болотороо харилсаагаа алдаагүй.
2006 ондо Улаан-Үдэ хото зөөжэ ерэһээр, мэдээжэ тренер Андрей Бузинай урилгаар олимпиин халаанай һургуулида һорилгоёо саашань үргэлжэлүүлээ.
Мэдээжэ һоригшо Андрей Бузин ганса Ириные бэшэ, мүн баһа Лондоной Олимпиадын хүрэл медальда хүртэгшэ Любовь Волосовае һургаһан, бэлдэһэн алдартай. Мүрысөөнүүдэй һүүлдэ тэрэ Иринатай тулалдаануудайнгаа видео-буулгабари хаража, хоюулаа шүүмжэлэл хэдэг байна. Хоёрдохи эсэгэнь шэнги налгай дулаанаар хандадаг, бэшэ элдэб сэдэбүүдээр сүлөө сагтаа дуугаралсадаг заншалтай.
Һүүлэй мэдээсэлнүүдээр, Ирина декабриин 1-2-то Чувашиин түб хото Чебоксарта үнгэргэгдэхэ уласхоорондын турнирта эхэнэрнүүдэй бүхэ барилдаанай команда хүтэлхэ болобо.
Ирина Игоревна хара хүлһөөрөө олоһон мүнгөөрөө «Дюпон-Инвест» гэһэн барилгын компаниин бариһан гэртэ квартира худалдан абажа, өөрынгөө байра байдалаа һаяхана түбхинүүлээ.
Залуу, талаан бэлигтэй тамиршан Ирина Ологоновада гансал амжалтануудые хүсэжэ, наһанайнгаа жаргал эдлэжэ, гол хүсэлөө бэелүүлхыень бидэ хүсэнэбди.
Оюна ЦЫДЕНОВА