830
Буряад Уласай Толгойлогшо Алексей Цыденов мүнөөдэр түсэблэлгын суглаанда декабриин 15 болотор һарын туршада хүрэхэ, дулаагаар хангаха түлеэ, нүүрһэ бэлдэхэ даабари нютагай засагай байгууламжануудта үгэбэ.
Ноябриин 12-һоо хойшо Северобайкальск хотодо шүлуун нүүрһэн саг соогоо асарагдаагүйһөө боложо, гэр байрануудта хүйтэрһэн байна. Тиимэһээ иимэ байдал аймагуудта тогтохогүйн тула уласай хүтэлбэрилэгшэ иимэ даабари үгэбэ.
«Онсо байдал тогтохогүйн тула, түлишэеэ гамнажа, багаар түлихэ гэһэн шиидхэбэри абтаһан байна. Тиимэһээ дулаа дамжуулдаг соргонуудта халууниинь байха нормоһоо 20 хубяар бага болгогдоһон юм», – гэжэ Северобайкальскын засаг даргын нэгэдэхи орлогшо Александр Мирошниченко видеоконференц дамжуулгаар хэлэбэ.
«Федеральная грузовая компания» (ФГК) гэһэн эмхитэй хэлсэжэ, ноябриин 15-да Северобайкальск хото 4383 тонно шулуун нүүрһэтэй 66 вагонууд асарагдаа. Мүнөө сагта түбэй котельни ажалаа ёһотой хэбээрээ ябуулна. Гэр байрануудта дулаан болоо.
Алексей Цыденовэй хэлэһээр, ФГК эмхиин түлөөлэгшэдтэй уулзажа, хөөрэлдэжэ, шулуун нүүрһэ асарха тухай хэлсэгдээ. Иимэ шиидхэбэринүүд сула абтаха ёһогүй, теэд хүн зониие дааруулжа байһанһаа дээрэ. Аймагуудай гулваанар дулаагаар хангадаг эмхинүүдэй хүтэлбэрилэгшэдтэй һайнаар ажал эмхидхэхэ тухай уласай хүтэлбэрилэгшэ тэмдэглэбэ. Декабриин 15 болотор һарын туршада хүрэхэ түлишэ бэлдэхэ гэжэ тэрэ хэлэбэ.
«Мүнөө поездоор түлишэ ерэхэ гэжэ хүлеэжэ байхагүй. Түмэр харгыда ямар нэгэ шалтагаанһаа ажал таһалдабал, хүнүүд дулаагүй үлэшэхэ болоно ха юм. Нэгэдэхеэр, шулуун нүүрһэ асардаг эмхитэй хөөрэлдэхэдөө, түлишэ хэрэгтэйһээ ехээр асарха тухай хэлсэхэ. Хаана, хэзээ, юун болохоб гэжэ хүлеэхэ гээшэ тааралдаагүй. Хоёрдохёор, түлишэгүй байгаад, аниргүй байнат. Аниргүй байһаар, хүнүүдтэй гэрнүүдтэ дулаа таһалдуулха гэжэ шиидээт. Иимэ шиидхэбэринүүдые абаха эрхэгүйт, өөрынгөө албанай уялга дүүргээгүйт. Гансаараа бэшэ ха юм та, шиидхэхэ асуудал тухайгаа дуулгыт. Хүршэ аймагта шулуун нүүрһэтэй байна, түмэр хргышадһаа түлишэ абахаар байна ха юм», - гэжэ Северобайкальск хотодо тохёолдоһон байдалаар Алексей Цыденов хэлэбэ. - «Северобайкальскын хүтэлбэрилэгшэд ажалаа һайнаар дүүргэнэгүй, энээнһээ уламжалан, дүнгүүд согсологдохо. Хотын засаг даргые һуралсалһаань дуудажа, хотын асуудалнуудые шиидхэг», - гэжэ уласай хүтэлбэрилэгшэ нэмэбэ.
Тиихэдэ Буряад Уласай Барилгын болон гэр байрһн ажахы шэнэдхэлгын яаманда хэр зэргэ түлишэ бэлдэгдэнхэйб гэжэ шалгаха тухай даалгаба.
