662
Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов Улаан-Үдын 63-дахи һургуулида залгалаа барилгын ажал шалгаба.
Улаан-Үдын захиргаанай Барилгын хорооной түрүүлэгшын орлогшо Татьяна Матвеева, Буряад Уласай Болбосоролой болон эрдэм ухаанай яаманай материальна-техническэ хүгжэлтын болон аюулгүй байдалай таһагай дарга Александр Назаров, хизаарламал харюусалгатай «ДарханСтрой» бүлгэм болон «Улан-Удэстройзаказчик» гэһэн нютагай өөһэдын хүтэлбэриин эмхиин түлөөлэгшэд комисиин бүридэлдэ ороһон байна.
«Барилгын ажалнууд үргэлэжэлһөөр. Ноябриин 8-най мэдээгээр, 56, 6 сая түхэриг мүнгэн һомологдоод байна. Энэнь хадаа хэлсээндэ баталагдаһан сэнгэй 44 хубинь болоно», - гэжэ Буряад Уласай Болбосоролой болон эрдэм ухаанай яаманай материальна-техническэ хүгжэлтын болон аюулгүй байдалай таһагай дарга Александр Назаров хэлэбэ.
Мүнөөдэрэй байдалаар, залгажа баригдаһан байшанда орохо дулаан таһаг, таһалганууд баригданхай, сонхонууд һуулгагдаа, гадаа талын зайн галай, дулаагаар, уһаар хангалгын соргонууд хэгдэнхэй, нэгэдэхи дабхарай дулаагаар хангалгын түхеэрэлгэнүүд тодхогдонхой. Заһабарилгын, шэрдэлгэ будалгын, газаа талаһаа залгалаа дулааруулгын ажалнууд үргэлжэлһөөр. Һургуули шадар болбосон түхэлтэй болгохо талаар ажал хэгдэнэ.
Тиихэдэ хэлсээнэй ёһоор, 10,6 сая түхэригэй компьютернэ болон мультимедийнэ, актова заалай хэрэгсэлнүүд, эд бараан, сонхонуудай болон тайзанай хүшэгэ абтаха юм. Һургуулиин танхимуудай хэрэгсэлнүүдые болон номуудые абаха арбан сая тухай худалдаа наймаан соносхогдонхой. Энэ аукцион 2017 оной ноябрь һарада үнгэргэгдэхэ юм.
Шалгалтын ажалнуудай һүүлээр Вячеслав Цыбикжапов хизаарламал харюусалгатай «ДарханСтрой» бүлгэмдэ эндэ хэгдэхэ ажалнууд тусхай болзорто дүүрэхэ ёһотой гэжэ хэлэбэ. Ноябрь һарын дүүрэтэр гурбадахи дабхарай дулаагаар хангаха талаар хабсаралгын ажалнууд, залгагдажа бариһан байшанай гадаа түхэл, хушалта дүүрэхэ ёһотой. 2017 оной дүүрэтэр энэ байшан ашаглалгада тушаагдаха гэжэ түсэблэгдэнэ.
Улаан-Үдын 63-дахи һургуулида залгалаа «Һурагшадта мүнөө үеын болбосоролой оршон байгуулха» гэһэн түсэлөөр баригдана. 2017 ондо энэ программаар,федеральна болон уласай һанһаа 696,5 сая түхэриг һомологдоһон байна. Энэ мүнгэн Улаан-Үдын 63-дахи, Захаамин аймагай Ёнгорбойн дунда һургуулинуудта, уласай 28 һургуулинуудта заһабарилгын ажал ябуулха хэрэгтэ гаргашалагдана. Улаан-Үдын 63-дахи һургуулиин заһабарилгын ажалнуудта 129,5 сая түхэриг мүнгэн, тиихэдэ һуралсалай хэрэгсэлнүүдые худалдан абалгада федеральна һанһаа нэмэлтэ 40 сая түхэриг түсэблэгдэнхэй.
Мүнөө 63-дахи һургуулида 1536 үхибүүд һурадаг, тэдэнэй мянганһаа дээшэ үхибүүдынь хотын ондоо һургуулинуудта һурана. Тиимэһээ Буряад Уласай Засагай газар заһабарилгын һүүлэй ажалнуудые хинажа байха.
