525
Байгша оной ноябриин 20-до Буряад Уласай Толгойлогшо Алексей Цыденов, Байгалай байгаалиин хизаарай хүгжэлтын асуудалнуудаар ажалай бүлэг болон Ородой Холбоото Уласай фракци хоорондын «Байкал» гэһэн ажалай бүлэгэй хабаадалгатай суглаан үнгэргэгдэбэ. Тиихэдэ Буряад уласһаа Ородой Холбоото Уласай Гүрэнэй Дүүмын һунгамалнууд Николай Будуев, Алдар Дамдинов, Буряад Уласай, Эрхүү можын болон Үбэр Байгалай хизаарай Засагай газарай Түрүүлэгшын орлогшонор, Арадай Хуралай һунгамалнууд, эрдэмтэд болон олониитын эмхинүүд суглаанда хабаадалсаба.
Байгалай хизаарай хүгжэлтэ болон Ородой Холбоото Уласай Юрэнхылэгшэ Владимир Путинай даабаринууд тухай асуудалнуудаар суглаанда зүбшэбэ. Буряад Уласай Засагай газар Байгалай хизаарта байгаали хамгаалгын ажахын ажал эрхын талаар гуримшуулха тухай асуудалнуудые нэгэнтэ бэшэ табиһан юм. Тэдэнэй тоодо ойн жасын газарнуудые нютагуудай мэдэлэй болгохо, Байгалай хизаарта болон ЮНЕСКО эмхиин бүридэлдэ байһан газарнуудһаа хизаарлалта абаха, түймэрэй аюул һэргылжэ, нютагууд шадар ой модо отолхо гэхэ мэтэ асуудалнууд болоно.
Тиихэдэ байгаали хамгаалгын мэргэжэлтэ шүүбэри үнгэргэхэ гэһэн хуулиин талаар арсалдаан гараба. Хүүгэдэй сэсэрлиг, соёлой түб, һургуулиин тамирай талмай барихада, заатагүй гүрэнэй экологиин мэргэжэлтэ шүүбэри үнгэргэхэ шухала. Энэ ажал ябуулхада, саг ошоно, бюджедэй мүнгэн гаргашалагдана, ниигэмэй удха шанартай барилга удаашарна.
«Экологиин мэргэжэлтэ шүүбэриин талаар хуулида хубилалта оруулха тухай асуудал табиһан байнабди. Ямаршье барилга хэхэдээ, сэсэгүүдые худалдаха киоск гү, али футбол наадаха талмай барилгада заатагүй мэргэжэлтэ шүүбэри үнгэргэхэ хэрэгтэй. Энэ талаар зарим хэмжээнүүд үлүү», - гэжэ Алексей Цыденов хэлэбэ.
Буряад Уласай Арадай Хуралай түрүүлэгшэ Цырен-Даша Доржиевэй хэлэһээр, машиностроени гү, али байгаалида хохидол үзүүлхэ үйлэдбэринүүдые барилгаһаа бэшэ ондоо түсэлнүүдтэ экологиин мэргэжэлтэ шүүбэри үнгэргэхэгүй.
Тиихэдэ Ородой Холбоото Уласай Байгаалиин нөөсэнүүдэй болон байгаали хамгаалгын яаманда, бюджетһээ һомологдоһон мүнгөөр барилгада мэргэжэлтэ шүүбэри хэхэгүй гэһэн хуули бэлдэһэн байна. Харин можо нютагууд энээниие зүбшэнэгүй.
Онсо газарнуудаар ябаха, амархадаа түлбэрииень Ородой Холбоото Уласай можо нютагуудай мэдэлдэ болгохо тухай хуули ёһын талаар шиидхэхэ асуудалнуудай нэгэн болоно.
«Эндэ Байгалай эрьеын газар тухай хэлэгдэнэ. Амаржа байһан зонһоо мүнгэ миин суглуулха бэшэ, харин эндэхи газар бог шоройһоо арилгаха, аюулгүй байдал сахиха, эмхитэй аяншалга байгуулгада суглуулагдаһан мүнгэн дамжуулагдаха», - гэжэ уласай хүтэлбэрилэгшэ тайлбарилба.
Эдэ асуудалнууд шиидхэгдэбэл, Буряад Уласай эдэй засагай хүгжэлтын, Байгалай хизаарай ажаһуугшадай ажабайдалай болон Байгал далайн экологическа системэ аршалха талаар байдал һайжаруулагдаха гэжэ Алексей Цыденов тэмдэглэбэ.
«Энэ талаар ажал хэгдэнэ. Мүнөөдэрэй суг хамта ябуулһан ажалнай үрэ дүнтэй байжа, саашадаа эдэ асуудалнууд шиидхэгдэжэ, хуули абалгада нүлөөлхэ. Энээнһээ уламжалан, манай уласта шиидхэхэ асуудалнуудай талаар ажал эршэдэхэ», - гэжэ Буряад Уласай Толгойлогшо Алексей Цыденов хэлэбэ.
«Байгаали хамгаалгын хуулиин талаар асуудалнууд бидэндэ шухала, ехэ удха шанартай юм. «Байкал» гэһэн бүлэгэй һунгамалнууд ганса байгаали хамгаалгын хуулиин талаар ажалаа ябуулдаг бэшэ. Манай зорилгонууд бүри үргэн, Байгалай хизаарай ниигэмэй-эдэй засагай хүгжэлтын асуудалнуудаар можо нютагуудай хүтэлбэрилэгшэдые дэмжэдэгбди, можо нютагуудайнгаа эрхэ ашаг хамгаалнабди», - гэжэ фракци хоорондын ажалай «Байкал» бүлэгэй түрүүлэгшэ Сергей Тен хэлэбэ.
Буряад Уласай Засагай газарай мэдээсэлэй албанһаа гэрэл зураг абтаба.
