Буряад Уласай Кабанск аймагай газарай асуудалнуудаар Арадай Хуралай һунгамалнууд Танхой һууринда ажалай зүблөөндэ хэлсэбэ. Танхой һууринай «Визит-центр» гэһэн эмхи Буряад Уласта мэдээжэ. Эндэ хадаа Байгалай дархан газараар аяншалжа, ан амитад, шубууд, олон тоото баян ургамал аяншалагшад хараха аргатай. Тиигэбэшье Танхой һууринаар федеральна харгы гарадаг, уһа хамгаалгын болон түбэй байгаали хамгаалгын газарнууд бии, Байгаалай дархан газар Ородой Холбоото Уласай мэдэлдэ болон түмэр замай харгы зубшаһан зуруудай талаар хизаарлалтануудһаа боложо, ажаһуугшад газарайнгаа дансануудые бүтээжэ шаданагүй. Тиихэдэ Түмэр харгын захиргаан газарай түлөө нютагай бюджедтэ татабари түлэнэгүй, эдэ газарнуудые болбосон түхэлтэй болгохын түлөө аймагай һанһаа мүнгэн һомологдоно. Эдэ асуудалнуудые Буряад Уласай Арадай Хуралда шиидхэгдэхэгүй. Тиимэһээ уласай парламентын Газарай асуудалнуудай, аграрна бодолгын болон эд хэрэглэлгын дэлгүүрэй талаар хорооной түрүүлэгшэ Александр Попов федеральна засаг зургаанда хандалга бэлдэхэ даабари үгэбэ.
Арадай Хуралай һунгамал Леонид Селиверстовой хэлэһээр, түмэр харгын газарнуудтай асуудал шиидэхэхэ хэрэгтэй, түмэр харгыһаа хэды шэнээн зайда ажаһуугшад газар эзэлхэ аргагүйб, тэрэниие элирүүлхэ шухала.
Түмэр харгы зубшаһан зуруудай талмай бага болгогдохогүй, энэ хадаа нэн түрүүн ажаһуугшадай аюулгүй байдал болоно. Тиимэһээ ажаһуугшад эдэ газарнуудые түлбэритөөр ашаглаха аргатай гэжэ Буряад Уласай Зөөриин болон газарай харилсаанай талаар яаманай газарай байгуулалтын таһагай даргын орлогшо Михаил Гатапов хэлэбэ.