571
2017 онһоо хойшо Буряад Улас «Ородой Холбоото Уласай холо оршодог, хүрэхэдэ хүндэ аймагуудта ажаһуудаг зондо түргэн туһаламжа үзүүлхэ талаар хангалга» гэһэн элүүрые хамгаалгын түсэл бэелүүлгэдэ хабаадана.
Ородой Холбоото Уласай Элүүрые хамгаалгын яаман болон Буряад Уласай Засагай газар санитарна авиаци хэрэглэн түргэн туһаламжа үзүүлхэ талаар хэлсэжэ, байгша ондо хэрэгтэй техникэ худалдан абалгада федеральна болон уласай бюджедүүдһээ 264,5 сая түхэриг һомологдохо.
Оршон байдалда Ми-8 түхэлэй вертолёдоор Буряад уласай аймагууд хүрэтэр 214-дахи ниидэн ошожо, эмшэд туһа хүргэһэн байна. Тиихэдэ 373 хүн, тэдэнэй тоодо 89 үхибүүд түбэй эмнэлгын газарнуудта вертолёдоор асарагдаа. Үнгэрһэн долоон хоногто, ноябриин 14-һөө 20 болотор санитарна авиациин ашаар хүдөө нютагуудай 27 хүндэ эмнэлгын туһа үзүүлэгдэһэн байна. Тиихэдэ эмшэд нэгэ нарай үхибүү, саа үбшэндэ хүндөөр нэрбэгдэһэн хоёр хүнүүдые, харгыда гэмэлтэһэн 6 хүнүүдые, 13 нарайлха эхэнэрнүүдые Улаан-Үдын эмнэлгын газарнуудта вертолёдоор асаржа оруулаа.
Буряад Уласай эмшэд-мэргэжэлтэд аймагуудай түбэй больницада санавиациин ашаар хүрэжэ, үбдэһэн зондо байра дээрэнь туһа хүргэдэг юм. Тиихэдэ Ми-8 түхэлэй вертолёт эмнэлгын модулёор хангагдажа, харгыда ниидэхэ зуураа эмшэд үбдэһэн, гэмэлтэһэн хүнүүдтэ туһа хүргэхэ аргатай юм.
