754
Мүнөө сагта хүдөөһөө хото руу зөөдэг зоной олошоржо байхада, хүдөө нютаг гаража, заншалта ажалаа эрхилдэг һайн һайхан жэшээнүүд баһал бии.
Валерий Жамбалович Шагдаров Шэтэ можын Хоолошоной нютагта 1935 ондо түрөө. Хара багаһаан хамтын ажалда ябажа хүдэржэһэн хүбүүе сэрэгэй албанда татахадаа, Номгон далайн сэрэгтэ абаа.
1958 ондо Далайн авиациин албанhаа бусаhан залуу хүбүүн Хёлгын голой Yхэриг нютагта 1940 ондо түрэhэн Антонина Бадмаевна Базароватай уулзажа, хуби заяагаа ниилүүлһэн намтартай.
1958 ондо Валерий Жамбалович, Антонина Бадмаевна Шагдаровтанай гэр бүлэ Улаан-Үдэ нүүжэ ерээ. Валерий Жамбалович Зүүн Сибириин технологическа дээдэ һургуули дүүргээд, Улаан-Yдын Авиационно заводто хүдэлжэ эхилээ hэн. Антонина Бадмаевна баhал энэ заводто ороо. Ушарынь юуб гэхэдэ, тэрэ үедэ заводой хүдэлмэришэдые болон hая ерэhэн бүлые гэр байраар хангадаг байhан юм.
Газар дээрэ ганса түлеэн гал болохогүй гэhэн удхые баримталан, буряад угсаатан бадарhан дүлэеэ хүгжөөдэг. Эгээл иимэhээ энэ үнэр баян гэр бүлэ Намжил гэhэн баатар хүбүүтэй, Валентина дангина басагатай болоhон юм.
Бүхы наhаараа Валерий Жамбалович Улаан-Yдын Авиационно заводто инженер-электригээр, Антонина Бадмаевна рентгенологоор хүдэлжэ, наһанайнгаа амаралтада гараhан юм. Антонина Бадмаевна хүдэлжэ байха үедөө Улаан-Үдэ хотын Зүблэлэй һунгамал боложо, зоной хэрэгые урагшатай ябуулдаг hэн.
Дайнай үедэ түрэжэ, үлдэхэ даарахые, хүндэ хүшэр ажалые бэе дээрээ үзэhэн, хатуу сагые хараhан хоёр амаралтада гарабашье, миин hуудаггүй. 1993 ондо Валерий Жамбалович, Антонина Бадмаевна Шагдаровтан Загарай аймагай Арьбажал нютаг буужа, адуу мал үдхэжэ, огородой баян ургаса абажа, хүн зониие гайхуулаа. Залуушье хүбүүд, басагадай бэлэхэнээр бүтээхээр бэшэ ажалые хэжэ, залуу үетэндэ жэшээ болоо. Адуу мал үдхэхэдэнь, аша зээнэрынь туhалжа, бүри олон болгоhон юм гэжэ энэ нютагайхид хэлсэгшэ.
Загарайн Асагадай дасанда болон Дабаата нютагай Агваан Доржиев хамбын субаргада, Ярууна аймагай Зандан-Жуугай дасанда ехэ туhаламжа хүргэhэн буянтай юм. Валерий Жамбалович түрэhэн Хоолошной нютагтаа дасанай, Еши-Доржо Шараповай нэрэмжэтэ музейн барилгада хэнhээшье ехэ туhа хүргэһэн гэжэ мэдээжэ.
Валерий Жамбалович, Антонина Бадмаевна Шагдаровтан эб хамта 59 жэл соо нэгэ шэрүүн үгэ хэлсэнгүй, ёhотойл буряад ёhо заншалаар түлиhэн галаа хүгжөөгөөд, зургаан ашаяа, зургаан зээнэрээ үргэлсэжэ, үшөөл дүрөө дээрээ адуу малаа ажаллаһан зандаа. Сагаан эдеэгээ элбэгээр дэлгэжэ, зөөхэй тарагаа бэрижэ, үглөөнэй улаан нарые угтажа, орон дэлхэйдээ дээжыень үргэжэ байдаг юм.
Москва руу буужа ошоhон аша зээнэртээ hанаагаа зобожо, түрэл hайхан буряад хэлэеэ орхингүй, үбгэ эсэгынгээ тоонто нютагые эрьежэ байхыень захижа байдаг. Энээхэн үсөөхэн буряадууд дэлхэй дүүрэн тарашоод, хожомынь ажабайдалнай, түрэл хэлэмнай, түрэhэн нютагнай ямархан болохо юм ааб даа гэжэ ехэл бодолгото болон, һанаагаа зобожо hуудаг.
Иимэ арюун сэбэр харгы замтай, бүхы наhаараа эбтэй ажаhуужа, үри хүүгэдтээ, залуу үетэндэ жэшээ болодог буянтай, бурхантай Валерий Шагдарович, Антонина Бадмаевна Шагдаровтанай гэр бүлэдэ үшөөл ута наhа, элүүр энхые хүсэе.
Амгалан БУДАЕВ
Гэр бүлын архивһаа гэрэл зураг абтаба.
