Анна Огороднигой гэрэл зураг
«Буряад үнэн» Хэблэлэй байшанай эмхидхэдэг «Буряадай түрүү хүнүүд» гэһэн XXI-дахи заншалта урилдаанай дүнгүүд согсологдожо, декабриин 11-дэ Х. Намсараевай нэрэмжэтэ Буряадай драмын театрта лауреадуудые болон авторнуудые шагналгын баяр ёһолол үнгэргэгдэбэ.
Буряад Уласай Засагай газарай болон Арадай Хуралай дэмжэлгээр «Буряадай түрүү хүнүүд» гэһэн урилдаан үнгэргэгдэдэг. 2017 оной урилдаанда 63 хүн лауреадуудай нэрэ зэргэдэ хүртөө.
Баярай үдэшэ «Буряад үнэн» Хэблэлэй байшанай захиралай уялга дүүргэгшэ Бадмажаб Гындынцыренов болон Буряад арадай ирагуу найрагша, Ородой Холбоото Уласай соёлой габьяата хүдэлмэрилэгшэ, энэ урилдаа эхилһэн Ардан Ангархаев сугларагшадые амаршалжа, урилдаанай түүхэ тухай хөөрэбэ. Бадмажаб Гындынцыреновэй хэлэһээр, «Буряадай түрүү хүнүүд» гэһэн урилдаан арад зоной дунда суутай, хүнүүд энэ урилдаанда жэлһээ жэлдэ эдэбхитэйгээр хабаададаг.
Нютагайнгаа удамарша, урагшаа һанаатай, бэрхэ, арад зонойнгоо түлөө оролдожо, улас түрынгөө нэрэ дээрэ үргэжэ ябаһан хүнүүд тухай сэтгүүлшэд бэшэ, харин хүршэнэрэйнь, багшанарайнь, үри хүүгэдэйнь, суг хүдэлдэг нүхэдэйнь бэшэһэниинь һайшаалтай гэжэ Ардан Лопсонович тэмдэглэбэ. 1997 ондо анха түрүүшынхиеэ «Буряадай түрүү хүнүүд» урилдаа арадай поэт Ардан Лопсонович Ангархаев эхилһэн гэжэ һануулнабди.
Буряад Уласай Арадай Хуралай түрүүлэгшэ Цырен-Даша Доржиев сугларагшадые амаршалжа, «Буряад үнэн» Хэблэлэй байшан «Буряадай түрүү хүнүүд» гэһэн урилдаа эмхидхэжэ, хүдөө нютагуудта ажаһуудаг хүнүүд тухай бэшэхэ, олондо хөөрэхэ һайхан заншалтай болоһон байна гэжэ хэлэбэ. «Буряадай түрүү хүнүүд» урилдаанай анха түрүүшынхеэ эхилхэдэ, Цырен-Даша Эрдынеевич Буряад Уласай Ярууна аймаг хүтэлбэрилжэ байгаа. Арадай Хуралай түрүүлэгшэ Хори аймагай Цыремпил Ширабдоржиевые, Ярууна аймагай Баир Базарович баНадежда Майдараевна Дугарнимаевтаниие, Агын тойрогой Валерий Шойжамсаевич ба Светлана Жигжитовна Семёновтониие, Хори аймагай Виктор Иванов гэгшэдые амаршалжа, дурасхаалта бэлэгүүдые барюулба.
Энэ үдэшэ «Буряад үнэн» Хэблэлэй байшанай хүдэлмэрилэгшэд үндэр нэрэ зэргэдэ хүртэжэ, шагнагдаһан байна. Нэрлэбэл, Елена Романовна Дугаровада Буряад Уласай соёлой габьяата хүдэлмэрилэгшэ гэһэн үндэр нэрэ зэргэ олгогдоо. Ородой Холбоото Уласай холбооной болон мэдээсэл тараадаг хэрэгсэлнүүдэй яаманай Хүндэлэлэй грамотанууд Александр Виссарионович Махачкеев, Ирина Александровна Галтаева, Намжилма Нанзатовна Бальжинимаевада барюулагдаа. Баярай үдэшэ Буряад Уласай Толгойлогшын захиргаанай хүтэлбэрилэгшын уялга дүүргэгшэ Баир Цыренов эрхим хүдэлмэрилэгшэдтэ шагналнуудые барюулхадаа, эдэ зомнай ёһотойл Буряадай түрүү хүнүүд гэжэ тэмдэглээ.
Удаань аймаг аймагуудаар Буряадай түрүү хүнүүд тайзан дээрэ уригдажа, «Буряад үнэн» Хэблэлэй байшанай зүгһөө бэлэгүүд болон хүндэлэлэй грамотанууд барюулагдаа. Тиихэдэ түрэлхидынь, дүтын зониинь, суг хүдэлдэг нүхэдынь, аймагуудай захиргаануудай, нютагаархинай эблэлнүүдэй түлөөлэгшэд лауреадуудые амаршалхаяа ерэһэн байна. Буряад улас, Үбэр Байгалай хизаар, Шэнэхээн нютаг, Ородой Холбоото Уласай можо нютагуудта болон дэлхэйн хари гүрэнүүдтэ ажаһуудаг Буряадһаа гарбалтай хүнүүд нютагайнгаа нэрые дээрэ үргэжэ ябанад. Лауреадууд нэрэ зэргэдэ хүртэһэн һаншаг буурал эжынэр, һахал сагаан баабайнар, шамбай шиираг хүдэршүүл, эдир залуу хүбүүд, басагад суг хамта зогсожо, ажал хэрэгүүдээрээ, ажабайдалда хандасаараа олондо жэшээ боложо, арад зонойнгоо һүр һүлдэ дээрэ үргэжэ ябаһанаа гэршэлээ.
Мүнөө жэлэй «Буряадай түрүү хүнүүд» урилдаанай «Аласай холбоон» номинацида лауреадай нэрэ зэргэдэ хүртэһэн Наталья Санжиева Япон гүрэнһөө зорижо ерэһэн байна гэжэ тэмдэглэхэ хэрэгтэй.
Тиихэдэ Шэнэхээн нютагһаа гарбалтай, мүнөө Япон гүрэндэ ажаһуудаг Жамсын Сэнгэлэй ерээшьегүй һаань, түрэлэйнь зон ерэһэн байна. «Буряадай түрүү хүнүүд» урилдаанай түүхэдэ анха түрүүшынхиеэ нютагайнгаа зониие амаршалхаяа Шэнэхээнэй нютагаархинай эблэлэй түрүүлэгшэ Дашанима гуай зорижо ерээ.
«Россиин эрхим багша – 2017» урилдаанда түрүүшүүлэй тоодо ороһон Хэжэнгэ аймагһаа гарбалтай, мүнөө Ага нютагта ажаһуудаг, Агын 2-дохи дунда һургуулиин багша Соёлма Батоболотова «Аласай холбоон» номинацида лауреат болоһон байна. Агын Буряадай тойрогой захиргаанай зүгһөө эрхим багшые амаршалхаһаа гадна, түрэл тоонто Хэжэнгэ нютагайнь зон бэлигтэй багшые амаршалхаяа зорижо ерэһэн байна. Һургуулида һураха үеһөө хойшо һүбэлгэн, бэрхэ, ухаансар басаганай амжалтануудаар нютагаархидынь, багшанарынь омогорхонобди гэжэ В. Мункинай нэрэмжэтэ лицей-һургуулиин захирал Ханда Гунзынова хэлэбэ. Багшын ажалда бүхэросиин урилдаанда үндэр амжалта туйлаһан нютагайнгаа басаганда Хэжэнгэ аймагай захиргаанай зүгһөө Даша Намдаковай “Медаль Чингисхана” гэһэн бүтээл болон мүнгэн зүүдхэл шангуудые барюулба.
Буряад орон нютагтаа бэлиг талаантай, эдэбхи үүсхэл ехэтэй, урагшаа һанаатай хүнүүд тухайгаа бэшэһэн авторнууд баһал тайзан дээрэ уригдажа, тэдэнэртэ дипломууд болон мүнгэн шан барюулагдаһан байна.