​Эрхим тамиршад элирүүлэгдэбэ

Декабриин 20-до Улаан-Үдэ хотын эрхим тамирша­дай нэрэнүүд согсологдохонь. Үнгэржэ байгаа до­лоон хоногой эхиндэ мэдээжэ тамиршад, спортын талаар ноёд болон сурбалжалагшад суглаа хура­жа, эрхимүүдэй нэрэнүүдые согсолбо.

1990-ээд онуудһаа тус урилдаан эхиеэ абаһан гээд һануулая. Спорт тухай бэшэ­дэг сурбалжалагшад жэлэй эрхим тамиршадые урдань тодоруулдаг байһан. Хэдэн жэлэй саада тээ урилдаа­найнгаа дүрим ондоо болгог­ты гэжэ коррупционно таһаг дурадхаһан юм. Тиимэһээ Улаан-Үдэ хотын захиргаа­най ажалшад, мэдээжэ та­миршад болон һоригшод эрхимүүдэй нэрэнүүдые то­доруулдаг болоо һэн.

Мүнөө жэл эрхимүүд табан бүлэг болон хубаа­рагдаа. “Олимпиин наада­нуудай бүридэлдэ ородог спортын зүйлнүүдээр эр­хим тамиршан”, “Олимпи­ин наадануудай бүридэлдэ ородоггүй спортын зүйлнүүдээр эрхим та­миршан”, “Эрэмдэг бэетэй хүнүүдэй дунда эрхим та­миршан”, “Үндэр наһатай эрхим тамиршан”, “Команд­на наадануудай дунда эр­хим команда” гэһэн номи­нацинуудаар түрүүшүүл тодороо.

“Олимпиин наадануудай бүридэлдэ ородог спортын зүйлнүүдээр эрхим тамир­шан” гэһэн нэрэ зэргэдэ барилдааша басаган Нина Менкенова хүртэбэ. Мүнөө жэл энэ хальмаг шуһатай тамиршан ялас гэмэ амжал­тануудые туйлаһан байна. 23 наһа хүрөөдүй наһатай тамиршадай дунда дэлхэйн чемпионадта Нина шангай гурбадахи һуури эзэлээ һэн гээд һануулая. Мүн тиихэдэ тэрэ һаяхана Ородой Кубог­та хүртэхын түлөө нээмэл мүрысөөндэ түрүү һуурида гараа.

- Би өөрөө Хальмаг Уласһаа гарбалтайб, минии түрэлхид болон бүхы аха дүүнэрни тэндэ ажаһуудаг. Барилдаанда ябажа эхи­лээд, тиимэшье һайн дүн харуулхагүйб гэжэ мэдэ­рээб. Иигээд лэ Волгоград хото түрүүн һорилго га­рахаяа ошооб. Тэндэ ба­рилдаанай үгы болоходо, эхэнэрнүүдэй дунда барил­даан тон үндэр хэмжээндэ хүгжэжэ байһан Буряад Ула­ста ерээб. Тэрэ гэһээр табан жэл боложо байнаб. Минии һоригшо Юлия Владисла­вовна Бумбошкина болон бусад барилдааша басагад намай һайнаар угтан абажа, бүхыгөөрөө туһалһан бай­на, - гэжэ Нина Менкенова өөр тухайгаа хөөрэнэ.

Нина Менкенова. 

Ородой Холбоото Уласай Барилдаанай федерациин гэрэл зураг

“Олимпиин наадануудай бүридэлдэ ородог спортын зүйлнүүдээр эрхим тамир­шан” гэһэн номинацида үшөө гурбан барилдаашад эрхимүүдэй тоодо ороо. Эдэ хэд бэ гэбэл, Александр Бо­гомоев, Цыбик Максаров болон Стальвира Оршуш гэгшэд болоно. Мэдээжэ һур харбаашан Наталья Эрды­неева эрхим табанай тоодо баһа оролсоо.

“Олимпиин наадануу­дай бүридэлдэ ородоггүй спортын зүйлнүүдээр эрхим тамиршан” гэһэн хүндэтэ нэрэ зэргэдэ ушуист Вла­димир Максимов хүртөө.

Владимир Максимов.

Буряадай ушугай федерациин гэрэл зураг

2017 ондо Владимир хоёр дахин дэлхэйн чемпион болоһон байна. Һүүлэй мэ­дээгээр, энэ тамиршан 12 дахин дэлхэйн чемпион боложо шадаһандань гай­халтай. Мүнөө жэл үшөө гурбан хүн дэлхэйн чемпи­оной нэрэ зэргэдэ хүртэһэн. Тхэквондист Евгений Оци­мик, ушуист Анна Шатаева болон арбаледээр буудаг­ша Валентина Протасова табанай эрхимдэ оролсоо. Елена Харжеева тхэквондо­гоор дэлхэйн чемпионадай командна тоосоондо мүнөө жэл шангай хоёрдохи һуури эзэлһэн байна. Энэ тамир­ша басаганай эрхимүүдэй тоодо ороһондонь гайхаха хэрэггүй.

“Эрэмдэг бэетэй хүнүүдэй дунда эрхим тамиршан” гэһэн нэрэ зэргэдэ барил­дааша Александр Цоктоев хүртэбэ гэжэ мэдүүлнэбди. 

Александр Цоктоев.

"Борцы Бурятии" бүлгэмэй гэрэл зураг

2017 ондо шэхэ хатуушуулай дунда үнгэрдэг Сурдлимпи­ин наадануудта Александр гурбадахи һуури эзэлһэн байна. Бусад дүрбэн һуури һур харбаашад эзэлээ. Та­тьяна Андриевская, Ирина Баторова, Александр Доро­феев болон Сергей Хутаков гэгшэд 2017 ондо эрхимээр мүрысөөнүүдтэ хабаадаһан юм.

Аха заха тамиршадай дун­да Виктор Васильевич Бай­меев хүндэтэ нэрэ зэргэдэ хүртөө. Декабриин 1-дэ мэ­дээжэ тамиршан, һоригшо 80 наһанайнгаа дабаа гатал­ба. Хэды тиигэбэшье, тэрэ өөрөө хибэс дээрэ гаража, дүй дүршэлөөрөө залуу һүрэгтэй хубаалдана.

Виктор Баймеев

"Борцы Бурятии" бүлгэмэй гэрэл зураг

“Эрхим команда” баскет­болоор 2000 оной хүбүүд гэжэ тодорбо. 2017 ондо тэдэ бүхэроссиин “КЭС-баскет” гэһэн түсэлэй финалда оро­од, шангай гурбадахи һуури эзэлһэн байна.

18 наһа хүрөөдүй тамир­шадай дунда 10 түрүүшүүл элирүүлэгдээ. Боксёрнууд Кристина Ткачева, Людмила Воронцова, һур харбаашад Аюна Манханова, Сергей Шенхоров, сагаалса буудаг­шад Анастасия Деревяги­на, Александр Кондрашин, тхэквондистнууд Екатерина Абидуева, Дмитрий Петухов, ушуист Вероника Зубкова болон универсальна шаал­даашан Даша Раднаев гэг­шэд эрхимүүд болоо.