627
Мүнөөдэр, декабриин 20-до, Буряад Уласай Арадай Хуралай ээлжээтэ бэшэ сессидэ Мүнгэн һангай сайдай тушаалда дэбжүүлэгдэһэн Всеволод Мухиниие һунгамалнууд дэмжэбэ.
Буряад Уласай Мүнгэн һангай сайдай уялга дүүргэжэ байһан Всеволод Мухиниие тушаалда томилогдохо талаар нюуса һунгалта үнгэргэгдөө. Тэрэнэй дүнгүүдээр, 50 һунгамалнууд Всеволод Мухиниие дэмжэбэ, хоёрынь буруушааба гэжэ Буряад Yнэнэй мэдээсэлэй албан дуулгана.
Буряад Уласай Толгойлогшын захиргаанай хүтэлбэрилэгшын тушаалда дэмжэгдэһэн Баир Дашиевич Цыренов һунгамалнуудые өөрынгөө программатай танилсуулһан һаа, Всеволод Мухин, ямар шэглэлээр ажалаа ябуулха тухай хэлээгүй. Юундэб гэхэдэ, тэрэнэй һунгамалнуудай урда үгэ хэлэхэеэ гарахада, Арадай Хуралай түрүүлэгшэ Цырен-Даша Доржиев парламентын хороонуудта энэ талаар оло дахин хэлсэгдээ, дахин дабтаһанай хэрэггүй гэжэ хэлэһэн байна. Һунгамалнуудшье Всеволод Мухинда асуудалнуудые табибагүй.
Всеволод Мухин Буряад Уласай Мүнгэн һангай сайдай уялга дүүргэгшэ сентябриин 26-да болоһон байна. Тэрэ энээнһээ урид Буряад Уласай Мүнгэн һангай сайдай нэгэдэхи орлогшын тушаал эзэлжэ байгаа. Буряад Уласай Засагай газарай Түрүүлэгшын нэгэдэхи орлогшын тушаалһаа Иннокетий Егоровой буухада, Мүнгэн һангай сайдай тушаалда хүдэлжэ байһан Игорь Шутенков тэрэнэй орондо Засагай газарай Түрүүлэгшын нэгэдэхи орлогшын тушаалда томилогдоо гэжэ һануулнабди.
Анна Огороднигой гэрэл зураг.
