Мүнөөдэр, декабриин 20-до, Буряад Уласай Арадай Хуралай ээлжээтэ бэшэ сессидэ уласай Эдэй засагай яаманай хүтэлбэрилэгшэ нюуса һунгалтын ашаар дэмжэгдэбэ.
Хуби ниилүүлэһэн нээмэл «Росбанк» бүлгэмэй Буряадтахи таһагай захирал Александр Бардалеевэй түлөө 45 һунгамалнууд дуугаа үгэбэ, харин 5-ниинь буруушааба. Сессиин үедэ һунгамалнууд Александр Бардалеевэй программатай танилсажа, асуудалнуудые табиһан байна. Тэдэнэр Эдэй засагай яаманай хүтэлбэрилэгшын тушаалда томилогдоһон Александр Бардалеевэй хүдөө ажахы хүгжөөхэ түсэбүүдээр һонирхобо. Һунгамалнуудай һанамжаар, хүдөө ажахы Буряад Уласай эдэй засагай һалбариин үндэһэ һууринь болоно ха юм.
«Буряад Уласай Арадай Хуралай хороонуудта хүдөө ажахын асудалнуудаар эгээл ехээр хэлсэгдээ. Ниигэмэй удха шанартай асуудалайореёшье, шухалашье гэжэ ойлогоноб. Тиимэһээ нэн түрүүн хүдөө ажахы дэмжэлгын аргануудта анхаралаа хандуулха хэрэгтэй. Юундэб гэхэдэ, аймагуудай хүдөө ажахыда һомологдоһон мүнгэн ехэнхидээ ниигэмдэ ашаа болоно», - гэжэ Александр Бардалеев хэлэбэ.
Хүдөө нютагуудһаа хүнүүд олоор ниислэл хото зөөжэ, Улаан-Үдын ажабайдалай бүхы һалбаринуудта нүлөөлнэ. Тиимэһээ энэ асуудал шиидхэхын тула, хүдөө нютагуудай ажаһуугшадые ажалаар хангаха хэрэгтэй гэжэ тэрэ тэмдэглэбэ.
«Ямар аргаар энэ бэелүүлэгдэхэб? Энэ асуудал шиидхэхэын тула 2035 оно болотор ниигэмэй- эдэй засагай холын хараата түсэбүүдые табижа, тэрэнэй хэмжээндэ ажалаа ябуулха хэрэгтэй. Жэшээнь, эдеэ хоолой үйлэдбэриин һалбарида кооперативуудые байгуулха. Тиихэдэ аймагууд хоорондын кооперацинуудые бэхижүүлхэ болонобди», - гэжэ Александр Бардалеев тайлбарилба.
Хүдөө ажахын һалбари ганса ниигэмэй удха шанартай бэшэ гэжэ Буряад Уласай Арадай Хуралай һунгамал Бата Семёнов тэмдэглэбэ.
«Александр Витальевич банкнуудай һалбарида хүдэлжэ байһан хүн, дүй дүршэлынь багадана. Тиигэбэшье тэрэ үндэр сайдай тушал эзэлхэ конкурсдо илаһан байна. Александр Витальевич, зарим тэды асуудалда анхаралаа хандуулха хэрэгтэй. Хүдөө ажахы ниигэмэй удха шанартай гэжэ хэлэһэнтнай һайн, тиигэбэшье нэн түрүүн хүдөө ажахы эдэй засагай һалбаритай нягта холбоотой гэжэ һанаха хэрэгтэй. Уласай эдэй засагай хүгжэлтэдэ хүдөө ажахы үндэһэ һууринь болохо аргатай ха юм. Энэ һалбарида туһа хүргэжэ, үйлэдбэрилөө һаа, хамаг юумэ бүтээхээр», - гэжэ Бата Семёнов хэлэбэ.
Буряад Уласай Арадай Хуралда мүнөөдэр Буряад Уласай Толгойлогшын болон Засагай газарай захиргаанай хүтэлбэрилэгшэ болон Мүнгэн һангай сайд үндэр тушаал эзэлхыень дэмжэжэ нюуса һунгалта үнгэргэгдэбэ гэжэ һануулнабди.
Буряад Уласай Засагай газарай мэдээсэлэй албанһаа гэрэл зураг абтаба.