Баалай үедэ
Тамиршадай хабаадалгатай Шэнэ жэлэй түрүүшын бал үнгэрһэн долоон хоногой эсэстэ Улаан-Үдэдэ эмхидхэгдэбэ. Иимэ һонирхолтойгоор Олимпиин халаанай уласай спортын һургуули шабинараа амаршалһан байна.
Тамирша хүбүүд, басагад танигдахаар бэшэ һайханаар үһэ зүһэеэ заһаад, гайхамшагта гоё үдэшын плати, үндэр тобхотой гутал үмдэжэ, олониие гайхуулаа. Согтой, хүхюутэй байдалда “трикошни хаанаб?”, “спортын хубсаһаа плати дороо үмдөөд ябанаб” гэжэ тамиршад бэе бэеэ наадалжа байгаа һэн. Үнэхөөрөөшье, үдэр бүри шанга һорилго хэжэ, тиимэшье сүлөөгүй байжа, ехэнхи сагаа спортын талмайнууд дээрэ тэдэ үнгэргэнэ бшуу.
Баалай үедэ
- Манай һургуулиин шабинар мүнөө жэл яһала һайн дүнгүүдые харуулаа гэжэ һананаб. Шэнэ жэлдэ тэдэниие яагаад, ямар оршон байдалда амаршалхаб гэжэ ехэ бодолгото болообди. Олоной хүсөөр иимэ баал үнгэргэе гэһэн тон зүб шиидхэбэри абаабди гэжэ һананабди, - гэжэ Олимпиин халаанай Уласай спортын һургуулиин захирал Цырен Цындынжапов баяраа мэдүүлнэ.
Мүнөө тус һургуулида 485 тамиршан һорилго гарана гээд хэлэхэ хэрэгтэй. Тэдэ бэеэ спортын долоон зүйлөөр һорино гээшэ. Һүүлэй гурбан жэл соо спортын габьяата нэгэ мастер, уласхоорондын классай спортын 8 мастер эндэһээ ургажа гараа.
2017 оной дүнгүүд һургуулида үшөө согсологдоогүй. Тиимэһээ тэдэ 9 һарын байдалай дүн харуулба. Бүхы дээрээ һургуулиин шабинар 140 медаль абаһан байна. Тэдэнэй 39-иинь уласхоорондын талмайнуудта зүүлгэгдээ. 37 хүн Ородой суглуулагдамал командын гэшүүд боложо шадаа. Людмила Воронцова, Кристина Ткачева, Тамир Галанов, Стальвира Оршуш, Виктория Харитонова, Александр Кондрашин, Яна Енина гэгшэдэй нэрэ Буряадай спортдо дуратайшуул һайнаар мэдэнэ.
Баир Дашибальжиров Виктория Харитоновада шан барюулна.
Эдэнэр болон бусад шалгарһан тамиршад тусхай шангуудта энэ үдэшэ хүртэбэ. Олон хүндэтэ айлшад тэдэниие амаршалхаяа ерээ. Буряад Уласай Спортын болон залуушуулай хэрэгүүдэй талаар яаманай таһагые даагша Баир Дашибальжиров, Арадай Хуралай һунгамалнууд Сергей Леонов болон Бата Семёнов гэгшэд һайхан үгэнүүдые хэлэжэ, манай тамиршад Буряад Уласаа, бага нютагуудаа бүхы дэлхэйн дэбисхэр дээрэ суурхуулжа ябана ха юм гэжэ тэмдэглээ.
Ганса спортдо талаантай бэшэ байһанаа тамиршад харуулаа. Олон хүбүүд, басагад вальс болон бусад баальна хатарнуудта эрьелдэн, сугларагшадые ехэтэ гайхуулаа.
Тээмэндэ Улаан-Үдэдэ айлшаар бууһан мэдээжэ боксоор дэлхэйн чемпион Руслан Проводников уран һайханаар шүлэгүүдые уншаа һэн. Мүн Буряадай боксёрнууд дутуугүй шүлэг мэдэдэг юм гэжэ Амгалан Цыренов гэршэлээ.
Амгалан Цыренов
Борис БАЛДАНОВ
Авторай гэрэл зурагууд