Шэнэ жэлэй амаралтын үдэрнүүдтэ Улаан-Үдэ хотодо шатарай хэдэн мүрысөөнүүд үнгэргэгдэжэ, энэ спортын зүйлдэ дуратайшуулые тон ехээр баясуулһан байна. Уласхоорондын спортын мастер Жамсаран Цыдыповэй гурбан илалта тус хэмжээ ябуулгануудай эгээл гол дүн боложо үгэнэ бшуу.
Бүхы дээрээ табан мүрысөөндэ 350 гаран хүн хабаадаһан байна. 2017 оной түгэсхэлдэ түргэн шатараар болон блиц нааданай Буряад Уласай нээмэл чемпионат үнгэргэгдөө. Эндэ Жамсаран Цыдыпов хоёр амжалта туйлажа гараа. Шэнэ жэлэй гараһанай удаа үшөө гурбан ехэ мүрысөөн үнгэргэгдөө. Шатарай хюлгын саана багашуулһаа абаад, ехэшүүл хүрэтэр тамиршад мүрысөө.
Гол мүрысөөн болоһон Суперфиналай нээлгын болон хаалгын баярай ёһололнуудта хабаадагшадые амаршалхаяа Буряад Уласай Засагай газарай Түрүүлэгшын орлогшо – Буряад Уласай Толгойлогшын болон Засагай газарай захиргаанай хүтэлбэрилэгшэ Баир Цыренов, Арадай Хуралай һунгамалнууд Цыденжап Батуев, Баин Гуробазаров, Баир Доржиев болон Валерий Доржиев гэгшэд ерэжэ, баярай үгэнүүдые хэлээ.
Буряадай шатарай федерациин хүтэлбэрилэгшэ, Арадай Хуралай Түрүүлэгшын орлогшо Вячеслав Ирильдеевэй хэлэһээр, 2017 ондо Буряадаймнай шатаршад һайн үрэ дүнтэйгөөр тэмсээнүүдтэ хабаадаһан байна.
- Манай түрүү шатаршан Жамсаран Цыдыпов хэдэн мүрысөөндэ һайнаар наадажа, уласхоорондын рейтингтэй болоо. Эдир шатаршаднай Эрдэм Хубукшанов болон Түмэн Цыбиков гэгшэд өөрын наһанай бүлэгүүдтэ Ородой чемпионадта амжалта туйлаа. Тиихэдэ Сурена Самданова “ФИДЕ-гэй мастер” боложо шадаһан байна. Эдир шатаршан Виктория Хурхесова Сочи хотодо аза талаантай, бэлиг шадабаритай үхибүүдэй болбосоролой “Сириус” гэһэн бүхэроссиин түбтэ һурахаяа уригдаа. Тэндэ шатараараа болбосоролоо үргэлжэлүүлхэ юм. Шатаршадайнгаа бусадшье амжалтануудаар ехэ омогорхонобди, - гэжэ Вячеслав Ирильдеев тэмдэглээ.
Үхибүүдэй тулалдаанууд
Эгээл олон хүн үхибүүдэй дунда наадаа. Эдиршүүлэй разрядтай 98 хүн мүрысөөндэ оролсоһон байна.
Ахамад шүүгшэ, хүүгэдэй мэдээжэ һоригшо Хаян Гармажаповай хэлэһээр, наадануудта хабаадаһан бүхы шатаршадые урмашуулха гэжэ эмхидхэгшэд оролдоһон байна.
- Хүн бүхэндэ багахан бэлэг барюулаабди. Мүн тиихэдэ элдэб наһанай бүлэгтэ 12 илагшые элирүүлээбди, - гэжэ Хаян Сандакович хөөрэнэ.
8-һаа доошо наһатай шатаршадай дунда Арсений Семенихин болон Туяна Боронова гэгшэд түрүү һууринуудые эзэлээ. Эрик Куклин болон Сойжина Базаржапова гэгшэд шангай хоёрдохи һууринуудта гараа. Артём Уваров болон Оюна Дашидоржиева гэгшэд хүрэл медальнуудые абаа.
2009 оной тамиршадай дунда Вова Эрдынеев болон Арьяна Жаргалова гэгшэд шалгаржа, нэгэдэхи һууринуудые эзэлээ. Арьяна хадаа Буряадай мэдээжэ барилдаашан, уласхоорондын классай спортын мастер Бэликто Жаргаловай басаган юм. Дугар Батуев, Влад Анганов, Алина Дашижапова болон Сойжина Петухова гэгшэд шангай һууринуудые эзэлжэ, түрэлхидөө баярлуулһан байна.
Басагадай дунда шанга тулалдаануудта Аяна Садакпаева түрүүлээ. Мария Усова болон Вера Васильева гэгшэд хоёрдохи-гурбадахи һууринуудые эзэлээ.
Тус мүрысөөндэ хүдөө нютагуудай хүбүүд, басагад олоор хабаадаһан байна. Тэдэнэй дундаһаа Сэлэнгэ аймагай Арсалан Данзанов нэгэдэхи һуури эзэлээ.
Арсалан Данзанов
Зуугаад хабаадагшад сооһоо абажа боломоор 9 очкогой 8-ые абаһан Мария Тыхеева бусадһаа үлүү байжа, чемпионой нэрэ зэргэдэ хүртөө юм. Мария холын Хурамхаан аймагһаа ерээ гээд мэдүүлэе. Насакдоржо Лыктыпов болон түрүүлһэн басаганай аха болохо Дондоп Тыхеев гэгшэд шангай һууринуудые эзэлээ.
Мария Тыхеева - эрхимүүдэй эрхим
Залуушуулай мүрысөөн
Энэ мүрысөөндэ уласхоорондын хэмжээндэ нэрэ түрэтэй тамиршад оролсоо. Түрүү һууринуудта гараһан шатаршад хубиингаа рейтингые бүри ехэ болгохо аргатай байгаа.
- Иимэ мүрысөөнэй манай Улаан-Үдэдэ үнгэргэгдэжэ байһандань баярламаар. Рейтинг тоолуулгын хэмжээ ябуулганууд үсөөн можо нютагуудта болодог гээшэ. Буряадай шатаршадай бүхэроссиин хэмжээндэ амжалта туйлаагүй һаань, иимэ мүрысөөн манай эндэ эмхидхэгдэхэгүй һэн, - гэжэ Хаян Сандакович хөөрэнэ.
Леонид Семёнов (саада таладань)
56 хабаадагшад сооһоо Улаан-Үдэ хотын Леонид Семёнов эгээл ехэ очко абажа, түрүүлжэ гараа. Владислав Дондуков хоёрдохи һуури эзэлээ. Агаһаа ерэһэн Яна Жапова хүрэл медальда хүртөө. Эдэ гурбан тон адли 7 очкотойгоор наадануудаа түгэсхөө. Тиимэһээ илагшад нэмэлтэ тоололгын удаа элирүүлэгдээ юм.
Агын айлшан Яна Жапова
Эхэнэрнүүдэй дунда манай “Буряад үнэн” сониной үнгэргэдэг “Буряадай түрүү хүнүүд” гэһэн урилдаанда шалгарһан Захаамин аймагай Тунгалаг Жигжитова чемпионой нэрэ зэргэдэ хүртөө. Үшөө 12 наһа хүрөөдүй эдир шатаршад Сойжина Комиссарова болон Мария Хамнуева хоёрой шангай һууринуудые эзэлһэндэнь баярламаар.
Тунгалаг Жигжитова (зүүн гарһаа саада таладань)
Түрүүшүүлэй амжалта
Шэнэ жэлэй һайндэрнүүдтэ болоһон мүрысөөнүүдэй гол хэмжээ ябуулгань хадаа классическа шатараар Буряад Уласай нээмэл чемпионадай Суперфинал боложо үгөө. Энэ ехэ мүрысөөндэ Монгол ороной, Шэтэ, Эрхүү, Омск, Красноярск хотонуудай болон Буряадай 40 шатаршад хабаадаһан байна.
- Ородой шатарай федераци һүүлэй 10 жэлэй туршада шатарай наадануудые соёлой газарнуудта үнгэргэдэг һайн заншалтай болонхой. Бидэшье тэдээнһээ дутанагүйбди. Манай Суперфиналай түрүүшын тулалдаанууд Үндэһэтэнэй номой санда эмхидхэгдээ бэлэй. Үшөө нэгэ мүрысөө Зүүн Сибириин технологическа ехэ һургуулиин номой санда үнгэргөө һэмди, - гэжэ Буряадай шатарай федерациин хүтэлбэрилэгшэ, Буряад Уласай Арадай Хуралай Түрүүлэгшын орлогшо Вячеслав Ирильдеев һануулан хөөрэнэ. – Мүнөө хадаа бидэ Ази түбиин арадуудай урлалай галерейдэ наадануудаа эмхидхэнэбди. Өөрын гэртэ маанадые угтажа абаһан Арадай Хуралай һунгамал Валерий Пурбуевич Доржиевта баярые хүргэхэ байнабди.
Мүнөө жэлэй мүрысөөн 6-дахияа болобо гээшэ. Мүрысөөнэй шангай жаса 300 мянган түхэриг болотор дээшэлүүлэгдээ. Шатар нааданда олон тоото дуратайшуул табан үдэрэй туршада Буряадай шатарай федерациин сайт дээрэ сэхэ дамжуулгануудые хараха аргатай байгаа. Сэхэ дамжуулгын үедэ эхэнэрнүүдэй дунда уласхоорондын гроссмейстер Инна Ивахинова болон ФИДЕ-гэй мастер Африкан Андреев гэгшэд харагшадта шадамар бэрхээр түрүү шатаршадай наадануудай тайлбари хэжэ үгөө.
Һүүлшын наадан болотор хэн илалта туйлахаб гэжэ мэдэгдээгүй байгаа. Һүүлэй һүүлдэ хоёр шатаршан 7 очко абаһан байна. Эдэ хэд бэ гэбэл, Буряадаймнай түрүү шатаршад Жамсаран Цыдыпов болон Олег Бадмацыренов гэгшэд болоно. Нэмэлтэ дүн тоолоһоной удаа уласхоорондын мастер Жамсаран Цыдыпов чемпион болоо гэжэ тодороо. Гурбадахи шангай һуурида Эрхүү хотын Дмитрий Оболенских гараа. 6,5 очко абаһан энэ шатаршан хоёр дахин Суперфиналай чемпион болоһон намтартай.
Жамсаран Цыдыпов
Аяар зургаан хүн тон адли 6 очко абаһан байна. Тиигэжэ 4-5-дахи һууринуудта Монголой шатаршад Арюунбуувэй Бадамдорж болон Батсурен Бадамсурен гэгшэд гараа. 14 наһатай Батсурен Бадамсурен 2017 ондо Уругвайда болоһон дэлхэйн чемпионадта өөрын наһанай бүлэгтэ түрүү һуури эзэлһэн юм.
40 шатаршад соо эхэнэрнүүд хабаадалсаһан байна. Монгол ороной эдир шатаршан, Азиин чемпион Алтантуяа Болдбаатар нэгэдэхи һуурида гараа. Улаан-Үдын Екатерина Гыргенова болон Усть-Орда һууринай Агния Арбынова хоёрдохи-гурбадахи һууринуудые эзэлээ.
Үндэр наһатай шатаршадай дунда Агын тойрогой түлөөлэгшэ Ким Дашиев түрүү һуури эзэлһэнэйнгээ түлөө мүнгэн шанда хүртөө. 18 наһа хүрөөдүй тамиршадай дунда Эрхүү хотын Даниил Кыштымов шалгараа.
Жамсаран Цыдыпов Суперфиналда дүрбэдэхиеэ нэгэдэхи һуури эзэлээ. Тэрэнэй хэлэһээр, мүрысөөнэй үедэ яһала һайн наадажа ябатараа, нэгэ бага анхаралаа һуладуулжа, шүүд диилдэшэн алдаа.
- Мүрысөөндэ яһала һайн наада харуулааб гэжэ һананаб. Юуб гэхэдэ, 8-дахи шатын урда ори гансаараа түрүүлжэ ябааб. Тиихэдэ нэгэдэхи һуури бэлэхэнээр эзэлхэб гэжэ һанаа гүб даа. Энэ бодол һанааем эзэлжэ, анхаралыем алдуулаа. Минии нүхэр Олег Бадмацыреновтэ 8-дахи шатын нааданда шүүгдэшооб. Һүүлшын шатада Дмитрий Оболенскихтэй наадааб. Хоюулаа олон алдуунуудые гаргажа, тэнсээбди, - гэжэ Жамсаран Цыдыпов хөөрэнэ.
Мүнөө үедэ Жамсаран уласхоорондын гроссмейстерэй рейтингтэй болонхой. Иимэ ехэ нэрэ зэргэтэй болохын тула асари ехэ уласхоорондын мүрысөөнүүдтэ шалгаржа, тусхай хоёр балл Жамсаранда хэрэгтэй болоно. Январиин һүүл багаар тэрэ Москва ошожо, наадануудта хабаадахаар хараална.
Борис БАЛДАНОВ
Авторай гэрэл зурагууд