1671
Үндэһэн буряад үхэр болбол монгол болон бусад эбэртэ бодо малһаа онсо ондоо гээд, аяар холын Англиин эрдэмтэд элирүүлбэ.
Новосибирскын эрдэмтэд үндэhэн буряад үхэрэй биоматериал бүри гүнзэгыгөөр шэнжэлхыень Кембридж руу эльгээһэн байна. Шэнэ жэлэй үмэнэ иимэ дүнгүүд «Springer nature» гэһэн эрдэм шэнжэлэлгын сэтгүүлдэ толилуулагдаа.
Монголой Хүбсэгэл нуурай дэргэдэ, хүнэй бэлээр хүрэшэгүй хүбшэ ой соо буряад үхэрые эрдэмтэн Һасаранай Булад оложо, Буряад руу асаруулһан гээд мэдэнэбди. Н. Вавиловай нэрэмжэтэ уг шуһа шэнжэлэлгын түбэй эрдэмтэдэй, тэдэнэй тоодо лабораториие хүтэлэгшэ Юрий Столповскийн хүсэл оролдолгоор шэнжэлгэ наринаар ябуулагдаа. Тиигэжэ буряад үхэрые үндэһэн эбэртэ бодо мал гэжэ бодотоор гэршэлбэ.
“Буряад үнэн” мэдээсэлэй албан
