544
Медиалогия компани 2017 оной Сибириин можо нютагуудай эрхим хүтэлбэрилэгшэдые элирүүлһэн байна.
Сибириин федеральна тойрогой эрхим гурбан хүтэлбэрилэгшэдэй тоодо Эрхүү можын хүтэлбэрилэгшэ Сергей Левченко, Буряад Уласай Толгойлогшо Алексей Цыденов болон Алтайн хизаарай хүтэлбэрилэгшэ Александр Карлин гэгшэд түрүүлбэ. Ородой Холбоото Уласай 85 можо нютагуудай хүтэлбэрилэгшэдэй бүридэлдэ Алексей Цыденов 22-дохи һуури эзэлнэ гэжэ Медиалогиин мэдээсэлэй албанда тэмдэглэһэн тухай «Буряад үнэн» мэдээсэлэй албан дуулгана.
Ородой Холбоото Уласай Юрэнхылэгшэ Владимир Путин Ород гүрэнэй тээбэриин сайдай 40 наһатай орлогшые Буряад Уласай Толгойлогшын уялга дүүргэгшын тушаалда томилбо, һунгалтада Алексей Цыденов илажа, тэрэнэй түлөө ажаһуугшадай 87,43 хубинь дуугаа үгэбэ гэһэн тухай олондо мэдээсэл тараадаг хэрэгсэлнүүд оло удаа хэблэһэн байна. Тиихэдэ Владимир Путинтай «Сэхэ дамжуулгын» үедэ ажаһуугшадһаа ороһон дурадхал, мэдүүлгэнүүдэй ногоон хабтаһан Буряад Уласай Толгойлогшодо барюулһан тухай сонинуудта баһал олоор хэблэгдээ. Энэ уулзалгын үедэ Байгал далайн байдал тухай хэлсэгдэһэн байха юм. Буряад Уласай Толгойлогшын уялга дүүргэгшэ Байгалай эрьеын байдал хубилгаха талаар федеральна хуулида хубилалтануудые оруулха тухай дурадхаа. Тэрэшэлэн Монгол гүрэндэ Сэлэнгэ мүрэнэй эрьедэ зайн галай станци барихын орондо, хүршэ гүрэндэ Буряадһаа зайн гал дамжуулха тухай, үйлсэдэ ябатараа, унадаг үбшэнтэй хүнэй ами наһа абарһан тухай олондо мэдээсэл тараадаг хэрэгсэлнүүдтэ нэгэнтэ бэшэ хэблэгдээ. Эдэ бүгэдэ мэдээсэлнүүд хэблэгдэжэ, Буряад Уласай Толгойлогшо эрхимэй тоодо ороһон байна.
