830
Байгша оной январиин 25-да Ородой Холбоото Уласай Барилдаанай федерациин хүтэлбэрилэгшэ Михаил Мамиашвили Буряад Улас албанай хэрэгээр ерэхэ. Тэрэ Буряад Уласай Толгойлогшо Алексей Цыденов болон Спортын болон залуушуулай бодолгын талаар сайд Вячеслав Дамдинцуруновтай хамта улас дотор барилдаа хүгжөөхэ асуудалаар хэлсэхэ юм. Тиихэдэ сүлөөтэ барилдаагаар болон эхэнэрнүүдэй дунда барилдаагаар Буряадта Ород гүрэнэй чемпионат үнгэргэхэ, эхэнэрнүүдэй дунда сүлөөтэ барилдаанай түб болон олимпиин наадануудай халаан бэлдэхэ училищи байгуулха талаар сайдууд хэлсэхэ.
Михаил Мамиашвили анха түрүүшынхиеэ Буряад Улас ерэхэ юм. Ородой Холбоото Уласай Барилдаанай федерациин хүтэлбэрилэгшэ тамирай-спортын комплекс хүрэжэ, Буряадай түрүү тамиршад, һоригшод болон барилдаанай уласай федерациин түлөөлэгшэдтэй уулзаха түсэбтэй.
«Михаила Мамиашвилиин Буряад Улас ерэлгэ ехэ удха шанартай. Юундэб гэхэдэ, манай барилдаашад, манай барилдаанай һургуулида найдаһанаа мэдүүлнэ», - гэжэ Вячеслав Дамдинцурунов хэлэбэ.
Үсэгэлдэр, январиин 21-дэ, Красноярск хотодо Миндиашвилии нэрэмжэтэ академиин шанда хүртэхэ гэжэ барилдаагаар бүхэроссиин турнир түгэсөө гэжэ һануулнабди. Энэ хэмжээ ябуулга хадаа «Иван Ярыгин-2018» гэһэн мүрысөөндэ шэлэн абалгын шата болоһон байна. Буряадай тамиршад энэ мүрысөөндэ 12 медальда хүртэжэ, уласхоорондын турнирта хабаадаха 3 путёвкодо хүртөө.
Мэдээсэл:
Михаил Геразиевич Мамиашвили – СССР-эй болон Ород гүрэнэй греко-римскэ түхэлэй барилдаашан, Олимпиин наадануудай чемпион, СССР-эй спортын габьяата мастер, СССР-эй болон Ородой Холбоото Уласай габьяата һоригшо, Уласхоорондын барилдаанай федерациин гүйсэдхэхы хорооной гэшүүн, педагогикын эрдэмэй кандидат, Ородой Холбоото Уласай Барилдаанай федерациин хүтэлбэрилэгшэ юм.
Ородой Холбоото Уласай Барилдаанай федерациин архивһаа гэрэл зураг абтаба.
