732
Улаан-Үдэдэ гурбадахи хүүргэ тухай Буряад Уласай Засагай газарай мэдүүлгэ Ородой Холбоото Уласай Транспортын яаманда дэмжэбэ.
Үдэ гол дээгүүр баригдаха гурбадахи хүүргэ Сахьяновагай болон 3-я Транспортная гудамжанууд шадар баригдаха юм. Барилгын ажалнууд федеральна һанһаа гаргашалагдаһан мүнгөөр хэгдэхэ. Бүхыдөө энэ хэрэгтэ 5,5 миллиард түхэриг һомологдохо. 2018 ондо хүүргэ барилгын түсэлэй-тоололгын дансануудые бэлдэжэ эхилхэ гэжэ түсэблэгдэнхэй.
Буряад Уласай ниислэл хотодо хүүргэ бариха асуудалаар Москвада болоһон зүблөөнэй дүнгүүд тухай Буряад Уласай Транспортын, элшэ хүсэнэй болон харгын ажахы хүгжөөлгын сайд Сергей Козлов Засагай газарта үнгэргэгдэһэн брифингдэ хөөрэбэ.
- Ородой Холбоото Уласай Юрэнхылэгшын даабаряар Росавтодор болон Транспортын яаманда зүблөөнүүдые үнгэргөөбди. Тэрэнэй дүнгүүдээр Үдэ гол дээгүүр хүүргэ барилгын түсэлэй-тоололгын дансануудые бэлдэжэ эхилхэ тухай шиидхэбэри абтаа. Тус ажалнууд федеральна һанһаа һомологдожо, ажаһуугшад түлбэригүйгөөр энэ хүүргэ хэрэглэхэ аргатай байха юм, - гэжэ Сергей Козлов хэлэбэ.
Улаан-Үдэдэ баригдаха хүүргэ ниигэмэй удха шанартай болон эдэй засагай һалбарида аша үрэтэй гэһэн нэмэлтэ мэдээсэл Буряад Уласай Транспортын яаманай мэргэжэлтэд бэлдэнэ.
- Хүүргэ барилгада 5,5 миллиард һомологдохо гэжэ уридшалан тоологдонхой. Гурбан жэлэй туршада энэ түсэл бэелүүлэгдэхэ гэжэ түсэблэгдэнхэй, - гэжэ Буряад Уласай Транспортын, элшэ хүсэнэй болон харгын ажахы хүгжөөлгын сайд тэмдэглэбэ.
