Энэ долоон хоногто Орёл хотодо бүхэроссиин хэмжээнэй мүрысөөнүүд үргэлжэлбэ. Ородой чемпионадта түрүүлһэн тамиршадай нэрэнүүд январиин 21-дэ элирүүлэгдэбэ.
Шэлэн абалгын тус мүрысөөн тамиршадта февраль соо үнгэргэгдэхэ дэлхэйн чемпионадта хабаадахын тула үшөө нэгэ шата боложо үгөө. Энэ харюусалгатай мүрысөөндэ Буряадай харбагшад зургаан медаль абажа шадаа.
Эхэнэрнүүд сооһоо залуу Светлана Гомбоева ехэшүүлэй дунда анха түрүүшынхиеэ чемпионой нэрэ зэргэдэ хүртөө. Бэлигтэй басаган финалда Үбэр Байгалай хизаарай Саяна Цыремпиловае шүүжэ гараа. Буряадһаа уг гарбалтай, мүнөө үедэ Москва хотодо һуралсалаа үргэлжэлүүлжэ байдаг Ариуна Будаева энэ үбэлэй хаһада һайн дүнгүүдые харуулжа байна. Энэшье удаа Ариуна гурбадахи һуури эзэлхын тула мэдээжэ Инна Степановае шүүгээ.
Эрэшүүлэй дунда Буряадай түлөөлэгшэд үшөө хоёр медаль абаа. Эрдэм Ирдынеев финалда Үбэр Байгалай хизаарай харбагша Арсалан Балдановта шүүгдэжэ, хоёрдохи һуурида гараа. Эндэ хүрэл медальда Цырен Балтаков хүртэһэн байна.
Классическа номо һуршаар командна тоосоондо Буряад Уласай суглуулагдамал команда хоёр мүнгэн медальда хүртөө. Татьяна Бильтрикова, Наталья Эрдыниева, Виктория Будаева, Бальжинима Цыремпилов, Сергей Дашиев болон Баир Цыбекдоржиев гэгшэд командын түлөө харбаһан байна гээд хэлэе.
Блочно номо һуршаар харбалгада эхэнэрнүүдэй дунда шангай һууринуудые Буряадһаа уг гарбалтай хоёр тамиршад эзэлээ. Краснодарска хизаарта байдаг Диана Тонтоева болон Ямало-Ненецкэ тойрогой Виктория Бальжанова гэгшэд хоёрдохи-гурбадахи һууринуудта гараа.
Командна тоосоондо Алдар Цыбикжапов Москвагай түлөө харбаад, чемпион болобо. Ариуна Будаева командна харбаанда Москвагай басагадтай суг хамта гурбадахи һуури эзэлээ.
Январиин 25-да, залуушуулай болон эдиршүүлэй дунда Ородой чемпионат түгэсэхэ. Энээнэй удаа хэн США ошохоб гэжэ мэдэгдэхэ юм.
Борис Балданов