Байгша оной январиин 25–да Ородой Холбоото Уласай налог татабариин албанай Буряад Уластахи управлениин хүдэлмэрилэгшэд шэнэ жэлдэ хүсэндөө ороһон хубилалтанууд тухай хөөрэжэ үгөө.
Хүдэлэсэгүй зөөриин налогой гол хубилалта
Үнгэрһэн жэлэй декабриин 28-да Ородой Холбоото Уласай Юрэнхылэгшэ налог татабари тухай хуули хубилгаба. Тэрэнэйнь ёһоор, 2017 онһоо эхилжэ, газарай налог бага болохонь. Харин хүнгэлэлтэтэй бүлэгүүдэй хүнүүд 6 сотко (600 дүрбэлжэн метр) газарайнгаа түлөө нэгэшье түхэриг түлэхэгүй, хэрбээ тэрээнһээ ехэ газартай һаань, гансал үлүү гараһан талмайдань татабари тохогдохо юм.
Иимэ хүнгэлэлтэдэ ямар улад хабаатайб гэхэдэ, Советскэ Союзай Геройнууд, эрэмдэг бэетэй хүнүүд, бага наһанһаа хойшо эрэмдэг бэетэйшүүл, Эсэгэ ороноо хамгаалгын дайнай ветеранууд, наһанайнгаа амаралтада гараһан пенсионернүүд болоно. 2017 ондо гүрэнэй тэдхэмжэдэ гараһан зон баһал иимэ хүнгэлэлтэдэ мэдүүлгэ тушааха аргатай. Эдэ хүнүүд үмсэдөө гансахан лэ газартай байбал, тэрэнээ (6 сотко) 2017 оной налог татабариһаа сүлөөлхэ. Харин хэдэн газарай эзэд нэгэл газартаа налог татабариин хороолто хүүлэхэ болоно. Тиигэхын тула байгша оной июлиин 1 болотор ямаршье налог татабариин зургаанда мэдүүлгэ тушааха хэрэгтэй.
- Ородой Холбоото Уласай ажаһуугшад үмсынгөө зөөриин налогой асуудалаар гүрэнэй ямаршье налог татабариин инспекцидэ хандаха, мүн тиихэдэ интернедээр өөрынгөө кабинет нээжэ, тэндээ түлбэринүүд тухай мэдэжэ байха аргатай, - гэжэ тус албанай таһагые даагша Сергей Хандархаев мэдээсээ.
Олзо оршонууд тухайгаа мэдүүлхэ ёһотой зон
Үнгэрһэн жэлэй олзо оршонууд тухай 3-НДФЛ түхэлөөр налог татабариин тунхаглал (деклараци) удаадахи эрхэтэд байгша оной апрелиин 30 болотор тушааха болоно гэбэл:
- налог түлэдэг хубиин хэрэг эрхилэгшэд, нотариусууд, адвокадууд;
- 3 жэлэй туршада үмсэдөө зөөритэй байһанаа, тэрэнээ худалдажа, олзо олоһон эрхэтэд;
- үмсынгөө зөөри хүлһэлжэ, олзо олоһон хүнүүд;
- зөөри, унаагай хэрэгсэл, үнэтэ саарһануудые бэлэг абаһан эрхэтэд;
- ямар нэгэн лотерей нааданда шүүһэн зон.
Энэ налог татабариин шэнэ тунхаглал Ородой Холбоото Уласай налог татабариин албанай www.nalog.ru гэһэн сайт дээрэ толилогдонхой. Тэндэ хэншье тус данса бүтээхэ аргатай.
Иимэ тунхаглалаар налог түлэгшэд энэ жэлэй июлиин 15 болотор заатагүй түлбэриеэ оруулха ёһотой. Хэрбэеэ хууляар хараалагдаһан болзорто олзо оршонуудаа тунхаглаагүй һаа, ялада һууха гэжэ тэмдэглэлтэй. Харин гэр бараа худалдажа абаһан, эмшэлүүлһэн, һуралсал абаһан хүнүүд тус дансаяа жэлэй туршада тушааха аргатай.
Хиналтын-кассова оньһо хэрэглэлгын хубилалтанууд
Үнгэрһэн жэлдэ хиналтын-кассова оньһо (аппарат гэнэбди) хэрэглэлгэдэ хабаатай хоёр федеральна хуули хубилгагдаба. Нэгэдэхеэр, энэ оньһо хэрэглэхэ болзор ондоо болоо. Налог түлэгшэд мүнгэ оруулһые гэршэлһэн дансатай байбал, жэлэй туршада тус оньһо хэрэглэнгүй, ажалаа ябуулха аргатай. Зүгөөр 2018 ба 2019 онуудай июлиин 1-һээ ЕНВД (абажа боломоор олзын ниитэ нэгэн налогой) түхэлөөр түлэдэг хубиин хэрэг эрхилэгшэд заатагүй хиналтын- кассова оньһо хэрэглэхэ болоно.
Хоёрдохёор, хубиин хэрэг эрхилэгшэд шэнэ түхэлэй аппарат 18 мянган түхэригһөө дээшэ бэшэ сэнгээр худалдан абаха эрхэтэй. Мүн тиихэдэ тэрэ аппарадынь налог татабариин албанай реестр соо болон сайт дээрэнь 2017 оной февралиин 1-һээ 2019 оной июлиин 1 болотор хугасаада бүридхэлдэ абтанхай байха ёһотой.
Налог татабариин албанай хүдэлмэрилэгшэд эдэ бүгэдэ хубилалтанууд тухай мэдээсэлгын ажал ябуулжа эхилэнхэй.
Сэсэг ШОЙНХОРОВА