​«Ёохор наадан һайхан даа!»

Улаан-Үдэдэ “Бүхэдэлхэйн ёохор – 2018” гэһэн наадан Гомбо Цыденжапо­вай нэрэмжэтэ Буряадай гүрэнэй оперо болон бале­дэй академическэ театрай үмэнэ оршодог Театрай талмай дээрэ феврали­ин 16-дэ эмхидхэгдэхэ. 17 сагһаа хүтэлэн ябуулагшад улад зоноо наадандаа ури­жа захалха. 17.30–да нааданшье наярха.

Театрай талмай дээрэ ехэ экран тодхоогдожо, зо­ной һонорто Буряадһаа гар­балтанай амаршалганууд хаа-хаанаһаа дамжуулагда­ха. Хари гүрэнүүдтэ нюта­гаархиднай бусад яһанай хүнүүдые хатар наадандаа татажа хабаадуулха байха. Арадай заншалта хатар нааданда манай орон нютагай улад зонһоо гадна, Эрхүү мо­жын, Үбэр Байгалай буряа­дууд, тэрэшэлэн бусад олон хото городуудаар, улас оро­нуудаар Буряадһаа гарбал­тан хабаадаха гэжэ байна.

“Ёохор наадандаа урижа байнабди. “Хамаг дэлхэйн ёохор – 2018” үнэхөөрөөл бүхэдэлхэйн гэжэ үндэр нэрэдээ заатагүй хүрэхэ ёһотой”, - гээд эмхидхэгшэд арад зоноо нааданда хабаа­далсахыень урижа байна.

Бүгэдэ буряадуудай үндэһэн соёлой эблэл “Бу­ряад үнэн” Хэблэлэй байшан тус хэмжээ ябуулга үнгэргэнэ.

Түнхэнэй урайни ёохор

Набша hайтай модондо

Нарин хүхы донгодоо

Нара гараха сирэдэ

Тасяа шубуун донгодоо

Дабталга: Ёохой, ёохой яаа

Орожо наадая

Эшэ hайтай модондо

Эреэн шубуун донгодоо

Үүрэй сайха cирэдэ

Эрэ таcяа донгодоо

Дабталга: Ёохой, ёохой яаа

Орожо наадая

Шагай соcимо саhандаa

Шарга морёо шэрүүлээ

Шамай намай нааданда

Шаастай hайхан шэлүүлээ

Далайда ябахадаа

Онгосодоо найдая

Наадандаа ябахадаа

Ахайдаа найдая

Айдуусай (Ойхоной ёохор)

Далай манай hайхан даа

Далитай шубууд эрьестэй

Дайда манай hайхан даа

Айлшад мандаа эрьестэй.

Дабталга: Айдуусай ёроолоо

Айдуусай hайбарлаа.

Үнэгэн малгай hэхэлзээ

Үнэгэн ёрдоо hэхэлзээ

Үеын ахай hахалзаа

Ахай ёрдоо hахалзаа

Дабталга: Айдуусай ёроолоо

Айдуусай hайбарлаа

Шоно малгай hэхэлзээ

Шоно ёрдоо hэхэлзээ

Үеын дүүхэй hайбалзаа

Дүүхэй ёрдоо hайбалзаа

Дабталга: Айдуусай ёроолоо

Айдуусай hайбарлаа

Нарhан, нарhан налаашхаяа (Түнхэнэй ёохор)

Нарhан, нарhан налаашхаяа, налаашхаяа сааш

Нахилзасар хатараял даа,хатараял даа сааш

Номин торгон дэгэлээ, дэгэлээ, сааш

Намилзасар хатараял даа, хатараял даа сааш.

Хуhан хуhан налаашхаяа, налаашхаяа сааш

Хухарсарынь хатараял даа, хатараял даа сааш

Хүрин торгон дэгэлээ, дэгэлээ, сааш

Хубирсарынь хатараял даа, хатараял даа сааш.

Шэнэhэн, шэнэhэн налаашхаяа, налаашхаяа сааш

Шархирсарынь хатараял даа, хатараял даа сааш

Шара торгон дэгэлээ, дэгэлээ, сааш

Шуурасарынь хатараял даа, хатараял даа сааш.

Бохир, бохир хатарая (эхирэдэй ёохор)

Бохир, бохир хатаржа

Борьбын шалаа гаргая

Буха шэнгеэр зохоржо

Хоолойн шалаа гаргая.

Дабталга:

hэкүү, hэкүү, hэкүү hээш

hэкүү, hэкүү, hэкүү hээш.

Тохир, тохир хатаржа

Тахимай шала гаргая

Тахяа шэнгеэр зохоржо

Хоолойн шалаа гаргая.

Дабталга:

hэкуу, hэкуу, hэкуу hээш

hэкуу, hэкуу, hэкуу hээш.

Хотос, хотос хатаржа

Хүлэй шалаа гаргая

Хуса шэнгеэр зохоржо

Хоолойн шалаа гаргая.

Дабталга:

hэкуу, hэкуу, hэкуу hээш

hэкуу, hэкуу, hэкуу hээш.

«Осоо авиахим» (Совет үеын ёохор)

Ерыт, орыт ёохортоо

Ёохор наадан хуушаараа

Хуушарhыень шэнэлжэ,

Шэнэ ёохор хатарая

Дабталга: Манай Осоо

авиахим (эвээрээ)

Эсэсэрэй обороон яас

Сэлэнгэеэ оёорhоо

Сэнтэй шулуу бэдэрэе

Cэбэр сээжын оёорhоо

Сэнтэй зугаа бэдэрэе

Дабталга: Манай Осоо

авиахим (эвээрээ)

Эсэсэрэй обороон яас

Ангараяа оёорhоо

Алтан шулуу бэдэрэе

Алаг сээжын оёорhоо

Аятай зугаа бэдэрэе

Дабталга: Манай Осоо

авиахим (эвээрээ)

Эсэсэрэй обороoн яас

Арбагай (эхирэд-булагадай ёохор)

Арбагар эбэртэй гүрөөhэн

Абайн зонии шууюулба

(аась)

Ангир шара дүүхэймнай

Амитан зонии шууюулба

(аась)

Хондолой сагаан гүрөөhэн

Хоморгон зонии шууюулба

(аась)

Хонгор шара дүүхэймнай

Хамаг зонии шууюулба

(аась)

Ербэгэр эбэртэй гүрөөhэн

Ерэhэн зонии шууюулба

(аась)

Елэгэр hайхан дүүхэймнай

Ехээр зонии шууюулба

(аась)

Нэшүү (Агын ёохор)

Урдаhаа гараhан үүлэниинь

Урагшаа хойшоо таhарна

Урдуур hууhан залуушуул

Ерыт наашаа наадандаа

Дабталга:

Нэшүү, нэшүү, нэшүү нээш

Нэшүү, нэшүү, нэшүү нээш

Хойноhоо гараhан үүлэниинь

Хойшоо урагшаа таhарна

Хойгуур hууhан залуушуул

Ерыт наашаа наадандаа

Дабталга:

Нэшүү, нэшүү, нэшүү нээш

Нэшүү, нэшүү, нэшүү нээш

Урдуур hууhан бэреэдүүд

Ерыт наашаа наадандаа

Хойгуур hууhан хүбүүдүүд

Ерыт наашаа ёохортоо

Дабталга:

Нэшүү, нэшүү, нэшүү нээш

Нэшүү, нэшүү, нэшүү нээш

Айком (Баяндайн ёохор)

Асалаад хаяха үбhэндэ

Алаг морин дуратайемоо

Архи уухгүй ахайда

Амитан зониинь дуратайемоо

Дабталга:

Аяар холын айкомдоo

Байха нэрэм мэтэндээ

Галаа түлеэд hуухада

Галахан юунэй сэнтэйемааб

Газар дээрэ ябахада

Үетэн юунэй сэнтэйемааб

Дабталга:

Аяар холын айкомдоo

Байха нэрэм мэтэндээ

Хүлөөр гэшхээд ябахада

Хүхэ ногоон зоолыемаа

Хүүрээ хэлсээд ябахада

Өөрын нүхэд налагайемаа

Дабталга:

Аяар холын ай­комдоо

Байха нэрэм мэтэндээ.

Наадан дээрээ (Ойхоной ёохор)

Наадан дээрээ ерээбдил даа, ерээбдил даа сааш

Наадахаяа ерээбдил даа, ерээбдил даа сааш.

Ёохор дээрээ ерээбдил даа, ерээбдил даа сааш

Хатархаяа ерээбдил даа, ерээбдил даа сааш.

Буряад дайдам hайхыемэл даа, hайхыемэл даа сааш

Олон бэрхэ хүбүүдтэйемаа, хүбүүдтэйемаа сааш.

Байгал далай үргэемэл даа, үргэемэл даа сааш

Омули загаhаар баеыемал даа, баеыемал даа сааш.

А. Огороднигой гэрэл зурагууд