618
Байгалай хизаарай байгаали хамгаалгын түб газарта ажахы эрхилхые хориһон тобьёг хубилалгаха талаар дурадхал Буряад Уласай Засагай газар оруулба.
Москва хотодо Ородой Холбоото Уласай Федерациин Зүблэлдэ Буряад уласай үдэрнүүдтэ Байгал далайн асуудалнуудаар хэлсэбэ. Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураевай хэлэһэнэй ёһоор, Байгал далайн талаар асуудалнууд олон, тиигэбэшье уласай ниигэмэй-эдэй засагай хүгжэлтэдэ нүлөөлдэг зүйлнүүдые тэмдэглэмээр. Тодорхойлбол, Байгалай хизаарта хэгдэжэ байһан томо барилгануудта байгаали хамгаалгын экспертизэ үнгэргэхэ шухала.
«Тамирай талмай, хүүгэдэй сэсэрлиг болон фельдшерскэ-акушерскэ пункт бариха болоо һоо, байгаали хамгаалгын мэргэжэлтэ шүүдбэри үнгэргэхэ хэрэгтэй. Тиимэһээ түсэлнүүдые бэелүүлгын сэн дээшэлүүлэгдэнэ, түсэл зохёолгын болзор хоёр-гурбан һараар хойшологдоно.Тиихэдэ бюджедһээ һомологдоһон мүнгэнэй эрьесэһээ барилга үшөө жэлээр гү, али тэрэнһээ ехэ болзорто хойшологдоно», - гэжэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо хэлэбэ.
Энээнһээ уламжалан, уласай хүтэлбэрилэгшэд ниигэмэй удха шанартай барилга хэхэдээ, байгаали хамгаалгын мэргэжэлтэ шүүбэри үнгэргэхэгүй, тиихэдэ экспертизын хэгдэхэ болзор хоёр һараһаа дээшэ бэшэ болгохо тухай дурадхал оруулба.
Игорь Зураевай хэлэһээр, Ородой Холбоото Уласай байгаалиин нөөсэнүүдэй яаманда энэ талаар хуули бэлдэгдэнхэй.
Байгал далайгаар аяншалагшадай тоо жэлһээ жэлдэ олошорхо ушарһаа (жэлдээ 30 хубяар дээшэлнэ) Байгалай хизаарта ажахы ябуулхые хориһон тобьёгто хубилалтануудые оруулха тухай дурадхал уласай засаг зургаан оруулһан байна.
«Уласай болон нютагай засагай байгууламжын ниигэмэй-эдэй засагай хүгжэлтын удха шанартай Байгаалиин онсо харууһатай газарнуудта аяншалагшадай-рекреационно хангалгын байгууламжа хүгжөөхэ аргатай болохын тулай Ородой Холбоото Уласай Засагай газарай тогтоолдо хубилалта хэрэгтэй», - гэжэ Игорь Зураев тодорхойлбо.
«Байгалай хизаарта харууһалалгын нэгэдэмэл схемэ болон байгаалиин нөөсэнүүдые ашаглалга тухай» гэһэн тогтоол абаха тухай Буряад Уласай Засагай газар дурадхаһан байна. Тиихэдэ байгаалиин онсо харууһатай газарнуудта түлбэритөөр аяншалха арга тухай хуули бэлдэгдэнхэй гэжэ Игорь Зураев хэлэбэ.
«Манай һанахада, «Байгаалиин онсо харууһатай газарнууд тухай» гэһэн федеральна хуулида хубилалтануудые оруулха хэрэгтэй. Энэ талаар тусхай хуули бэлдэжэ, Ородой Холбоото Уласай Федеральна Суглаанай Ородой Холбоото Уласай Хуули тогтоолгын Зүблэлдэ оруулхабди. Энээниие дэмжэхыетнай гуйнаб», - Буряад Уласай Засагай газарай Түрүүлэгшын эдэй засагай хүгжэлтын талаар орлогшо сенаторнуудта хандаба.
Тэрэшэлэн эрдэмэй-шэнжэлэлгын ажалнуудые үнгэргэхэ хэрэгтэй гэжэ Игорь Зураев тэмдэглэһэн байна.
«Байгалай онсо шухаг экологическасистемэ, хүн болон байгаалиин харилсаан –эдэ бүгэдын талаар эрдэмэй-шэнжэлэлгын ажалнуудые үнгэргэхэ шухала. Байгалай омоли загаһанай үсөөн болоһон ушар, хаб загаһанай хохидолго, баклан шубуунай олошорһон ушар, Байгалай эрьедэ амидардаг амитад гэхэ мэтэ шэнжэлэгдэхэ», - гэжэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо хэлэбэ.
Сенаторнуудта хандажа, Буряад Уласай Засагай газарай оруулһан дурадхалнуудые дэмжэхыень Игорь Зураев гуйба.
«Шиидхэхэ асуудалнууд олон. Тиигэбэшье энэ талаар байдал тогтоногүй, асуудалнуудай зарим хубинь һүүлэй үедэ шиидхэгдэнэ. Оруулһан дурадхалнууд бэелүүлэгдэбэл, Байгал далай аршалха талаар, улас дотор ниигэмэй-эдэй засагай талаар байдал һайжаруулагдаха», - гэжэ Игорь Зураев тэмдэглэбэ.
Ородой Холбоото Уласай Федерациин Зүблэлэй хэблэлэй албанай гэрэл зураг
