863
Баледэй хатаршадай дунда мэдээжэ “Арабеск” гэһэн Екатерина Максимовагай нэрэмжэтэ мүрысөөндэ Буряадай оперо болон баледэй зүжэгшэд хабаадаха.
Байгша оной апрель һарада Тимур Дымчиков, Мегуми Сакано, Алиса Шикина болон Михаил Овчаров гэгшэд Пермь хото ошохо юм.
Екатерина Максимовагай нэрэмжэтэ Ородой Холбоото Уласай XV-дахи нээмэл мүрысөөнэй уран һайханай хүтэлбэрилэгшэ болон жюриин түрүүлэгшэ СССР-эй арадай артист Владимир Васильев юм. Тиихэдэ хабаадагшадай бэлиг талаангые уласхоорондын шүүгшэд сэгнэхэ. Нэрлэбэл, РСФСР-эй арадай артист Николай Боярчиков, РСФСР-эй арадай артистка Леонора Куватова, Ородой Холбоото Уласай арадай артистка Татьяна Предеина, мэдээжэ немец хатаршан, хатарай багша Дитмар Зайфферт болон бусад. Буряадай оперо болон баледэй уран һайханай хүтэлбэрилэгшэ Морихиро Ивата хабаадагшадай хатарха бэлиг талаан сэгнэхэ шүүгшэдэй тоодо оронхой.
Буряадай оперо болон баледэй театрай залуу хатаршад харюусалгата мүрысөөндэ бэлэдхэл эхилэнхэй. Мариус Петипэй 200 жэлэй ойдо зорюулагдаһан Баледэй үдэшэдэ залуу хатаршад бэлдэжэ байһан ажалһаа хэды хэһэг харуулха. Энэ хэмжээ ябуулга февралиин 9-дэ Буряадай оперо болон баледэй театрта үнгэргэгдэхэ юм.
Энээнһээ урид жэлнүүдтэ XI-дэхи “Арабеск” мүрысөөндэ Анастасия Цыбенова дипломантын нэрэ зэргэдэ болон Георгий Зоричой шанда хүртөө. 2016 ондо Харука Уэмура гурбадахи һуури эзэлээ. Михаил Овчаров болон Буряад Уласай габьяата артист Булыт Раднаев “Мүрысөөндэ хабаадагүй хатаарай эрхим партнёр” номинацида дипломоор шагнагдаһан байна гэжэ һануулнабди.
