714
Буряад Уласай инвестициин талаар сайдай тушаалда Алеф-Банкын вице-президент байһан Антон Виноградов томилогдобо. Энээн тухай тогтоол Буряад Уласай Толгойлогшо Алексей Цыденов үсэгэлдэр абаһан байна. Тиихэдэ Буряад Уласта инвестициин талаар яаман байгуулагдахагүй.
Буряад Уласта мүнгэ һомологшодые ерүүлхэ, гүрэнэй болон федеральна программануудта уласые хабаадуулха талаар ажалаа түрүүлэн ябуулха тухай сайд хэлэбэ.
«Энэ зорилго бэелүүлхын тула шэнэ программануудые анхарха федеральна яамануудай ажалай бүлэгүүдтэ оролсоноб. Буряад Уласай эдэ программануудта хабаадаха шухала», - гэжэ Антон Виноградов тайлбарилба.
Тиихэдэ Буряадай үйлэдбэринүүдэй мүнгэн һангай болон инвестициин талаар дутуу дундануудые элирүүлхэ, тэдэнэй мүнгэн һангай байдал һайжаруулха талаар ажал ябуулагдаха гэжэ сайд түсэблэнхэй.
«Үндэр технологиин ажалай һууринуудые уласта байгуулжа, улас үйлэдбэри дээшэлүүлхэ талаар ажал ябуулха хэрэгтэй. Энэ талаар технопарк бариха мүнгэ һомологшотой хэлсэжэ байнаб. Ниигэмэй-эдэй засагай уридшалан хүгжэлтын хизаарта технопарк баригдаха, тиимэһээ мүнгэ һомологшодто энэ талаар татабариин хүнгэлэлтэ байха. Буряад Уласай ажаһуугшад IT-технологиин һалбарида ажалтай болохо. Тиихэдэ цифровой эдэй засагай һалбари хүгжөөхэ түсэбтэйб, нэн түрүүн ниигэмэй һалбарида ажал хэгдэхэ. Элүүрые хамгаалгын һалбариһаа эхилхэ түсэбтэйб», - гэжэ сайд түсэбөөрөө хубаалдаба.
Байгша оной февраль һарада Буряад Уласта циклотрон, ядерна эмшэлэлгэ болон бог шорой элдүүрилхэ завод бариха талаар мүнгэ һомологшод ерэхэ. Буряад Уласай инвестициин талаар сайдай хэлэһээр, ядерна эмшэлэлгын можо хоорондын түб, pad-сканернуудые байгуулха, циклотрон бариха талаар ажал ябуулагдана.
«Энэ түсэлэй онсо шухаг шэнжэ гэхэдэ, Сибириин хизаарта иимэ түсэл үгы юм. Циклотронууд ганса Центральна федеральна тойрогто бии. Тэрэнэй ашаар, хабдартай, зүрхэ-һудаһанай, неврологическа үбшэнүүд эхин шатада элирүүлэгдэжэ, арга хэхээр юм. Буряад, Монгол гүрэнүүдтэ ядерна эмшэлэлгын программаар суг хамта ажал ябуулагдана. Зүүн Сибирьтэ Буряад Улас энэ һалбариин түб болгохо гэжэ хараалагдана. Ядерна эмшэлэлгын ашаар, элүүржүүлгын аяншалга хүгжэхэ. Энэ түсэлдэ хубиин инвестор мүнгэ һомолхо юм. Уласай бюджетһээ мүнгэн гаргашалагдахагүй!» - гэжэ Facebook хуудаһандаа Антон Виноградов бэшэһэн байна.
Улаан-Үдэдэ бог шорой элдүүрилхэ завод бариха талаар хари гүрэнэй инвестортой хэлсэгдэжэ байна. Тэдэнэр энэ түсэл бэелүүлгэдэ мүнгэ һомолхо юм.
«Оршон тойронхи байгаалида гай тодхор үзүүлэнгүй, немец технологи хэрэглэн, бог шорой элдүүрилэгдэхэ», - гэжэ сайд тэмдэглэбэ.
Антон Виноградовай хэлэһэнэй ёһоор, ганса гүрэн дотороо ажал ябуулха бэшэ, үшөө тиихэдэ хари гүрэнүүдэй инвесторнуудые хабаадуулха талаар ажал эмхидхэгдэхэ.
«Ородой Холбоото Уласай федеральна болон коммерческэ банкнуудта урьһаламжын болон мүнгэ һомололгын түсэлнүүдые бэелүүлһэн, корпоративна клиетнүүдтэй хүдэлһэн дүй дүршэлтэйб. Тиимэһээ эдэ зонуудые Буряад Уласта мүнгэ һомологшод болгохо талаар оролдохоб», - гэжэ сайд хэлэбэ.
Буряад Уласай Толгойлогшо Алексей Цыденов инвестициин талаар сайдай тушаал уласай засаг зургаанай дүүргэхэ үүргэ дууряанагүй гэжэ Facebook хуудаһандаа бэшэбэ.
«Нэн түрүүн, бидэ Буряадай олзын хэрэг дэбжүүлхэ болонобди. Хүгжэлтын талаар федеральна олон институдууд урагшатайгаар ажалаа ябуулдаг: Үйлэдбэри дэмжэлгын жаса, Бага олзын хэрэг эрхилэлгэ хүгжөөлгын жаса, Шэнэ юумэ нэбтэрүүлгын Сколково түб болон бусад. Эдэ бүгэдэ Москва хотодо ажалаа эрхилдэг, тиимэһээ манай олзын хэрэг эрхилэгшэд тэдэнэй түсэлнүүдтэ хабаадаха арга мэдэнэгүй, шаданагүй. Тиимэһээ олзын хэрэг эрхилэгшэдтэ туһалха хэрэгтэй. Уласай олзын хэрэг эрхилэлгэ хүгжэхын тула оролдохо болонобди.
Хоёрдохёор, олон инвесторнууд болон томо компанинууд Москвада ажалаа ябуулдаг. Тиимэһээ тэдэниие Буряад Уласай түсэлнүүдтэ хабадуулхын тула, тэдэнтэй уулзажа, хэлсэжэ байха хэрэгтэй.
Би олон жэлэй туршада олзын хэрэг эрхилэгшэдтэй ажал ябуулааб. Түрүүшын уулзалгаһаа, нюурай үнэмшэлгэһөө олон юумэн дулдыдадаг. Тиимэһээ сайдай тушаалтай хүнэй албанай хэрэгүүдые дүүргэхэдэ, ажал ябуулхада һураггүй урагшатай».
Мэдээсэл
Антон Виноградов 1985 оной мартын 18-да Киев хотодо түрэһэн юм. 1986 ондо тэрэ түрэлхидөөрөө Москва зөөжэ ерэһэн юм. Мүнгэн медальтайгаар гимнази дүүргэжэ, Плехановай нэрэмжэтэ Ородой Холбоото Уласай эдэй засагай университедэй менеджментын факультет улаан дипломоор Антон Виноградов дүүргэһэн намтартай. Ородой Холбоото Уласай юстициин яаманай Ород гүрэнэй эрхын академидэ юридическэ мэргэжэлтэй болоһон байна. Ородой Холбоото Уласай Юрэнхылэгшын дэргэдэхи гүрэнэй албанай академидэ аспирантурада һураа.
Антон Виноградов «Локо-Банк» компанида ахалагша вице-президентээр, «НОМОС-БАНКын» хүтэлбэриин даргаар, «Группа ВТБ» компанида ахамад менеджерээр хүдэлөө. Удаань «Алеф-Банкын» вице-президентын тушаалда томилогдоо.
Антон Виноградовай хубиин архивһаа гэрэл зураг абтаба.
