720
Байгша оной февралиин 5-да Буряад Уласай Толгойлогшо Алексей Цыденов Муяын болон Хойто Байгалай аймагуудта ошобо.
Тиин уласай хүтэлбэрилэгшэ Муяын аймагай Иракинда һууринай ажаһуугшадтай уулзажа, даабаринуудые үгөө. Энэ һуурин «Таксимо тосхон» гэһэн хотын һомондо ородог, аймагай түбһөө 70 модоной зайда оршодог юм. Эндэ 593 хүн ажаһуудаг, тэдэнэй ехэнхинь хуби ниилүүлһэн нээмэл «Бурятзолото» бүлгэмэй «Иракинда» уурхайда болон һургуулида хүдэлдэг. Хүдөөгэй үсөөн һурагшадтай бага һургуулида 47 шаби һурадаг.
Һургуулида уулзалга үнгэргэһэнэйнгээ удаа Алексей Цыденов 100 Мбит/с хурдан интернедтэй болон видеохолбоо бариха түхеэрэлгэтэй болгохоор мүнгэ һомолхо даабари уласай Болбосоролой болон эрдэм ухаанай яаманда үгэбэ. 2017 оной зун Иракинда һууринда опто-волоконно холбоо татагдаа гэжэ һануулнабди.
Мүнөөдэрэй байдалаар, Муяын аймагта Таксимогой болон Муяын Адагай һургуулинууд интернет холбоотой болонхой. Федеральна Суглаанда Ородой Холбоото Уласай Юрэнхылэгшын хандалга бэелүүлгын хэмжээндэ 2018 ондо аймагай эмшэлэлгын эмхинүүд интернедтэй болохо. Тодорхойлбол, Иракинда һууринай хоёр амбулатори болон Северомуйскын түргэн туһаламжын станци болоно. Тиихэдэ энэл жэлдэ Иракинда һууринай хүүгэдэй сэсэрлигэй заһабарилгада мүнгэн һомологдожо, эндэ 23 хүүгэд ябаха юм.
Эдэ үдэрнүүдтэ Алексей Цыденов Таксимо һууринай ажаһуугшадтай, залуушуултай, БАМай үмхирһэн гэрнүүдһээ зөөлгэхэ программада хабаадагшадтай уулзаха, аймагай амаралгын-зугаасалгын «Акварель» түбтэ хүрэхэ түсэбүүдтэй.
Февралиин 7-10-ай үдэрнүүдтэ Буряад Уласай Толгойлогшо Хойто Байгалай аймаг болон Северобайкальск хото хүрэжэ, ниигэмэй, соёлой удха шанартай эмхинүүдээр ябаха, ажаһуугшадтай уулзаха юм.
