​Амин шухала асуудалнууд Москвада хэлсэгдээ

Гүрэнэй Федеральна Суглаанай Федерациин Зүблэлдэ болоһон Буряад Уласай үдэрнүүд үрэ дүнтэйгөөр үнгэрөө гэжэ Арадай Хуралай һунгамалнууд мэдүүлбэ. Энэ хэмжээ ябуулгын үедэ ямар ажал хэгдээб гэжэ тэдэ уржадэр сурбалжалагшадта хөөрэжэ үгөө.

Арадай Хуралай Түрүүлэгшэ Цырен Доржиевай хэлэһээр, Буряад Уласай олон бэрхэшээлнүүд энэ уулзалгын һүүлээр шиидхэгдэхээр хараалагдана.

- Москва руу ганса манай Засагай газарһаа хүнүүд ошоо бэшэ, мүн олон һунгамалнууд гүрэнэйнгөө ниислэл хото зорижо, нютагайнгаа байдал ха­руулха гэжэ оролдоо. Хуралай хороо­нуудай бүхы түрүүлэгшэнэр энэ хэмжээ ябуулгада хабаадажа, аяар долоон зүблөөндэ элидхэл хэһэн байна, - гэжэ Цырен Доржиев хөөрэнэ. – Үдэрнүүдэй удаа тусхай тогтоол баталагдажа, Ород гүрэнэй Засагай газарта, яамануудта даабринууд үгтэхэ. Мүн манайшье талада тусхай даабаринууд даалгагдаха.

Арадай Хуралай Түрүүлэгшын мэдээсэһээр, энэ тогтоол февралиин 14-дэ баталагдаха болоно. Тэрээндэ Буряадай бүхы шухала асуудалнууд оруулагданхай.

Иихэдээ ехэл хэрэг бүтэжэ байна гээ­шэ. Юуб гэхэдэ, энэ дансада ажабайдалай бүхы һалбаринуудаар сэхэ даабаринууд оронхой. Жэшээлбэл, Улаан-Үдэдэ 2-дохи ТЭЦ, хүүгэдэй сэсэрлигүүдые барилга, һургуулинуудта һуралсалай гурбадахи ха­лааниие болюулха, хуушарһан усалай гэр­тэй хүнүүдые гэр байраар хангаха болон бусад амин шухала асуудалнууд ороо.

- Эдэ бүгэдэ хэрэгүүдтэ хүрэхэ мүнгэн һомологдохо бэзэ гээд найданабди, - гэжэ Цырен Доржиев хэлэнэ.

Гүрэнэймнай можо нютагуудай үдэрнүүд Федерациин Зүблэлдэ ходо боложо байдаггүй. Нёдондо оройдоол 10 хэмжээ ябуулга эмхидхэгдэһэн байна. Харин Бу­ряад Улас иимэ үрэ дүнтэй хэмжээ ябуул­гануудай эхи 2018 ондо табиба гээшэ.

- Зарим можо нютагууд Федерациин Зүблэлдэ үдэрнүүдые үнгэргэхэ гэжэ олон жэлдэ оролдожо байдаг. Харин манай хан­дахада, Федерациин Зүблэлдэ абаһаар лэ хараада абаа. Тиимэһээ Зүблэлэй бүхы гэшүүдтэ баяраа мэдүүлнэбди. Манай уласые түлөөлдэг гэшүүд Александр Вар­фоломеев болон Вячеслав Наговицын тэндэ аргагүй ехэ ажал ябуулжа байна. Тэдэнэй ашаар Зүблэлэй гэшүүд Буряад орон оло дахин ерэжэ үзөө. Манай уласые өөрын нюдөөр хараһан, байра байдал­таймнай танилсаһан гэшүүд аргагүйгөөр маанадые дэмжээ, - гэжэ Цырен Доржиев хөөрэнэ.

Буряадта хүүгэдэй сэсэрлигүүд, һургуулинууд дуталдана гэжэ олондо мэдэ­эжэ. Тэдэниие бодхоохо гэхэдэ, гүрэнэй бюджедэй мүнгэн хэрэгтэй болоно бшуу. Тус хэмжээ ябуулгын үедэ хэлсэһэнэй удаа энэ асуудал шиидхэгдэхэ тээшээ болобо.

Буряадай Арадай Хуралай Ниигэмэй бодолгын талаар хорооной түрүүлэгшэ Александр Стопичевой хэлэһээр, 2020 он болотор 7 һургуули Буряадта ба­ригдахаар хараалагдана. Мүн хүүгэдэй сэсэрлигүүдэй шиидхэгдээгүй асуудалнууд хараада абтаха.

Улаан-Үдэ хотодо 2-дохи ТЭЦ һэльбэн шэнэлжэ, шэнэ котёл табиха тухай асуудал табигдаһан байна. Арадай Хура­лай Эдэй засагай бодолгын, байгаалиин нөөсэнүүдые ашаглалгын болон оршон тойронхиие хамгаалгын талаар хороо­ной түрүүлэгшэ Анатолий Кушнарёвой мэдээсэһээр, Зүблэлэй суглаанда болоһон хөөрэлдөөнэй удаа зүбшөөл үгтэнхэй.

- Ганса дулаасуулгын талада анхарал хандуулагдаа. Зайн гал тухай шиидхэбэри һүүлдэнь хаража үзэхэбди гэжэ Ородой Холбоото Уласай сайд хэлээ. Шалтагаа­ниинь гэхэдэ, зайн галаар Буряад Улас дуталданагүй гэжэ тэмдэглэгдээ, - гэжэ Анатолий Кушнарёв хөөрэнэ.

Улаан-Үдын авиациин заводто шэнэ самолёт зохёон бүтээхэ тухай баһа хэлсэг­дээ. Үшөө нэгэ баяртай мэдээсэл гэхэдэ, сэбэрлэлгын түхеэрэлгэ одоолшье Улаан-Үдэдэ баригдаха.

Буряад Уласай Арадай Хуралай Гүрэнэй байгуулгын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хороо­ной түрүүлэгшэ Борис Ботоев тамуужа­най оролго-гаралгын газар һайжаруулха асуудалаар суглаанда хабаадаһан байна. Һүүлэй байдалаар, Буряад орондомнай зургаан иимэ газар тоологдоно.

- Зүблэлэй гэшүүдые ехэ гайхуулааб. Юуб гэхэдэ, Буряадай дэбисхэр дээрэ ор­шодог тамуужанай газарнууд эшхэбтэр байдалда ороод байна, - гэжэ Борис Ботоев хөөрэнэ. - Мон һууринай тамуужанай газа­рай байра 1960-аад онуудта бодхоогдоһон юм. Тиишээ хүрэхэ харгы муу болонхой. Харин нүгөө таладань, Ханх һууринда, бүхы харгынууд заһабарилагданхай, шэнэ байрын баригдаһые һая ошожо хараа һэм. Тиихэдээ манай гүрэнэй тала хэзээ энэ тамуужанайнгаа газар заһаха юм гэжэ бо­долдо абтааб.

Захаамин аймагай Айнек Гол гэһэн та­муужанай газар 2009 онһоо хүдэлнэгүй. Эндэ Монголһоо мал гаргажа, Захаа­минай мяханай комбинадта хэрэглэхэ­эр хараалагдаһан байгаа. Мүн Наушки һууринда тамуужанай газарай байдал до­ройтонги.

- Эдэ бүгэдэ газарнуудые заһабалнай, манай эдэй засагай байдал һайжарха һэн, - гэжэ Борис Ботоев тэмдэглэнэ.

Борис БАЛДАНОВ

Буряад Уласай Арадай Хуралай хэблэлэй албанай сайтһаа гэрэл зураг