788
Буряад Уласта «Ангара», «Байкалавиаком», «ПАНХ» болон «Бурятские авиалинии» авиакомпанинуудай хабаадалгатай «Байкал» гэһэн уласай нэгэдэмэл авиакомпани байгуулагдаха.
Улаан-Үдэдэ уласхоорондын аэропорт болон уласай авиаци хүгжөөлгын хэмжээндэ уласай «Байкал» авиакомпани байгуулха тухай хэлсэгдэһэн байна. Буряад Уласай Толгойлогшо Алексей Цыденов болон «Новапорт» холдингын хүтэлбэрилэгшэ Роман Троценко хоёр энээн тухай хэлсээ баталба.
«Буряад Уласай Засагай газарай үүсхэлээр, Нижнеангарск болон Таксимо һууринууд хүрэтэр хүнүүдые болон ниигэмэй удха шанартай ашаа авиацииин хүсөөр шэрэхэ зорилготой улас дотор хуби ниилүүлһэн «Авиакомпания «Байкал» бүлгэм байгуулагдаба. Компани бүридхэлдэ оруулха болон агаараар ашаа шэрэхэ зүбшөөл абаха талаар дансанууд бэлдэгдэнэ. 2018 оной августын 1-һээ шэнэ авиакомпани ажалаа эхилхэ гэжэ уридшалан хэлэгдэнэ», - гэжэ Буряад Уласай барилгын, элшэ хүсэнэй болон харгын ажахы хүгжөөлгын сайд Сергей Козлов хэлэбэ.
Буряад Уласай дэбисхэртэ юридическа нюур гэһэн данса бэлдэгдэжэ, авиациин хангалгын байгууламжа, Ан-24, Ми-8 түхэлэй агаарай онгосонуудай парк болон харгын зам байгуулагдана. Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшо Евгений Луковников болон транспортын сайд Сергей Козлов гэгшэд Ородой Холбоото Уласай транспортын сайдай орлогшо Александр Юрчиктай албанай хэрэгээр уулзажа, уласай авиакомпанида туһа хүргэхэ талаар хэлсэгдэһэн байна.
Мэдээсэл
Буряад Уласай хойто аймагууд хүрэтэр агаараар шэрэдэг авиакомпанинуудта 2017 онһоо уласай бюджетһээ тэдхэмжэ түлэгдэдэг. Энэ хадаа ажаһуугшадые агаарай транспорт һаадгүй хэрэглэхэ аргатай болгохо зорилготой юм. Тэдхэмжын ашаар Нижнеангарск хүрэтэр долоон хоногой гурба удаа, Таксимо хүрэтэр долоон хоногой хоёр удаа самолёт ниидэдэг болоо. Тиихэдэ Улаан-Үдэ – Нижнеангарск – Улан-Үдэ гэһэн замаар нэгэ зүг тээшээ биледэй сэн 6 мянга хүрэтэр, Улаан-Үдэ – Таксимо – Улаан-Үдэ замда нэгэ зүг тээшэ 7 мянга хүрэтэр сэн доошолоо. Буряад Уласай Толгойлогшын үүсхэлээр, 2017 ондо - 43,5 сая түхэриг, 2018 ондо – 60 сая түхэриг улас доторой авиацида мүнгэн тэдхэмжэ үзүүлхэ талаар уласай бюджедтэ хараалагданхай.
