607
Буряад Уласай Толгойлогшын болон Засагай газарай хэблэлэй албанай мэдээсэһэнэй ёһоор, Бэшүүрэй наранай элшын зайн галай станци түрүүшын һарада 423 мянган кВт/ч зайн гал үйлэдбэрилһэн байна.
Бэшүүр аймагта 10 МВт хүсэтэй наранай элшын зайн галай станци 2017 оной ноябриин 13-да ашаглалгада тушаагдаһан юм. Тэрэнэй барилгада «Хевел» компани (гүрэнэй «Ренова» корпораци болон хуби ниилүүлһэн РОСНАНО бүлгэмүүдэй суг эмхи) мүнгэ һомолжо, барилга ябуулаа. Тиихэдэ зайн галай станциин барилгада 1 миллиард тухай түхэриг һомологдоо. 2017 оной һүүл багта зайн гал бөөнөөр худалдадаг дэлгүүртэ «Хевел» компаниин наранай элшын зайн галай 12 станци хүдэлжэ байгаа. Бэшүүрэй станци зайн галай бөөнөөр худалдаанай дэлгүүртэ 2017 оной декабриин 1-һээ хүдэлжэ эхилээ.
2017 оной ноябрь һарада Буряад Уласай Засагай газар болон «Хевел» компани улас дотор наранай элшын зайн гал үйлэдбэрилгэ хүгжөөхэ тухай хэлсээ баталһан байна. Хэлсээнэй ёһоор, 150 МВт хүсэтэй наранай элшын станцинууд баригдаха. Бэшүүрэй наранай элшын зайн галай станциин ашаглалгада тушаагдаха баяр ёһололдо Буряад Уласай Толгойлогшо Алексей Цыденовэй хэлэһээр, Ородой Холбоото Улас дотор Буряад Улас наранай элшын хүсэнэй станци барилгаар түрүүшүүлэй тоодо.
«Бэшүүр аймагта наранай элшын станци таһалгаряагүй, найдамтай зайн галаар хангалга дээшэлүүлхэ, оршон тойронхи байгаали һайжаруулха талаар нүлөөлхэ», - гэжэ Алексей Цыденов тэмдэглэбэ.
Буряад Уласай холо оршодог аймагуудта зайн галаар хангаха талаар иимэ түсэл бэелүүхэ арга боломжонууд хараалагдана.
