​Гүрэнэй хэмжээндэ эрхимлээ

"Хараасгай" бүлгэмэй архивһаа абтаһан гэрэл зураг

Аха аймагай хүүгэдэй уралигай һургуулиин “Хараасгай” бүлгэм ара­дай хатараар Россиин чемпионадта хоёрдохи һуури эзэлжэ, Буряад ороноо суурхуулба. Энэ урилдаан үнгэрһэн һарын эсэстэ Ородой Холбоото Уласай ниислэл Москва хотодо боложо үнгэрөө юм.

“Космос” гэһэн зочид буудалай то­глолтын танхим соо эмхидхэгдэһэн энэ мүрысөөндэ гүрэнэймнай 25 хотоһоо 42 бүлгэмэй бүридэлдэ оро­дог мянгаад үхибүүд хабаадалсаа. “Хараасгай” бүлгэм харагшадта “Ёо­хор”, “Талмай дээрэ” гэһэн хатарнуу­даа харуулжа, хүн зониие баяр­луулба.

Ородой Холбоото Уласай Гүрэнэй Дүүмын һунгамал Алдар Дамдинов үхибүүдэй коллективтэй уулзажа, Ахын эдир хатаршадые амаршалһан байха юм.

Үнгэрһэн жэлэй апрель һарада тус урилдаанай ээлжээтэ шатада Новосибирск хотодо үнгэргэгдэһэн Сибириин федеральна тойрогой мүрысөөндэ “Хараасгай” бүлгэм эр­химлэжэ, гүрэнэй хэмжээндэ бэлиг талаанаа харуулха эрхэдэ хүртэһэн байгаа. Тиихэдэ уласхоорондын фестивальда дүшөөд бүлгэмүүд хабаадаһан юм.

«Хараасгай» бүлгэм 2009 ондо хүүгэдэй уралигай Өөрлигэй һургуулиин дэргэдэ байгуулагдаһан түүхэтэй. Хатарша 45 үхибүүдэй коллективые бэлигтэй багша Ва­лентина Ринчинова ударидадаг. Холын замда зориһон үхибүүдые аймагай дарга Матвей Мадасов, һунгамалнуудай зүблэл, тэрэнэй дарга Мүнхэ-Жаргал Ошоров, соёлой хэлтэсэй ударидагша Зоригто Цыби­ков, эдиршүүлэй түрэлхид дэмжэжэ, мүнгөөр хангаһан байна.

Бэлигтэй хүүгэдэй зохёохы саа­шанхи ажалдань амжалта хүсэе.

Василий ЦЫБИКОВ, Туяна ДОНДОКОВА