Хэжэнгынхид түрүүлээ ( Д. Дашдорж, В. Максимов, О. Бадмацыренов, Арюна Дашдорж)
Буряад угсаатанай ажаһуудаг нютаг нютагуудай эблэлнүүдэй дунда буряад шатар нааданай мүрысөөн Улаан-Үдэ хотодо сагаалганда зорюулагдадаг тэмсээн заншалтай юм. Энэ удаа тус хэмжээ ябуулга февралиин 4-дэ болоһон байна.
Мүрысөөнэй нарин бэшэгшэ Владимир Агафоновой хэлэһээр, энэ тулалдаануудта Буряадай ниислэлдэ гү, али дүтын нютагуудта ажаһуудаг тамиршад хабаададаг заншалтай. Тиигэжэ 2017 ондо 26 команда тус мүрысөөндэ хабаадаһан аад, мүнөө жэлэй наадануудта оройдоол 18 команда хаба шадалаа туршаба.
Үшөө нэгэ голхоролтой ушар гэхэдэ, мүрысөөнэй шан нёдондонойхидо орходоо, нилээд доошолһон байна. Ямар шалтагаанһаа иимэ байдал тохёолдооб гэжэ хэншье мэдэнэгүй.
- Команда бүхэн табан хүнһөө бүридөө. Тэрэ тоодо хоёр эрэшүүл, нэгэ эхэнэр, нэгэ аха захатан, һургуулиин нэгэ шаби оролсоно. Мүнөө жэлдэ нааданай шэнэ гурим зохёогообди. Тиимэһээ дүрбэн ондоо тулалдаануудые нэгэ доро үнгэргэжэ, бүлэг бүхэндэ шалгарһан шатаршад шангуудта хүртөө, - гэжэ Владимир Агафонов хөөрэнэ.
2017 ондо түрүүлжэ гараһан Баргажан нютагаархидай эблэл мүнөө жэлэй наадануудта хабаадаагүй гэжэ хэлэлтэй. Нёдондо 2-дохи һуури эзэлһэн ивалгаархинай командын бүридэлдэ бүхы шатаршад һэлгэгдээ. Хэды тиигэбэшье, тэдэнэй 4-дэхи һуури эзэлжэ шадаһаниинь гайхалтай.
3-дахи һуурида Захаамин нютагаархин гараа. Цыбикжап Туртуев, Солбон Санжеев, Тунгалаг Жигжитова, Константин Балханов болон Очир Гочеев гэгшэд Захааминай түлөө наадабад.
Баяндайн нютагаархидай эблэлэй гэшүүд 2-дохи һуури эзэлээ. Баир Буруев, Тарас Минтаханов, Туяна Ботоева, Игорь Брылев, Чындыгыр Тамерлан гэгшэд булта 29,5 очко абажа шадаа. Эдээнтэй тон адли очконуудые түрүү һуури эзэлһэн Хэжэнгэ нютагай эблэлэй команда абаһан байна. Олег Бадмацыренов, Дашинима Дашдорж, Арюуна Дашдорж, Вадим Максимов, Кирилл Базырцыренов гэгшэдэй нэмэлтэ очко үлүү байшоо. Тиимэһээ хэжэнгээрхин 1-дэхи һуурида гараа гэжэ ойлгуулая.
Эрэшүүлэй дунда мүрысөөндэ Олег Бадмацыренов чемпионой нэрэ зэргэдэ хүртөө. Олег хадаа уласхоорондын мастер юм. Тэрэ буряад шатараар Сурхарбаанай наадануудта, “Алтарганада” хабаадажа, түрүү һууринуудые эзэлдэг заншалтай.
Эгээл шанга тулалдаан аха захатанай дунда болоо гэжэ тодороо. Юуб гэхэдэ, Анатолий Рушаков болон Игорь Брылев мүрысөөнэй түгэсхэлдэ адли 7 очко абаа. Энэ ушарта нэмэлтэ очконууд тоологдожо, Сэлэнгэ аймагай нютагаархидай эблэлэй түлөөлэгшэ Баяндайн шатаршанһаа түрүү гараба.
Баяндайн түлөөлэгшэ Туяна Ботоева һүүлшын шатада 9 наһатай Мария Хамнуевада шүүгдэбэшье, 1-дэхи һуури эзэлээ. Аяар табан шатаршан чемпионһоо нэгэ очкогоор гээгдэбэ. Эндэ Ивалгын Людмила Абзаева болон Захааминай Тунгалаг Жигжитова гэгшэд шангай һууринуудые эзэлбэ.
Һургуулиин шабинарай дунда Ивалгын Бато Эрхитуев оройдоол һүүлшын 9-дэхи шатын удаа 1-дэхи һуурида гараһан байна. Һурагшадай дунда һонирхолтой наадануудай шата бүхэндэ түрүүлһэн шэнэ тамиршан ябаа гээд хэлэлтэй.
Бато Эрхитуев (зүүн гарһаа) илалта туйлаа