Февралиин 6-да Зэдэ аймагай Петропавловка һууринда Буряад Уласай Арадай Хуралай Эдэй засагай бодолгын, байгаалиин нөөсэнүүдые ашаглалгын болон оршон тойронхиие хамгаалгын талаар хорооной һунгамалнууд нүүдэл суглаа үнгэргэбэ. Суглаанай урда арадай һунгамалнууд Анатолий Кушнарёв, Владимир Бураев, Сергей Пашинский, Татьяна Берлина, мүн тиихэдэ уласай Байгаалиин, Барилгын яамануудай, Тоололгын палатын түлөөлэгшэд Петропавловкын уһа сэбэрлэдэг БР- 200 гэһэн үйлэдбэри болон эг богоо мүнөө хаядаг, ерээдүйдэ эг бог хадагалха гэжэ баригдажа байһан газарнуудые хараа.
Зэдэ мүрэн Захаамин, Түнхэн болон Монголой Хүбсэгэл аймагуудай уулзууртахи домогто Уран Дүшэ уулаһаа эхиеэ абажа, Зэдэ, Захаамин аймагуудаар олон тоото гол горхонуудай уһаар баяжан урдажа, Байгал далайда шудхадаг эгээл ехэ Сэлэнгэтэеэ ниилэнэ. Тиимэһээ Байгал далайн ариг сэбэрые сахилгада Зэдэ гол ехэ удха шанартай. Зүблэлтэ засагай үедэ СССР гүрэнэй аюулгүйе хамгаалгада айхабтар ехээр нүлөөлһэн Зэдын комбинат Зэдые ехээр бузарлаһан гээшэ. Тэрэ хойшолонгые усадхаха ажал һүүлэй үедэ гүрэнэй талаһаа ехээр дэмжэгдэжэ, мүнгэ санган яһалаар һомологдоо. Тэрэ ажал хэр ябуулагдааб, мүнөө Закаменск хото болон бэшэ һуурин тосхонууд Зэдэ руу муу юумэ оруулнагүй гү гэжэ Захаамин аймагай түлөөлэгшэдые Арадай Хуралай хороондо һаяар шагнаха юм.
Зэдэ аймаг Захаамин шэнги ехээр Зэдэеэ бузарлаагүй юм ааб даа. Гэбэшье, илангаяа Петропавловка һуурин баһал нилээн муу муухайгаа оруулһан байха юм. Байгал далайн ариг сэбэрые сахиха Федеральна түсэлөөр уһа сэбэрлэхэ мүнөө үеын БР-200 станци аймаг абажа тодхоо. Арадай һунгамалнууд энэ станциин ажалтай танилсахадаа, эндэ уһан яһалал сэбэрлэгдэнэ гэжэ сэгнээ. Анатолий Григорьевич өөрөө буужа, сэбэрлэгдэһэн уһа амталжа үзөө. Эндэ манай сурбалжалагша станциие даагша Артём Павловтай хөөрэлдөө:
- Артём Викторович, бузарлагдаһан уһан хайшан гэжэ эндэтнай сэбэрлэгдэнэб гэжэ хөөрыт даа.
- Түбэй коллекторһээ бохир уһан эндэ шүүрдүүлэн шудхана. Тиигэжэ гол түлэб ехэ бага бог шорой, саарһа гуурһанһаа, хууха, шэл мэтэһээ арилгагдана. Тиигээд резервуарнуудта сэбэрлэгдэнэл даа.
- Энээн тухай хөөрэжэ үгыт.
- Эдэ резервуарнууд соо хэдэн часаар сэбэрлэгдэнэ. Эндэ амиды жэжэ бодосууд - бактеринүүд ажал хэнэ. Тэдэниие амиды байлгажа, ажал хүүлэхэ гээшэ манай гол зорилго юм. Тиихын тулада тэдэнэй амидарха температура үргэлжэ тогтууритайгаар бариха хэрэгтэй. Ёһотоороо +7 градус хүрэтэр уһанай температура унабал, тэдэ бодосууд үхэхэ болоно.
- Таанад хэды температура баринат?
- Бидэ +9 градусһаа доошо буулганагүйбди. Эндэмнай ходо хэмжэгдэжэ, олон түхеэрэлгэнүүд хаража, шалгажа байдаг. Өөһэдөөшье нарин нягтаар шалганабди. Тусхай дэбтэртэ хуу тэмдэглэжэ байдагбди.
- Зай, эдэ жэжэ бодосуудай ажалаа хэжэрхихэдэ, саашадаа юун болоноб?
- Тэдээндэ сэбэрлүүлэгдэһэн уһан үшөө хара нүүрһээр баһал хэдэн часай туршада сэбэрлэгдэнэ. Саашадаа ультрафиолетовэ лампануудта сэбэрлэгдэнэ. Тиигээдшье энэ уһан сэхэ урадхуулагдангүй, тон ехээр малтагдаһан нүхэндэ нуур боложо тогтоно. Мүнөөдэр тэндэ Анатолий Кушнарёв өөрөө уһан һайнаар сэбэрлэгдэнэ гэжэ этигээ. Тиихэдэ үшөө энэ нуур соогоо загаһа үсхэбэрилхэдэ, тэдэл энэ уһанай сэбэрые бодотоор гэршэлжэ, ажамидархада хорогүй уһан гэжэ гэршэлхэ юм.
Бог шоройн асуудалнууд
Петропавловкын бог шоройгоо хаядаг газарые харахада, ехэл хүндэ байба. Эзэгүй ехэ газарта элдэб янзын эг бог дүүрэн хэбтэнэ. Зарим тээ ууяжа, гашуун утаан һуунагтана. Зэдэдэ мүнөө жэл саһан үгы, тиимэһээ бүришье муухайгаар бог шоройниинь харагдана. Энэ юун дээрэһээ болоноб гэхэдэ, эндэ эзэн үгы. Ямаршье олзын хэрэг эрхилэгшэд өөртөө олзогүй хэрэг эрхилхэгүй ха юм даа. Хэды тиигэбэшье, аймагай захиргаан зунай дунда һарын эхилтэр энээнээ этэжэ, даража, үгы хэхэбди гэжэ найдуулаа.
Тиигээд богоо хадагалхын тула барижа байһан шэнэ газарынь харабабди. Яһала ехэ ажал хэгдэһэн, хэдэн байшанууд, байранууд баригдаһан аад, хүсэндөө хүргэгдөөгүй байба. Үшөө 5 сая түхэриг хэрэгтэй гэжэ нютагай засагаархин Буряад Уласай Засагай газарта, Арадай Хуралда хандажа байһанаа мэдүүлбэ. Апрелиин 1 болотор ажалаа дүүргэжэ, энэ барилгаяа тушаагаагүй болбол, гүрэнһөө үгтэһэн мүнгэ гэдэргэнь тушааха ёһотой. Тиигээд үшөө яла салань даашагүй хүндэ юм байха. Тиигээдшье, амин шухала асуудал шиидхэгдэнгүй орхигдошохо – газар дайдаяа бузарлуулхаяа болижо шадахагүй болоно ха юм!
Харин тиихэдэ хууха болон целлофан амһартануудые буйлуулжа, барилгада хэрэгтэй плиткэнүүдые гаргаха арга байна. Иимэ ажал “ИП Беломестных” гэжэ хубиин хэрэг эрхилэгшэ эхилһэн аад, ханшандань хүргэжэ шадаагүй. 3 сая түхэриг Россельхозбанкһаа урьһалжа, аяар Уфа хотоһоо мүнөө сагай хэрэгсэл худалдан абажа тодхоод, плиткэнүүдые гаргажа эхилээ. Петропавловкын гол үйлсэнүүдэй ябаган харгые дэбдеэшье. Теэд оршо-гаргаша гээшые мүнөө сагта тэнсүүлхэнь хүндэ. Саарһа дансаяа баһал хүсэлдүүлхэ гээд лэ тойбонууд олон юм ха. Мүнөө сагта тон хэрэгтэй энэ хэрэгые унтараангүй үргэлжэлүүлхэ, али болохоор энэ хубиин эрхилэгшэдэ туһа хүргэхэ гэжэ арадай һунгамалнууд шиидээ.
Такси шэрдэхэ асуудал
Арадай һунгамалнуудай бууһан ушараар дашарамдуулан, зэдээрхин үшөө нэгэ шухала асуудал һунгамалнуудай урда табяа. Ганса Петропавловкадашье бэшэ ааб даа, бүхы аймагуудта мүнөө сагта таксиин асуудал хурсаар табигданхай гээшэ. Хэдэн жэлэй саана таксинуудые шараар шэрдэхэ гэһэн шиидхэбэри гаргагдаа һэн. Харин хүдөөгэй аймагуудта энэ хэрэгтэй юм гү? Энэмнай баһал гарзатай хэрэг. Такси гэжэ мэдэхээр, шара тэмдэг хээд ябахада болохогүй юм гү гэһэн асуудал хаража үзыт гэжэ арадай һунгамалнуудта хандаа.
Сэнгэ РИНЧИНОВ
Сэнгэ Ринчиновэй гэрэл зураг