Буддын шажанай заншалта Сангха “Эхэ хэлэн – манай баялиг” гэжэ урилдаа үргэлжэ эмхидхэнэ. Һара бүри үхибүүдые асарха абаашахаһаа, эдеэлүүлхэ ундалуулхаһаа эхилээд, гаргаша ехэтэй аабза. Теэдшье буряад арад үхибүүдтээ мүнгөө гамнадаггүй гүб даа гээд, Эрхүүһээ үхибүүдые 11-дэхиеэ дахуулан асаржа байгаа Үбэсын һургуулиин нэмэлтэ һуралсалай багша Серафима Балданова тэмдэглэбэ. Февралиин 9-дэ 22-дохи удаагаа үнгэрһэн урилдаанда эхин ангиин 6 багашуулые тэрэ асаржа хабаадуулаа.
Хэбэд номхон Хэжэнгын Серафима Николаевна Үбэсын бэри болодог. Хатархашье, дуулахашье бэлигтэй ульгам буряад хэлэтэй залуу басаган хадамуудтаа ехэ хүндэтэй. 2014 онһоо “Эхэ хэлэн – манай баялиг” гэжэ урилдаанда үхибүүдые үргэлжэ асарна. Тиихэдэнь бүхы түрэлхидынь, нютагай зон, нүхэдынь туһалдаг юм байна.
- Үхибүүдэй гэртэхин харгын гаргаша даажа абана. Бэшэ мүнгыень нютагай зон үгэдэг. Зариман 500, 1000 түхэриг һайн дураараа асараад барюулна. Зоригто ламамнай бидэндээ баһал туһалһаар. Иигэжэ бидэниие дэмжэжэ байхадань, яагаад хабаадангүй байхабибди? - гэжэ Серафима Николаевна бахархал дүүрэнээр дуулгаба.
Залуу багша ерэхэ бүридөө ондо ондоо үхибүүдые асархаяа оролдоно. 2014 онһоо 40-өөд багашуулые хабаадуулаа. Эгээл һайн дүн 2015 ондо туйлажа шадаа. Тиихэдэ 3-дахи һуури эзэлһэн байна.
Эрхүү можын эдэбхитэй бүлгэм Буряадай гүрэнэй телевиденидэ үнгэрдэг урилдаанда ходо оролсоно. Энэшье удаа уригдаа. Настя Трубачеева, Юра Хамаганов, Доржима Балданова, Вика Пахалеева, Арина Пиханова, Вика Балдаева гэгшэд бусадһаа дутуугүй һайнаар асуудалнуудта харюусаа.
- 26-дахи һуури эзэлээбди. Минии һанахадаа, һайн дүн. Жэнхэни буряад хэлэтэй Хэжэнгын үхибүүд хойномнай үлөө ха юм, - гэжэ Серафима Балданова тэмдэглэбэ.
Эдэ үхибүүдээ урмашуулан, урилдаанай удаа Серафима Николаевна Улаан-Үдэ хото харуулдаг, гоё һайхан газарнуудаар ябуулдаг, амтатай эдеэ эдюулдэг заншалтай байна. Тиимэһээ үхибүүд ехэ дуратайгаар хабаададаг байна.
Сарюуна ЭРДЫНЕЕВА