​Буряад Уласай Толгойлогшо Алексей Цыденов – Ивалгын дасанда

Үсэгэлдэр, февралиин 18-да, Буряад Уласай Толгойлогшо Алексей Цыденов XXIV дүгээр Бандида Хамба лама Дамба Аюшеевэй урилгаар Ивалгын дасан хүрэбэ.

Уласай хүтэлбэрилэгшэ шэнын гурбанай уншалгада хабаадажа, удаань Этигэлэй Хамбада мүргэһэн байна. Тэрэнэй һүүлээр Алексей Цыденов Хамба ламада сагаалжа, Буряад Уласаа, буряад хэлэ, соёл, хүдөө ажахы болон тамир яажа хүгжөөхэб, ажаһуугшадай байдал һайжаруулхаб гэжэ хэлсэбэ.

Энээн тухай Буряад Уласай Толгойлогшын болон Засагай газарай захиргаанай хүтэлбэрилэгшэ Баир Цыренов Буряад ФМ радиодо хэлэһэн байна:

- Мүнөө иимэ гоё, сэлмэг үдэр Буряад Уласай Толгойлогшо Бандида Хамбо лама Дамба Аюшеевта сагаалжа, уулзажа байна. Уласай хүтэлбэрилэгшэ шэнэ жэлээр амаршалжа, Этигэл хамба ламада мүргөө. Тиигээд яаралгүй халуун сай уужа, сагаан эдеэ эдижэ, хоюулаа хөөрэлдэжэ байна. Хоюулаа Буряад арадай тулөө һанаагаа зобоно, хайшан гээд буряад хэлээ, соёлоо, хүдөө ажахые, тамир, хүнэй ажабайдал һайн болгоохоб, хүгжөөхэб гэжэ һаналаараа хубаалдана. Ондоо юумэн байхагүй!

Анна Огороднигой гэрэл зураг