593
Улаан-Үдэдэ үнгэргэгдэхэ Байгал далайда аяншалга болон уһанай транспорт хүгжөөхэ талаар эмхинүүд хоорондын суглаанда Ородой Холбоото Уласай транспортын сайд Максим Соколов болон тэрэнэй орлогшо Виктор Олерский ерэхэ юм. Тиихэдэ Евразиин эдэй засагай хороондо ородог гүрэнүүдэй сайдууд Улаан-Үдэдэ уулзаха. Казахстан, Беларусь, Армени болон Кыргызстанай түлөөлэгшэд ерэхээр хүлеэгдэнэ. Энээн тухай Буряад Уласай Толгойлогшо Алексей Цыденов хэлэбэ.
«Ородой Холбоото Уласай Транспортын сайд Максим Соколовтой уулзажа, «Аюулгүй, һайн шанартай харгынууд» гэһэн түсэлөөр, Улаан-Үдэдэ баригдаха гурбадахи хүүргэ тухай хэлсээбди. Максим Соколов Засагай газарай түрүүлэгшэдэ эдэ асуудалнуудаар элидхэл оруулба. Энэ хадаа Байгал далайн, уласай уһанай транспорт болон авиаци хүгжөөлгын талаар хэгдэжэ байһан ажалай үргэлжэл болоно. Бултанай мэдэһээр, Ород гүрэнэй транспортын яамана манай түсэлнүүдые дэмжэнэ. Уридшалһан мэдээгээр, транспортын сайд албанай хэрэгээр манай улас ерэхэ тухайгаа мэдүүлээ. Тиихэдэ Евразиин эдэй засагай хороондо ородог гүрэнүүдэй сайдууд Улаан-Үдэдэ уулзалга эмхидхэгдэхэ», - гэжэ уласай хүтэлбэрилэгшэ тэмдэглэбэ.
2017 оной сентябрь һарада Виктор Олерский Буряад Улас албанай хэрэгээр ерэһэн байна гэжэ һануулнабди. Сентябрь һарада үнгэргэгдэһэн суглаанда уһанай транспорт хүгжөөхэ асуудалаар зүбшэһэн байна. Тиихэдэ Эрхүү можо болон Буряад Уласай нютагуудай хоорондо уһанай транспорт ябуулдаг болохо, хүршэ можо нютагуудай энэ уһанай транспортын арга боломжо дүүрэн ашаглаха тухай хэлсэгдээ. Ородой Холбоото Уласай транспортын сайдай хэлэһээр, Буряад Уласта ганса эдэй засагай һалбарида бэшэ, харин тиихэдэ байгаали хамгаалгын асуудалнуудаар аша үрэтэй 17 хэмжээ ябуулганууд эмхидхэгдэхэ.
«Үнгэрһэн жэлдэ тус ажалай бүлэгүүдэй абтаһан шиидхэбэринүүдээр мүнөө Байгал далайда ябаһан онгосонуудһаа бог шорой болон нефтиин зүйлнүүдтэй уһа суглуулха тусхай онгосын барилга эхилээ. Байгалай долги эбхэржэ, онгосо хушажа, тэндэ сугларһан уһан далайда хаягдана. Нефтиин зүйлнүүдтэ уһа суглуулан абаха пунктнууд манай уласта үгы», - гэжэ Алексей Цыденов хөөрэбэ.
Буряад Уласай хүтэлбэрилэгшын хэлэһээр, иимэ уһанай онгосо гансал Эрхүү можодо бии.
«Ганса онгосо хаанаш хүрэхэгүй гэжэ ойлгосотой. Тиимэһээ нефтиин зүйлнүүдтэй уһа суглуулан абаха онгосо байбалнь, Байгал далайда хаягдаһан бузартай уһанай хэмжээн доошолхо һэн. Ажалай энэл бүлэгэй шиидхэбэреэр Түрхын портдо уһанай эрье гүнзэгырүүлхэ гэжэ түсэблэгдэнхэй. Энэ хэрэгтэ федеральна һанһаа мүнгэн һомологдохо», - гэжэ Алексей Цыденов тэмдэглэбэ.
Анна Огороднигой гэрэл зураг
