XXI зуунай эхилһээр арбан найман жэлэй үнгэрбэшье, Сагаалган хэдын сагта эхилдэг бэ гэжэ эли тодоор мэдэхэгүй буряад зон үшөөл олон байна. Гэбэшье, саг гээшэ сэсэн. Гүрэнэй «Бурятия» телерадиокомпани һүүлэй арбан жэлэй туршада Россиин Буддын шажантанай Сангхын гол дасан болохо Ивалгын дасанһаа сэхэ дамжуулга бүтээжэ, Лхама Сахюусан үглөөнэй хэды багта буужа, Сагаан һарын һайндэр хэды багта эхилнэб гэжэ хүнүүдтэ ойлгосотойгоор харуулдаг болобо. Захалхадаа, Улаан-Үдэ хотодо ажаһуудаг буддын шажантан сэхээр дамжуулагдажа байһан хуралда оролсодог байһан һаа, энэ жэлһээ эхилжэ, бүхы Буряад Уласай бүхы халуун амитан Сагаалганиие угтуулһан хуралда оюун ухаагаараа, сэдьхэлээрээ гэртээ һууһан мүртөө хабаадаха арга олобо. Һая болотор бидэ, ехэнхи буряадууд, мухархан һүзэгтэй байһанбди. Энээнһээл уламжалан, үүрэй сайгаадүй байтар, бэе бэеэ Сагаалганаар сагһаань урид амаршалха ушарнууд мүнөөшье үзэгдэнэ. Харин мүнөө Ивалгын дасан, гүрэнэй телерадиокомпани, «Буряад ФМ» радионуудай аша туһаар Сагаалгамнай хэды багта эхилнэб гэжэ хүн бүхэмнай бата бэхеэр хадуужа абадаг болобо.
Ашата буян бүтэхэ
Шэнын нэгэнэй үглөөгүүр Сиидэр Лхамын хурал буряад бүхы дасангуудта хурагдана. Ивалгын дасанда Бандида хамба лама Дамба Аюшеев энэ хурал хүтэлнэ. «Энэ үедэ хүн бүхэн һайхан сэдьхэл түрүүлжэ, маани мэгзэмээ уншажа байбал, халуун хамаг амитадта туһа хүргэхэ аргатай», - гэжэ Дандар лама тайлбарилна. «Тиихэдээ гансал хара амяа хараад һуухагүй, харин Эхэ зургаан зүйл хамаг амитаниие багтаажа, тэдэнэр тухай энэрхы сэдьхэлээр бодожо, эрхи татажа һуубалнай, ашата буян бүтэхэ».
Үглөөнэй зургаан сагта Ивалгын дасанда хүн зон олоороо сугларжа, хуушан жэлээ үдэшэжэ, шэнэ жэлээ угтана. Һүүлэй үедэ үнэн зүрхэнһөө бурхандаа шүтэжэ, жэлэйнгээ хэрэг бүтээхэ сэдьхэлтэйшүүл урданайхида орходоо, олон болоо. Россиин Буддын шажантанай гол дасан болохо Ивалгын дасанда зальбаран һуужа, боди сэдьхэл түрүүлжэ, Эхэ зургаан зүйл хамаг амитанай түлөө, мүн тиихэдэ гэр бүлынгөө, үри хүүгэдэйнгээ, аша зээнэрэйнгээ амгалан байдалда ажамидархын аша туһада дасан ерэһэн хүн бүхэн наманшална, эрхиеэ татажа, маани мэгзэм, зүрхэн тарнинуудые шадаха зэргээрээ уншана.
Дасан дугангуудта ошожо амжаагүй зон эртэхэн бодоод, бүтүүгэй үдэр тахиһан бурхандаа мүргөөд, телевизорээр дамжуулагдажа байһан хуралда хабаадаха аргаяа хүсэд дүүрэнээр хэрэглэбэ.
«Тарняа татаха, дотороо энэрхы сэдьхэл түрүүлһэн хүн юрэ телевизорэй урда һууһан хүнүүдтэ ороходоо, хуралда оролсоһондо тоотой болохо», - гэжэ Дандар лама һануулба.
Эгээл энэ зууранда хурал хуража байһан ламанар бурхадаа залажа эхилбэ. Бурхадаа залаад, үргэлөө үргэнэ. Тиихэдэнь тэрэ бурхад ганса дасангуудта бууна бэшэ, харин үнэн зүрхэнһөө сэдьхээд һууһан харагшадай, һүзэгшэдэй гэртэнь мүн лэ бууна.
«Бурхад танда адис үгэжэ байна, бодогты», - гэжэ Дандар ламын уряалхада, үнэн зүрхэнһөө сэдьхэһэн хүнүүд тэдэнэртэй золгобо.
«Шэнын нэгэндэ Лхама сахюусан лама санаартанай уншаад залахадань, буугаад, бүхы дэлхэй тойродог. Гунан дэлхэйе гурба эрьехэ үедөө хүнүүдые, тэдэнэй ажабайдал тон анхаралтайгаар шэнжэлжэ үрдидэг. Хүнүүд гурбан эрдэниеэ сахина гү? – гэжэ түбхын түрүүндэ тэрэ һонирходог. Гурбан эрдэнидэмнай бурхан, тэрэнэй һургаал, дасан хубарагууд ороно гүб даа. Хүн гэрээ сэбэрлээ гү? Эжы абаяа хэр хүндэлнэб? – гэһэн асуудалнуудта Лхама сахюусан нюдэ сабшаха агшанда харюу олодог», - гэжэ Дандар лама тайлбарилна.
Тиимэ ушарһаа бүтүүнэй үдэртөө хүн бүхэн гэр бараагаа сэбэрлэжэ, тахилаа тахижа, даллагаяа дэлгээнхэй, сэржэмээ бэлдэнхэй байбал, һайн. Лхама сахюусан тэрээндэнь баярлаха. Адис хүртүүлхэ байна. Шэнын нэгэндэ һүзэгтэй айл айлнуудай жэлэй хэрэг бүтэнэ гэхэдэ, алдуу болохогүй.
Хархис дайсаншье хадаа хүнэй үри ха юм даа
Ламанар Сиидэр Лхамын ном уншажа байха дээрээ түбхын түрүүндэ энэрхы сэдьхэл түрүүлхэеэ оролдоно. Бүхы амитадай түлөө һанаагаа табижа, бурханда зальбаржа шадаха хэрэгтэй. Эхэ зургаан зүйл хамаг амитаниие бүгэдыень ухаан сэдьхэлдээ багтаажа шадаагүйшье һаа, өөрынгөө эжы аба, аха дүү, аша зээнэр, нагаса, абганар, бусад түрэлхидэйнгөө түлөө зальбархада муу бэшэ. Харин хара амин тухайгаа бодожо болохогүй. Дүтынгөө зон нүхэд тухайгаа сагаан сэдьхэлээр бодохын хажуугаар, дайсадтаа һайнаар хандажа, тэдэнэй түлөө зальбаржа шадаха шухала. Дайсантнай ямаршье байг – тэрээн дотортнай сагаан сэдьхэлэй абьяас гэжэ заал һаа байдаг. Тэрэмнай мүн лэ хэнэйшьеб хүбүүн, аха, дүү байна ха юм даа.
Бэрхэшээлнүүдһээ зайлахын аша туһада
Сагаалганай хуралнууд шэнын нэгэнэй хуралаар дүүрэшэдэггүй. Арбан табан хоногой туршада Монлам Ченмо гэжэ хурал хурагдана. Тэрэнэй удхые Дандар лама иигэжэ тайлбарилна:
«Бурхан багша арбан табан үдэрэй туршада шэди үзүүлһэн байна. Эдэ арбан табан үдэрэй монгол литын арбан хоёр жэлнүүдтэ таарадаг. Шэнын хоёрто бар жэлтэй хүн ерэжэ, хуралда орохо ёһотой. Гурбанда – туулай, дүрбэндэ – луу, табанда – могой, зургаанда – морин, долоондо – хонин, найманда – бишэн, юһэндэ – тахяа, арбанда – нохой, арбан нэгэндэ – гахай, арбан хоёрто – хулгана, арбан гурбанда – үхэр жэлтэй хүн Монлам Ченмо хуралда оробол, эрхим. Хэнэйшье урда элдэб бэрхэшээл тохёолдодог. Тэрэнээ зайлуулха гэбэл, Монлам Ченмо хуралда хабаадагты. Харгы замтнай үргэн, арюун болохо. Энэ жэлэй туршада хэхэ ехэ ажал байбал, хурал дээрэ үнэн зүрхэнһөө тэрэнэй бүтэсэ тухай бодожо һууһан хүнэй түбэг һаад, бэрхэшээлнүүдынь үгы боложо, һанаһан хэрэгынь номой ёһоор бүтэхэ аргатай болоно.
Монлам Ченмогой бүхы арбан табан үдэртэнь ерэжэ байгаа һаа, муу бэшэ. Гэбэшье, өөрынгөө жэлдэ таараха үдэр оложо, тудажа ороһон хүндэ улам һайн байха.
Сэдьхэлэй тангариг
Сиидэр Лхамын Хуралай үедэ сэдьхэлэй тангариг уншагдадаг юм. Эгээл энэ сагта хүн бүхэн шэнэ жэлэй туршада бүтээхэ ажалаа сэдьхэжэ, тэрэниие бүтээхын тулада хэрэгтэй нүхэсэл дотороо зохёожо һуубал, тэрэ хэрэгынь номой ёһоор бүтэхэ.
Мүн лэ балим адислагдана. Гурилаар үзэсхэлэн һайханаар бариһан, сэсэгээр шэмэглээтэй олон үнгэтэ амтан эдеэе балим гэнэбди. Тэрэмнай сахюусад, бурхадай үргэл гээшэ. Ламанар балимаа адислаад, тэрэнээ үргэдэг гээшэ.
«Эгээл энэ сагта бурхандаа табиһан даллагадамнай адис орожо байна гэжэ бодохо хэрэгтэй. Энэ балингаараа Балдан-Лхама бурханиие хүндэлнэбди. Бурханай даллага амяараа бэлдэгдэдэг. Хажуудань юрын, өөһэдөө хүртэхэ даллага дэлгээгдэдэг аабза.
Балимаа үргэһэнэйнгөө удаа Лхама Сахюусаниие хадагаар угтаха ёһо байна. «Хадагаа гаргаад, зальбарха хэрэгтэй. Дүрбэн үнгэтэ хадагай байгаа болбол, дүрбүүлыень бариха шухала. Үгы һаань, нэгэ хадагаа урдаа баряад лэ, мүнөө үгы хадагуудаа ухаан соогоо баряад байнаб гэжэ һанаха хэрэгтэй», - гэжэ Дандар лама ойлгуулна.
«Иимэ хэрэгэй бүтэжэ байхада, мэдэхэ бүхы бурхадайнгаа, тэрэ тоодо Лхама сахюусанайнгаа һайн шанарыень һанаандаа оруулха хэрэгтэй. Бидэ мүргэл хэхэдээ, бэеэрээ, сэдьхэлээрээ, ухаагаараа хэжэ шадахабди. Хэлээрээ мүргэл хэхэдээ, бурхадайнгаа һайн шанарыень хэлэхэ, ухаагаараа мүргэл хэхэ дээрээ бурхадай, сахюусадай һайн шанарыень һанаха. Ямар бурхан юугээрээ бидэндэ туһатайб, юугээрээ маанадта ашатайб гэжэ бодожо һуубал, эрхим».
Гунгарбаадаа байһан бурхад ямар үзэсхэлэнтэй байнаб, ямар зурагтай байнаб, юун дээрэ һуунаб, мотортоо юу баряад байнаб гээд, һайнаар хадуужа абан харахада, һайн. Хожом хойшодоо бурханай дүрэ зураг толгой соогоо түрүүлжэ шадажа һурабал, һайн. Хаанашье ябахадаа, бурханай ном уншахада, буян болохо.
Зай, Сагаалгамнай хэдын сагта эхилнэб? Лама Санаартанай Лхама Сахюусанаа угтажа, хүл дээрээ бодоходо эхилнэ даа. Эгээл энэ агшанда Лхама Сахюусан гунан дэлхэйе гурба гороолжо, үнэн зүрхэнһөө шүтэһэн хамаг халуун амитадые адислана. Үүр хүсэд сайгаад, гарай хээн элеэр харагдажа эхилхэ үеэр буряад зон Сагаалгамнай ерэбэ, шэнэ жэл оробо гэжэ ойлгоод, хара һүни бэе бэедээ хонходохоёо гү, али үүдыень тоншожо орохоёо тэбшэдэг болоёл!
Баяр ЖИГМИТОВ