Борис Балдановай гэрэл зураг
Багашуулда зорюулагдаһан найр наадан Сагаан һарын түрүүшын үдэр эмхидхэгдэбэ. Үхибүүд олоор сугларжа, Арадай уран бүтээлэй түбэй (РЦНТ) бэлдэһэн наада һонирхожо хараһан байна.
Заалаар багтахыса сугларһан хүбүүд, басагадые гараад байгаа Нохой жэлэй гүлгэн угтажа абаа. Тэрэ бултантай хүхижэ, ёһо заншалай талаар олон һонин юумэ хөөрэжэ үгөө. Сагаан һара угтахаяа Буряад орон зорижо ерэһэн Финляндиин Санта Клаус болон Байгалай Жабар Үбгэн үхибүүдтэй уулзаа. Үльгэртэ Лапландиин Томо Шэхэтэ хада дээрэ ажаһуудаг Йоулопукки Муори наһанайнгаа нүхэртэеэ бултаниие амаршалаа. Мүн Байгалай Жабар Үбгэн Эрхүү можын Слюдянка хотодо байдаг юм. Сугларагшадта баярай һайхан үгэнүүдые Сагаан Үбгэн дамжуулаа. Эдэ шэдитэ үбгэжөөлнүүд дуратайгаар аза талаантай үхибүүдэй хатар хараһанайнгаа удаа бусад хүүгэдые амаршалхаяа гаража ошоо һэн.
Буряад Уласай Засагай газарай хүтэлбэрилэгшэд үхибүүдые мүн лэ амаршалхаа ерээ. Засагай газарай түрүүлэгшын орлогшо Вячеслав Цыбикжапов гараһан шара Нохой жэлээр багашуулые амаршалжа, ганса “4” ба “5” сэгнэлтэ дээрэ һурахыень гуйба.
Борис Балдановай гэрэл зураг
- Нохой хадаа хүнэй, илангаяа үхибүүдэй эгээл дуратай, дүтэ, үнэн сэхэ нүхэр болоно. Манай хүүгэд нохойдол адли сэсэн, шанга, элүүр энхэ ябаха бэзэ гээд найдагдана. Таанад булта ёһо заншалаа, соёл болбосоролоо мэдэжэ, түрэл хэлэн дээрээ зугаалдажа ябыт даа, - гэжэ Вячеслав Балданович сугларһан хүбүүд, басагадта хандан хэлэбэ.Удаань ургажа ябаа бэлигтэй үхибүүдтэ гүрэнэй шангуудые барюулаа. Петр Чайковскиин нэрэмжэтэ хүгжэмэй колледжын 3-дахи курсын оюутан Екатерина Васильева, Улаан-Үдэ отын 13 дугаар хүүгэдэй урлалай һургуулиин 4-дэхи ангиин шаби Вячеслав Норбоев, Загарай аймагай хүүгэдэй урлалай һургуулиин һурагша Александра Гришёва, Петр Чайковскиин нэрэмжэтэ хүгжэмэй колледжын дэргэдэхи Бау Ямпиловай нэрэмжэтэ хүүгэдэй урлалай һургуулиин 7-дохи ангиин шаби Наран Туяа Ринчинова болон Роман Мэрдыгеевэй нэрэмжэтэ уран һайханай һургуулиин 4-дэхи ангиин һурагша Дарья Баяндаева гэгшэд үндэр шангуудта хүртэбэ. Вячеслав Цыбикжаповай хэлэһээр, эдэмнай ерээдүйдэ ехэ нэрэ солотой хүнүүд боложо, өөрынгөө нэрэ болон нютагаа суурхуулжа ябаха һүрэг юм.
Гүрэнэй шанда хүртэгшэд
Борис Балдановай гэрэл зураг
Наран Туяа Ринчинова 7 наһатайһаа ятага дээрэ наадана. Хэдэн жэлэй саана тэрэ буряад арадай аман зохёолой “Уряал” ансамблиин тоглолтодо хабаадажа, ятага дээрэ гоё хүгжэм зэдэлүүлжэ, олон тоото сугларагшадые гайхуулаа бэлэй. Эдир хүгжэмшэнэй наадаһые олон хүн Интернет соо хаража, баясаһан байна.
Вячеслав Норбоев эжы абадаал адли бэрхээр баяан дээрэ наададаг. 58 дугаар һургуулиин энэ һурагша Александра Владимировна Кривецкая багшын хүтэлбэри доро олон тоото хэмжээ ябуулгануудта хабаадана. Бэлигтэй хүбүүн заал һаа шангай һууринуудые абадаг.
- “Найдал”, “Зимняя соната”, “Синяя птица”, “На крыльях таланта” гэхэ мэтэ урилдаануудта хабаадаһан байнаб. Хажуугаарнь дуулаха дуратайб. Дуунай хэдэн мүрысөөнүүдтэ амжалтатайгаар хабаадаа һэм. Ехэ болоходоо, Петр Дрангатай адли наадажа һурахаа һананаб, - гэжэ Вячеслав Норбоев хөөрэнэ.
Арадай уран бэлигэй улас түрын түб һаяхана «Бүүбэй, бүүбэй, бүүбэйхэн» гэһэн хүүгэдэй үлгын дуунуудай согсолбори ноототойнь, СD дисктэй гаргажа, энэ хэрэгтэй бүтээлтэеэ олониитые танилсуулаа бэлэй. Тус согсолборидо ороһон нэгэ дуун сугларагшадта дурадхагдаа. Эринжит Батрова “Байкал Идель” хүүгэдэй ансамбльтай гоё һайханаар дуу гүйсэдхөө.
Эринжит Батрова
Анна Огороднигой гэрэл зураг
Үнгэрһэн жэлдэ Буряад Уласай бэлиг ехэтэй үхибүүд бүхэроссиин урилдаануудта шадамар бэрхэ хүгжэмшэд, дуушад, хатаршад байһанаа гэршэлээ һэн. “Синяя птица” гэһэн бүхэроссиин түсэлэй һүүлшын шатада Тимур Найданов, Марина Цыренова болон Юлия Жамбалова гэгшэдэй хабаадаһые һануулая. Эдэ үхибүүд зал соо байна гэжэ тоглолто хүтэлбэрилһэн мэдээжэ Гунсыма Тудуповагай хэлэхэдэ, шанга гэгшын альга ташалган нэрьешоо һэн.
Үхибүүд өөрын гараар дархална
Борис Балдановай гэрэл зураг
2017 оной шэнэ жэлэй “Лучше всех” гэһэн дамжуулгада Буряадаймнай Рита Ушакова хабаадажа, бүхы телевизор харагшадта һайшаагдаа. Энэ хэмжээ ябуулгада 5 наһатай Рита Сагаалган тухай шүлэг уранаар уншаһан байна.
Буряад Уласай Засагай газарай дэмжэлгээр Сергей Степановай хүтэлбэрилдэг 3D студи буряад хэлэн дээрэ түрүүшын мультфильм зохёоһон байна. Урданай буряад онтохон дээрэ үндэһэлэн табигдаһан “Хууршан” гэһэн фильмын хэһэг үхибүүдтэ харуулагдаба.
Анна Огороднигой гэрэл зураг
Анна Огороднгигой гэрэл зураг
Борис БАЛДАНОВ