​Сагаан һарын наадан

Анна Огороднигой гэрэл зураг

Буряад бүхэ барилдаан, шагай наадан, һээр ша­алган – эдэ гурбан арадай спортын зүйл “Сага­ан һарын нааданууд” гэһэн анха түрүүшынхиеэ болоһон хэмжээ ябуулгын бүридэлдэ оруулагдаа. ФСК-гаар дүүрэн сугларһан зоной урда эгээл эрхимүүд элирүүлэгдэһэн байна.

Мүрысөө эмхидхэгшэ, Буряад Уласай арадуудай наадануудай федерациин хүтэлбэрилэгшэ Алексей Гыргеновэй хэлэһээр, на­адануудые нэгэдүүлжэ, хүн зоноо танилсуулха зорилго­тойгоор энэ хэмжээ ябуулга эмхидхэгдээ гээшэ.

- Бүхы наадануудаар Са­гаан һарада зорюулагдаһан мүрысөөнүүд урда жэлнүүдтэ боложо байгаа. Тэдэ ондо ондоо газарнуудта үнгэргэгдэдэг һэн. Харин мүнөө бултыень нэгэ доро үнгэргэхэ гэжэ оролдооб­ди. Тиимэһээ арад зон ехээр һонирхохо юм, - гэжэ Алек­сей Гыргенов хөөрэнэ.

Бүхэ барилдаан һонирхолтойгоор үнгэрөө. Юуб гэхэдэ, үшөө харагдаа үзэгдөөгүй дүримөөр эмхид­хэгдээ. Команда бүхэнэй бүридэлдэ гурба-гурбан ба­рилдаашад оролсожо, нэгэ дороо булта барилданад.

- Түрүүшээр хэниинь диилэhэн болоноб гэжэ ойлгоогүй байгаабди. Эне­эдэтэй барилдаан гээшэ. Томо бэетэйшүүлэй бага шэгнүүртэ нүхэдөө хамгаал­хадань һонирхолтой байгаа. Мүн багашуулай хамтараад, томо тамиршанда добтол­ходонь бүри энеэдэтэй шэн­ги, - иигэжэ байгаад хүн зон һанамжаараа Интернет соо хубаалдаһан байна.

Гончик Бадмаев, Саян Гармаев болон Баир Омок­туев гурбанай команда энэ мүрысөөндэ түрүүлжэ гара­ба. Алексей Мантатов, Арса­лан Биликтуев болон Цыбик Максаров гэгшэдэй “Харса­га” команда шангай хоёр­дохи һуури эзэлээ. Зорикто Ульзутуев, Эрдэни Лумбуцы­ренов болон Тимур Мункуев гурбан хүрэл медальнуудаар урмашуулагдаа.

Һээр шаалганай мүрысөөн дүрбэн наһанай бүлэгтэ үнгэргэгдөө. Эндэ тамирша бүхэн өөрын һээр асарһан байна. Мүн тиихэдэ һээр шаахаяа гараһан тамиршан буряад хубсаһатай байха гэжэ мүрысөөнэй гол дүрим соо бэшээтэй байһаниинь һайшаалтай.

52 наһатайһаа аха тамир­шадай дунда буряад хубсаһа оёдог Агаһаа уг гарбалтай Бато Цыренович Базаров түрүүлжэ гараа. Захаамин аймагай Шара Азаргын Ба­тор Викторович Очиров 36- 51 наһатай һээршэдэй дунда нэгэдэхи һуури эзэлээ. Энэл нютагай Сультим Доржиев 22-35 наһатайшуулай дун­да алтан медальда хүртөө. Эгээл залуу 14-21 наһатай хабаадагшадай дунда Буряа­дай багшанарай колледжын оюутан Болот Бадянов шал­гараа. Ага Хангилһаа уг гар­балтай энэ бүхэ абарга боло­жо тодороо.

Борис БАЛДАНОВ